1 KORINICA 8

Na Taro me Baleta na Kakana sa Vakacabori Oti ki na Matakau

1Ia, ena vuku ni kakana sa vakacabori oti ki na kalou matakau: eda sa kila ni “sa tu vei keda kece na vuku.” Na vuku sa vakavuna me qaciqacia na tamata; ia sa tara cake ga na bula na loloma. 2O ira vakayadua sa tukuna ni ra sa kila tiko e dua na ka sa sega vakaidina vei ira na kila-ka me baleta na ka o ya; 3ia o koya ga sa lomana na Kalou sa kilai koya na Kalou.

4Ena vuku ni kena laukana na kakana sa vakacabori ki na matakau, sa macala tu vei keda “ni sega na bula e tu vua na matakau,” ka “sa duabau ga na Kalou, ka sega tale e dua.” 5Eso na tamata era nanuma ni vuqa na kalou kei na turaga era tiko mai lomalagi, ka vaka talega kina e vuravura. 6Ia vei keda sa duabau ga na Kalou, na Tamada, o koya sa vu mai vua na ka kecega, ka da sa bula tiko ena vukuna; sa duabau ga na Turaga, ko Jisu Karisito, ka sa vu mai vua na ka kecega, ka da sa bula tiko ena vukuna.

7Ia sa sega ni da kila kece sara na i tukutuku dina oqo. Eso na tamata ka ra sa bula vata mai kei na matakau me yacova mai oqo era se nanuma tikoga ni kakana kece sara era sa kania sa okati kece me kakana sa vakacabori ki na matakau; a sa malumalumu na nodra lewa-e-loma, ka ra nanuma ni ra sa dukadukali ena vuku ni kakana. 8Ia na kakana ena sega ni vakavinakataka cake na noda veiwekani kei na Kalou; eda na sega ni vakayalia e dua na ka kevaka eda sega ni kania, se rawata e dua na ka kevaka eda sa kania.

9Mo ni qarauna kina mo ni kakua ni vakatara na nomuni galala oqo me ra tarabe kina ki na i valavala ca o ira era sa malumalumu. 10Ia kevaka e dua na tamata sa malumalumu na nona lewa-e-loma sa sotavi iko, ka sa tiko vei iko na “kila-ka”, ka sa raici iko ni o kana tiko ena nona burekalou e dua na matakau; ena sega li ni vakayaloqaqataki koya na ka oqo me la'ki kania kina na kakana sa vakacabori ki na matakau? 11Ena vuku ni “kila-ka” oqo, ena rusa kina na wekamu malumalumu oqo, o koya ka sa mate oti na Karisito ena vukuna. 12Ni o ni sa cala vakaoqo vei ira na wekamuni lotu Vakarisito, ka vakamavoataka na nodra lewa-e-loma ena gauna e malumalumu kina, o ni sa cala kina vei Karisito. 13O koya oqo, kevaka sa veivakatarabetaki vua na wekaqu vakayalo na kakana, au na sega tale ni kania na lewe ni manumanu, me'u kakua kina ni vakavuna me bale na wekaqu ki na i valavala ca.

Currently Selected:

1 KORINICA 8: FNV

Highlight

Copy