Vakatakila 18

Na Bale nei Papiloni

1Ni sa oti na veika oqo, au a qai raica e dua tale na agilosi ni sa lako sobu mai lomalagi. A sa ka levu na nona kaukauwa, ka sa vakararamataki vuravura taucoko na nona i serau. 2#Aisea 21.9; Jere 51.8; Vtaki 14.8; Aisea 13.21; Jere 50.39A sa kaci ena domolevu: “Sa qai bale! Sa qai bale o Papiloni na koro cecere! Sa yaco me nodra i tikotiko na tevoro kei na yalo velavela; era sa bula ga kina na veimataqali manumanu vuka duka ka cati vakalevu. 3#Aisea 23.17; Jere 51.7Ni ra sa gunuva na waini kaukauwa ni nona i vakarau vakasisila o ira kecega na veimatanitu. O ira na tui kei vuravura era sa veidauci vata kaya, ka ra sa vutuniyau vakalevu o ira na dauveivoli kei vuravura mai na i dre kaukauwa ni nona garogaro ca.”

4 # Aisea 48.20; Jere 50.8; 51.6,45 Au a qai rogoca e dua tale na domo mai lomalagi, ni sa kaya vakaoqo:

“Ni lako tani mai vua, oi kemuni na noqu tamata!

Ni kakua sara ni vakayacora vata kaya na nona i valavala ca;

Ni kakua sara ni vota vata kaya na nona ka ni veivakararawataki!

5 # Vteki 18.20,21; Jere 51.9 Ni sa veibinibini na nona i valavala ca me yaco ki lomalagi,

Ka sa nanuma na Kalou na nona caka cala kecega.

6 # Same 137.8; Jere 50.29 Vakayacora tale vua na ka ga sa vakayacora vei kemuni;

Mo vakaruataka na nomu sausaumi lesu vua ena vuku ni veika ca sa kitaka.

Vakasinaita na nona bilo ena gunu sa vakaruataki na kena kaukauwa

Mai na kena sa vakarautaka vei kemuni.

7 # Aisea 47.7-9 Solia vua na i votavota ni yaluma kei na rarawa

Sa veirauti kaya na nona vakalagilagi koya kei na nona tiko vinaka.

Ni sa kaya e lomana o koya,

‘Sa i au ga oqo, na ranadi!

Au sega ni yada oi au,

Ka'u na sega ni kila na rarawa!’

8Ena ka oqo, ena yacovi koya kina ena dua na gauna na ka ni veivakararawataki eso —

Na tauvimate, na rarawa, kei na dausiga.

Ena vakamai o koya ena bukawaqa,

Baleta ni sa kaukauwa ga na Turaga na Kalou, o koya sa lewai koya.”

9 # Isi 26.16,17 Ia o ira na tui kei vuravura era sa cala ka dau veibutakoci vata kaya, era na tagicaka ka yasovaka ni ra sa raica na kubou ni kena kama. 10Era na tucake tu ga mai vakayawa baleta ni ra sa rerevaka de ra na vakaivotavota ena nona vakararawataki. Era sa kaya, “Sa vakadomobula dina! Sa rui vakaloloma! Oilei na koro cecere ka qaqa oqo o Papiloni! O sa qai vakarusai ena loma ni duabulu ga na aua!”

11 # Isi 27.31,36 O ira talega na dauveivoli kei vuravura era sa tagi ka yasovaki koya, ni sa sega tale ni dua me qai volia na nodra i voli. 12#Isi 27.12,13,22A sa sega tale e dua me volia na nodra koula, na siliva, na veivatu talei, na mataniciva, na lineni matailalai, na i sulu lokaloka, na silika, na i sulu damudamu, na veimataqali kau boi vinaka, na veimataqali i yaya e caka mai na i leu ni manumanu se batina kei na kena e caka mai na kau i sau dredre, na parasa, na kaukamea, kei na vatu mapolo; 13kei na sinamoni, na macou, na i saluwaki mamaca, na mura, na ferekiniseni; na waini kei na waiwai, na falawa matailalai kei na witi, na bulumakau kei na sipi, na ose kei na qiqi, kei na tamata bobula, kei na kawa tamata. 14Era sa kaya vua na dauveivoli: “Sa takali mai vei iko na vuata ka a garova na yalomu, ka ra sa yali mai vei iko na nomu i yau kece kei na kemu totoka, ia o na sega sara ni kunei ira tale!” 15#Isi 27.31,36O ira na dauveivoli ka ra sa vakavutuniyautaki ena nodra veivoli ena koro o ya, era na tu vakayawa yani ena nodra rerevaka de ra vota vata kei koya na veika mosimosi kei na rarawa. Era na tagi ga ka qolouvaka: 16“Sa vakadomobula dina! Sa rui vakaloloma na koro cecere oqo! A dau vakasulumi koya tu ena lineni matailalai, ena i sulu lokaloka, kei na i sulu damudamu rarama, ka dau ukucavutaki koya ena koula, kei na veivatu talei, kei na mataniciva! 17#Aisea 23.14; Isi 27.26-30Ia sa qai vakayalia kecega na nona i yau ena loma ni dua ga na aua!”

O ira kece na kavetani ni waqa kei na pasidia, na dausoko kei ira kecega na dauqoli era na tu vakayawa sara mai, 18#Isi 27.32ka ra sa qolouvaka mai ni ra sa raica na kubou ni kena kama: “Sa sega tale ni qai dua na koro levu me vakataka na koro cecere oqo!” 19#Isi 27.30-34Era na qai biuta na kuvu ni qele ki uludra ni ra sa tagi ka qolouvaka tiko: “Sa vakadomobula dina! Sa rui vakaloloma na koro cecere oqo! Oqo ga na koro levu sa vakavutuniyautaki ira na i taukei ni waqa kecega sa sokowasa voli na nodra waqa! Ia sa qai vakayalia na nona veika kece ena loma ga ni dua na aua!”

20 # Vrua 32.43; Jere 51.48 “Mo reki sara, o iko lomalagi, baleta ni sa vakarusai o koya! Mo ni reki talega, oi kemuni na tamata ni Kalou, kei kemuni na i apositolo, kei kemuni na parofita! Ni sa qai cudruvi koya vakaoqo na Kalou ena vuku ni veika sa vakayacora vei kemuni!”

Na i Totogi nei Papiloni

21 # Jere 51.63,64; Isi 26.21 A sa dua na agilosi kaukauwa sa taura cake e dua na vatu sa vaka e dua na vatu ni qaqaqi levu ka viritaka ki loma ni wasawasa, ka sa kaya: “Ena viritaki sobu vakaukauwa vakakina o Papiloni na koro cecere, ka na sega sara ni kune tale. 22#Isi 26.13; Aisea 24.8 #Jere 7.34; 25.10E na sega tale ni rogoci mai vei iko na domo ni api kei na sere, kei na i vakatagi bitu, kei na biukila! Ena sega tale ni kune vei iko e dua na matai se daubuli ka; ena sega talega ni qai rogo tale na domo ni qaqi vatu. 23Ena sega ni kune tale vei iko na rarama ni cina; ena sega ni rogo tale na domo ni tagane vou se na yalewa vou sa qai vakawati. O ira na nomu dauveivoli era a tamata kaukauwa sara e vuravura, ka o sa vakacalai ira kecega na tamata ena veivanua kecega mai na nomu i lawaki!”

24 # Jere 51.49 A sa totogitaki o Papiloni ena vuku ni kena kunei kina na nodra dra na parofita kei ira na tamata yalosavasava; io, na nodra dra ga o ira sa vakamatei e vuravura.

Currently Selected:

Vakatakila 18: FNVDC12

Highlight

Copy