1 KORINICA 7

Na Veitaro Eso me Baleta na Vakawati

1Ia ena vuku ni veika o ni a vola mai vei au, e vinaka cake vua na tagane me kua ni vakawati. 2Ia ena vuku ni kena sa rui levu na veibutakoci sa dodonu me vakawati na tagane yadua ka vakawati na yalewa yadua. 3Sa dodonu me vakayacora na tagane vua na watina yalewa na nona i tavi ena bula vakaveiwatini, ka sa dodonu talega me vakayacora na yalewa vua na watina tagane na nona i tavi ena bula vakaveiwatini. 4Sa sega ni lewa ga vakai koya na yagona na yalewa vakawati, sa lewai koya na watina. Sa vakakina na tagane vakawati, sa sega ni lewa vakai koya ga na yagona, sa lewai koya na watina yalewa. 5Ni kakua ni dui bureitaki kemuni vua na dui watimuni, vaka vo ga ke o ni sa loma vata kina, ena dua na gauna, mo ni galala kina ka qarava na nomuni masu. Ni oti o ya mo ni qai tiko vata tale de na veretaki kemuni o Setani ena nomuni sa sega ni lewai kemuni rawa. 6Au sa tukuna na ka oqo vei kemuni me vaka e dua na ka eda sa lomavata kina, ka sega ni ka sa vakaroti. 7Au diva ga mo ni kua ni vakawati me vakataki au; ia sa dui tikoga vua na tamata yadua na nona i solisoli mai vua na Kalou, e dua na i solisoli oqo, ka dua tale na i solisoli o ya.

8Ia oqo, vei kemuni sa sega ni vakawati kei kemuni na yada, au sa kaya ni vinaka cake mo ni bula duadua voli ga ka sega ni vakawati me vakataki au. 9Ia kevaka o ni sa sega ni tarovi kemuni rawa mai na nomuni gagadre, mo ni qai vakawati ga; ni sa vinaka cake me ia na vakawati ka ca me kama tikoga na lomada ena levu ni noda gagano.

10Vei ira na vakawati, au sa solia na i vakaro oqo ka sa sega ni noqu, ia sa nona i vakaro ga na Turaga: Me kakua ni biuta na watina na yalewa sa vakawati;#Maciu 5.32; 19.9; Mari 10.11,12; Luke 16.18 11ia kevaka sa kitaka vakakina, e dodonu me tiko duadua ga se me rau veilesuvi tale kei na watina; ka me kakua ni sereka na watina na tagane vakawati.

12Vei ira na kena vo, au sa kaya (a noqu nanuma ga oi au, ka sega ni nona na Turaga): Kevaka e dua na tagane lotu Vakarisito sa tawa vakabauta na watina, ka sa loma i watina me rau tiko vata ga, me kakua ni biuti koya o tagane. 13Kevaka talega sa dua na yalewa lotu Vakarisito sa tawa vakabauta na watina, ka sa loma i watina me rau tiko vata ga, me kakua ni biuti koya o yalewa. 14Ni sa vakadonui vua na Kalou na tagane tawa vakabauta ena vuku ni nona semati vei watina, kei koya na yalewa tawa vakabauta sa vakadonui vua na Kalou ena vuku ni nona semati vua na watina sa lotu Vakarisito. Kevaka sa sega ni vakakina, era na vaka na luvedra na tamata tawa-lotu o ira na luvedrau; ia oqo, era sa vakadonui vua na Kalou. 15Ia kevaka sa via veibiu kei na watina sa lotu Vakarisito o koya sa tawa-lotu, mo ni laiva ga me lako. Ena mataqali kisi vakaoqo, sa sega ni vauci kina na tagane se yalewa sa lotu Vakarisito. Ni sa kacivi kemuni na Kalou mo ni tiko veilomani ga. 16O iko na yalewa vakawati sa lotu Vakarisito, o cei e kila, me na rawa vei iko mo vakabulai koya na watimu. Se o iko na tagane vakawati sa lotu Vakarisito, de rawa talega vei iko mo vakabulai koya na watimu.

Ni Bula Voli me Vaka sa Kacivi Kemuni na Kalou

17Me dui bula na tamata yadua me vaka na i solisoli sa solia vua na Turaga, me vaka sa kacivi koya kina na Kalou. Sa i koya oqo na noqu i vakaro ki na veisoqosoqo lotu kece sara. 18Kevaka sa ciqoma na kaci ni Kalou e dua na tamata ka sa cilivi oti, me kakua ni kauta tani o koya na mawe ni nona cilivi. Kevaka sa ciqoma na kaci ni Kalou e dua na tamata sa tawa cili, me kakua tale ni qai cilivi o koya. 19Sa ka walega na cili se na tawa cili; na ka bibi duadua sai koya me da ciqoma na kaci ni Kalou. 20Me dei tikoga na tamata yadua ena nona i tutu ena gauna e kacivi kina. 21O a bobula tiko li ena gauna o sa kacivi kina? Kakua mada ni kauwaitaka o ya; ia kevaka sa rawa mo sereki, mo qai vakayagataka na nomu galala. 22O koya na tamata bobula ka sa kacivi koya na Turaga sa yaco me nona tamata sereki na Turaga. Sa vakakina vei koya na tamata galala ka sa kacivi koya na Turaga sa yaco me bobula i Karisito. 23Sa voli kemuni oti na Kalou e dua na i sau; o koya oqo mo ni kakua kina ni nodra bobula na tamata. 24Kemuni na veiwekani, me tudei na tamata yadua vua na Kalou me vaka ena gauna sa kacivi kina.

O Ira na Sega ni Vakawati kei Ira na Yada

25Ia ena vukudra na sega ni vakawati: E sega ni tu vei au e dua na i vakaro mai vua na Turaga, ia au na vakaraitaka ga na noqu vakasama me vaka e dua sa yaga me vakadinati ena vuku ni yalololoma ni Turaga.

26Ena vuku ni gauna dredre eda sa donuya, au nanuma ni vinaka cake vua e dua na tamata me tu ga ena i tutu sa tu kina. 27Sa tiko beka e dua na watimu? Kakua ni tovolea mo biuti koya. O sa sega beka ni vakawati? Ke sega, kakua ni qai vakasaqara e dua na watimu. 28Ia kevaka o sa mani vakawati, o sa sega ni cala kina; ni kevaka sa vakawati e dua na goneyalewa, sa sega ni cala kina o koya. Ia o ira era sa vakawati era na sota kaya na dredre ni bula vakavuvale ena veisiga, ka'u sa via maroroi kemuni mai kina.

29Kemuni na veiwekani, sai koya oqo na ka au kaya tiko: sa lekaleka sara na gauna, ka me tekivu oqo ka lako yani, o ira sa vakawati e dodonu me ra bula tiko me vakataki ira sa sega ni vakawati; 30vei ira sa tagi, me ra vakataki ira era sa sega ni rarawa; vei ira sa matadredredre, me ra vakataki ira era sa sega ni marau; vei ira sa ia na volivoli, me ra vakataki ira sa sega ni taukena na ka era sa volia; 31vei ira sa dau oga ena ka ni vuravura oqo, me ra vakataki ira era sa sega ni kauwaitaka na veika oqo. Ni sa vakarau takali tiko yani na vuravura mai na kena i tuvaki oqo.

32Au sa gadreva mo ni galala mai na lomaocaoca. Na tagane sa sega ni vakawati sa dauvakananuma tu ga na cakacaka ni Turaga, baleta ni sa dau vinakata o koya me vakalomavinakataka na Turaga. 33Ia na tagane vakawati sa dau leqataka vakalevu na ka me baleti koya vata kei na veika ni vuravura oqo, baleta ni sa dau vinakata o koya me vakalomavinakataka na watina; 34ka sa wase rua tu kina na lomana. O koya talega na yalewa sega ni vakawati se na goneyalewa sa dau kauwaitaka vakalevu na cakacaka ni Turaga, baleta ni sa vinakata o koya me savasava tikoga na yagona kei na yalona; ia na yalewa vakawati sa dau kauwaitaka vakalevu na veika ni vuravura oqo, baleta ni sa vinakata o koya me vakalomavinakataka na watina.

35Au sa tukuna na veika oqo me'u vukei kemuni kina. E sega ni noqu i naki me'u cakava vei kemuni eso na vakatatabu, ia mo ni vakayacora ga kina na ka dodonu, ka kilikili, ka me ka taucoko kina na nomuni soli kemuni ki na cakacaka ni Turaga.

36Ena vukudrau ka sa veimusumusuki oti tu ka sa qai nakita me rau sa sega tale ni vakamau: kevaka sa nanuma na tagane ni sa tawa kilikili na nona i valavala vua na nona i tokani goneyalewa, ka se kaukauwa tikoga na nona gagano me baleti koya, ka sa nanuma ni sa dodonu ga me rau sa vakamau, ia me rau qai vakamau ga me vaka ni sa vinakata o koya. Sa sega ni dua na i valavala ca ena ka oqo. 37Ia o koya sa vakadeitaka sara ki lomana, ni sa sega ni vakasaurarataki kina, me sa kua ni vakawati, ka sa lewa vinaka na nona gagano, e sa vinaka ga vua me kua ni vakamautaka na nona i tokani goneyalewa. 38Na tagane yadua sa vakawati sa vinaka na nona veiqaravi, ia o koya sa sega ni vakawati sa uasivi cake na nona veiqaravi.

39Sa vauci tu na yalewa vakawati vua na watina ena gauna kece sara sa bula kina; ia kevaka sa mate na watina, sa na qai galala me vakawati kei na dua tale na tagane sa vinakata, ia me lotu Vakarisito o koya. 40Ena marau vakalevu cake sara o koya kevaka me tiko duadua voli ga vakaikoya. Sa i koya oqori na noqu vakasama, ni ka'u sa nanuma ni sa tiko talega vei au na Yalo ni Kalou.

Currently Selected:

1 KORINICA 7: FNV

Highlight

Copy