Vakatakila 14

Na Lami kei Ira na Nona Tamata

1 # Isi 9.4; Vtaki 7.3 Au a qai raica, ni sa tucake tu na Lami ena Ulunivanua o Saioni; era sa tu vata kaya e lewe 144,000 na tamata sa volai tu ena yadredra na yacana kei na yaca i Tamana. 2Au sa qai rogoca e dua na domo mai lomalagi sa vaka na vakere ni savu, ka vaka na domo ni kurukuru levu. A sa vaka na rorogo ni vakatagi era cakava na dauniqiriqiri era sa qiria na nodra api. 3Era sa tucake tu na 144,000 na tamata ena mata ni tikotiko vakaturaga, kei na matadratou na veika bula e va, kei ira na qase; era sa qai lagata e dua na sere vou, ka ra sa kila duadua ga o ira na sere o ya. Sa i ira ga na lewe 144,000 oqo ka ra sa voli oti vakadua mai vuravura. 4Oqo o ira na tagane era sa maroroya na bula savasava ena vuku ni nodra sa sega ni veiyacovi kaya e dua na yalewa. Era sa daumuria na Lami ena veivanua kecega sa lakova. Era sa voli vakadua mai vei ira na vo ni kawa tamata ka ra sai sevu vua na Kalou kei na Lami. 5#Sefa 3.13Sa sega sara ni kune na lasu ena gusudra; sa sega sara na nodra cala.

Ratou na Agilosi e Tolu

6Au sa qai raica e dua tale na agilosi ni sa vuka tu ena maliwa lala, ka sa taura tu na i Tukutuku Vinaka tawamudu me kacivaka yani vei ira na tamata e vuravura, vei ira na veimatatamata kecega, na veiyavusa, na veimataqali vosa, kei na veimatanitu. 7Sa qai kaya ena domolevu o koya, “Ni rerevaka na Kalou ka vakacaucautaka na nona lagilagi! Ni sa yaco mai oqo na gauna me vakataulewa kina o koya. Mo ni cuva vua sa bulia na lomalagi, na vuravura, na wasawasa, kei na veimataniwai!”

8 # Aisea 21.9; Jere 51.8; Vtaki 18.2 A sa qai muria na i matai ni agilosi o koya na i karua ni agilosi, ka sa kaya, “Sa qai bale! Sa qai bale o Papiloni na koro cecere! A sa vakaukauwataki ira na tamata kecega o koya me ra gunuva na nona waini — na waini kaukauwa ni nona garogaro ca ni dautagane.”

9A sa qai muri rau mai e dua tale na agilosi, o koya na kena i katolu, ka sa kaya ena domolevu, “O koya yadua sa cuva vua na manumanu rerevaki kei na nona i vakatakarakara, ka sa ciqoma na maka ki na yadrena se e ligana, 10#Aisea 51.17; Vteki 19.24; Isi 38.22e na gunuva talega vakakina o koya na waini ni cudru ni Kalou, ka sa sova ena kena kaukauwa taucoko ki na bilo ni nona cudru! Ena vakararawataki na tamata o ya ena bukawaqa kei na sulifure ena matadra na agilosi yalosavasava kei na Lami. 11#Aisea 34.10Sa kuvu cake tikoga na kubou ni buka era sa vakararawataki kina ka sega ni mudu. Era sa sega ni vakacegu rawa ena siga kei na bogi o ira sa qarava na manumanu rerevaki kei na kena i vakatakarakara, kei koya sa tiko vua na maka ni yacana.”

12Sa gadrevi sara kina na vosota vakadede vei ira na tamata ni Kalou, o ira era sa muria tiko na veivakaro ni Kalou ka yalodina tiko vei Jisu.

13Au a qai rogoca e dua na domo mai lomalagi ni sa kaya vakaoqo, “Mo vola mada oqo: era sa kalougata o ira era sa mate ena vuku ni nodra veiqaravi vua na Turaga me tekivu oqo ka lako yani!”

A sa kaya na Yalo Tabu, “Io, sa dina sara! Era sa kune vakacegu ga mai na nodra cakacaka vagumatua, ka sa muri ira na nodra i valavala.”

Na Tatamusuki e Vuravura

14 # Tani 7.13 Au a qai rai yani, ka'u sa raica e dua na o vulavula, ka sa dabe toka e dela ni o e dua ka sa vaka na i rairai ni tamata, sa vakaisala tu ena i sala koula vakatui o koya, ka sa taura tu e ligana e dua na i sele-takelo gagata ni tatamusuki. 15#Joeli 3.13A sa dua tale na agilosi ka sa lako mai na valenisoro ni Kalou, a sa kaci vakadomoilevu ki vua sa dabe toka ena dela ni o, “Vakayagataka na nomu i sele-takelo ni tatamusuki ka ia na tatamusuki, baleta ni sa kena gauna taudonu oqo; sa dreu vinaka tu na vuata e dela i vuravura!” 16Sa qai vakacawiritaka e dela i vuravura na nona i sele-takelo ni tatamusuki o koya sa dabe toka ena dela ni o, ka sa tamusuka na vuata kei vuravura.

17Au a qai raica e dua tale na agilosi ni sa lako mai na valenisoro mai lomalagi, ka sa taura tale tu ga o koya e dua na i sele-takelo gagata ni tatamusuki.

18Ia sa dua tale na agilosi, o koya sa lewa na bukawaqa, a sa lako mai na i cabocabonisoro. A sa kaci vakadomoilevu yani vua na agilosi sa taura tiko na i sele-takelo gagata ni Tatamusuki, “Vakayagataka na nomu i sele-takelo ni tatamusuki, ka musuka mai na veisoso qerepi kei vuravura, ka ni ra sa dreu vinaka tu!” 19Sa qai walilicaka na agilosi na nona i sele-takelo ni tatamusuki e vuravura, ka sa musuka kina na veisoso qerepi kei vuravura, ka viritaki ira ki na i qaqi-ni-waini levu ni cudru ni Kalou. 20#Aisea 63.3; Lele 1.15; Vtaki 19.15A sa butubuturaki na qerepi ena i qaqi-ni-waini mai na i bili ni koro, ka sa dave yani na dra mai na i qaqi-ni-waini ena dua na waluvu sa 300 na kilomita na kena balavu ka rua na mita na kena titobu.

Currently Selected:

Vakatakila 14: FNVDC12

Highlight

Copy