Popular Bible Verses from Vakatakila 14

Share

Au a qai rogoca e dua na domo mai lomalagi ni sa kaya vakaoqo, “Mo vola mada oqo: era sa kalougata o ira era sa mate ena vuku ni nodra veiqaravi vua na Turaga me tekivu oqo ka lako yani!” A sa kaya na Yalo Tabu, “Io, sa dina sara! Era sa kune vakacegu ga mai na nodra cakacaka vagumatua, ka sa muri ira na nodra i valavala.”

Sa gadrevi sara kina na vosota vakadede vei ira na tamata ni Kalou, o ira era sa muria tiko na veivakaro ni Kalou ka yalodina tiko vei Jisu.

Sa qai kaya ena domolevu o koya, “Ni rerevaka na Kalou ka vakacaucautaka na nona lagilagi! Ni sa yaco mai oqo na gauna me vakataulewa kina o koya. Mo ni cuva vua sa bulia na lomalagi, na vuravura, na wasawasa, kei na veimataniwai!”

A sa qai muri rau mai e dua tale na agilosi, o koya na kena i katolu, ka sa kaya ena domolevu, “O koya yadua sa cuva vua na manumanu rerevaki kei na nona i vakatakarakara, ka sa ciqoma na maka ki na yadrena se e ligana, e na gunuva talega vakakina o koya na waini ni cudru ni Kalou, ka sa sova ena kena kaukauwa taucoko ki na bilo ni nona cudru! Ena vakararawataki na tamata o ya ena bukawaqa kei na sulifure ena matadra na agilosi yalosavasava kei na Lami. Sa kuvu cake tikoga na kubou ni buka era sa vakararawataki kina ka sega ni mudu. Era sa sega ni vakacegu rawa ena siga kei na bogi o ira sa qarava na manumanu rerevaki kei na kena i vakatakarakara, kei koya sa tiko vua na maka ni yacana.”

Au a qai raica, ni sa tucake tu na Lami ena Ulunivanua o Saioni; era sa tu vata kaya e lewe 144,000 na tamata sa volai tu ena yadredra na yacana kei na yaca i Tamana.

Au sa qai raica e dua tale na agilosi ni sa vuka tu ena maliwa lala, ka sa taura tu na i Tukutuku Vinaka tawamudu me kacivaka yani vei ira na tamata e vuravura, vei ira na veimatatamata kecega, na veiyavusa, na veimataqali vosa, kei na veimatanitu.

A sa qai muria na i matai ni agilosi o koya na i karua ni agilosi, ka sa kaya, “Sa qai bale! Sa qai bale o Papiloni na koro cecere! A sa vakaukauwataki ira na tamata kecega o koya me ra gunuva na nona waini — na waini kaukauwa ni nona garogaro ca ni dautagane.”