Vakatakila 16

Na Bilo ni Cudru ni Kalou

1Au a qai rogoca e dua na domolevu mai na valenisoro ka sa vosa vakaoqo vei iratou na agilosi e vitu: “Dou lako ka sovaraka ki vuravura na bilo ni cudru ni Kalou e vitu!”

2 # Lako 9.10 A sa lako yani na i matai ni agilosi ka sovaraka na nona bilo ki vuravura. A sa tauvi ira kina na tamata sa tu vei ira na nona maka na manumanu rerevaki kei ira era sa dauqarava na kena i vakatakarakara na vidikoso ca ka rui mosimosi.

3Sa qai sovaraka na i karua ni agilosi na nona bilo ki na wasawasa. A sa vuki na wai me vaka na dra ni tamata mate, ka ra sa mate na veika bula kecega sa tu e wasawasa.

4 # Lako 7.17-21; Same 78.44 Sa qai sovaraka na i katolu ni agilosi na nona bilo ki na veiuciwai kei na veimataniwai, ka sa vuki na wai me dra. 5Ia ka'u sa qai rogoca ni sa kaya na agilosi sa lewa na wai, “O ni sa dodonu ena nomuni lewa oqo, oi kemuni na Yalosavasava, oi kemuni sa bula edaidai ka o ni sa bula talega eliu! 6O ira oqo era a vakadavea na nodra dra na yalosavasava kei ira na parofita, ka o ni sa solia kina vakaoqo vei ira na dra me ra gunuva. Sa rauta vinaka me ra sotava na ka oqo!” 7Au a qai rogoca e dua na domo mai na i cabocabonisoro, ni sa kaya, “Oi kemuni na Turaga na Kalou Kaukauwa! Sa dina ga ka dodonu na nomuni lewa!”

8Sa qai sovaraka na i kava ni agilosi na nona bilo ki na matanisiga, ka sa vakatarai vua na matanisiga me vakamai ira na tamata ena kena bukawaqa katakata. 9Era sa kama vakaca sara na tamata mai na katakata vakadomobula oqo, ka ra sa vosavakacacataka kina na yaca ni Kalou, o koya sa lewa na veika ni veivakararawataki oqo. Ia era sa sega ga ni vuki tani mai na nodra i valavala ca ka vakacaucautaka na nona lagilagi.

10 # Lako 10.21 Sa qai sovaraka na i kalima ni agilosi na nona bilo ki na nona i tikotiko na manumanu rerevaki. A sa solegi ena butobuto na nona matanitu na manumanu rerevaki, ka ra sa kati yamedra na tamata baleta na nodra mosi, 11ka ra sa vosavakacacataka na Kalou ni lomalagi ena vuku ni nodra rarawa mosimosi kei na nodra tauvi vidikoso. Ia era sa sega ga ni vuki tani mai na nodra sala ca.

12 # Aisea 11.15 A sa qai sovaraka na i kaono ni agilosi na nona bilo ki na uciwai levu na Uferetisi. A sa maca vakadua na uciwai, ka sa vakarautaka oqo na sala me baleti ira na tui eso sa lako mai na tokalau. 13Au sa qai raica e tolu na yalo velavela sa vaka na boto na kedratou i rairai. Eratou sa lako mai na gusu ni drakoni, mai na gusu i koya na manumanu rerevaki, kei na gusuna na parofita vakailasu. 14Sa i iratou oqo na yalo ni tevoro sa dau cakava na veicakacaka mana eso. O iratou na yalo e tolu oqo sa lako yani vei ira na tui ni veivanua e vuravura taucoko, me vakasoqoni ira vata mai ki na i valu ena siga bibi o ya, na Siga ni Kalou Kaukauwa.

15 # Maciu 24.43,44; Luke 12.39,40; Vtaki 3.3 “Rogoca! Au na lako yani me vaka na daubutako! Sa kalougata o koya sa yadra tiko ka maroroya tiko na nona i sulu, me kakua kina ni veilakoyaki luvawale voli ka vakamadualaki ena matana levu!”

16 # 2Tui 23.29; Saka 12.11 A ratou sa vakasoqoni ira vata mai na tui ki na vanua sa vakatokai ena vosavakaiperiu o Amaketone.

17Sa qai sovaraka na i kavitu ni agilosi na nona bilo ki na maliwa lala. A sa qai rogo mai na i tikotiko vakaturaga mai na valenisoro e dua na domolevu, ka sa kaya, “Sa qai vakayacori oti!” 18#Vtaki 8.5; 11.13,19A sa tibi na livaliva, ka sa lutu na kurukuru kei na vavadugudugu, ka sa yaco e dua na uneune levu. A sega mada ni se bau dua na uneune levu me vakaoqo me tekivu mai na gauna e buli kina na tamata; ni sa ca vakalevu sara na kena oqo! 19#Aisea 51.17A sa kavida i tolu na koro levu, ka ra sa vakarusai na veikoro ni veimatanitu kece sara. A sa qai nanuma na koro levu o Papiloni na Kalou, ka sa vakayacori koya me gunuva na waini mai na nona bilo, io na waini ni nona cudru waqawaqa. 20#Vtaki 6.14Era sa takali tani na veiyanuyanu kecega, ka ra sa sega ni kune na veiulunivanua kece sara. 21#Lako 9.23; Vtaki 11.19Sa qai lutu mai lomalagi vei ira na tamata na uca cevata lelevu, ka kedra bibi yadudua sa rauta ni 50 na kilokaramu. Era sa vosavakacacataka na Kalou o ira na tamata ena vuku ni ka ni veivakararawataki oqo ni uca cevata, ni sa rui vakadomobula dina.

Currently Selected:

Vakatakila 16: FNVDC12

Highlight

Copy