Maciu 16

Na Vinakati ni Dua na Caka-Mana

(Mari 8.11-13; Luke 12.54-56)

1Era sa qai lako mai na Farisi kei ira na Setoki, ka kerei koya, ena nodra via vakatovolei koya, me vakaraitaka vei ira e dua na i vakatakilakila mai lomalagi.#Maciu 12.38; Luke 11.16 2Ia, sa qai sauma ga o koya ka kaya vei ira, “Ni sa yakavi mai, dou dau kaya, ‘Ena draki vinaka, ni damudamu tu na lomalagi,’ 3ia, ena mataka lailai, ‘Ena draki ca, ni damudamu tu ka loaloa mai na lomalagi.’ Dou sa vakaibalebaletaka rawa na i rairai ni lomalagi, ia, dou sa sega ga ni kila rawa na veivakatakilakila ni veigauna oqo. 4Sa dau vakasaqara e dua na i vakatakilakila na i tabatamata ca ka dauyalewa oqo, ia, ena sega ni soli kina e dua na i vakatakilakila, na i vakatakilakila ga i Jona na parofita.”#Maciu 12.39; Luke 11.29

Sa qai biuti ira o koya ka lako yani.

Na Nodra i Vakatubu na Farisi kei na Setoki

(Mari 8.14-21)

5Ni ratou sa yaco ki tai kadua na tisaipeli, e ratou sa qai kila ni ratou guilecava me ratou kauta tiko eso na kakana. 6Sa qai kaya vei iratou o Jisu, “Dou raica matua, qarauni kemudou mai na nodra i vakatubu na Farisi kei na Setoki.”#Luke 12.1

7E ratou sa qai veivosakitaka vakai iratou na ka oqo, ka kaya, “Edatou sega ni kau madrai mai.”

8E kila o Jisu na ka oqo ka kaya, “A cava dou veivosakitaka kina ni sa sega ni tu vei kemudou na madrai? Sa lailai dina na nomudou vakabauta! 9Dou se sega tikoga ni kila rawa? Dou sa guilecava li na noqu a dovia na i buli madrai e lima vei ira na lewe 5,000 na tamata? E vica na basikete dou a vakasinaita?#Maciu 14.17-21 10E vakaevei na i buli madrai e vitu vei ira na lewe 4,000 na tamata? E vica na basikete dou a vakasinaita kina?#Maciu 15.34-38 11A cava beka dou sa sega ni kila rawa kina ni'u sa sega ni vosa ena vuku ni madrai? Ia dou qarauni kemudou ga mai na nodra i vakatubu na Farisi kei na Setoki!”

12Era sa qai kila ni sa sega ni tukuna o koya me ra qarauni ira mai na i vakatubu ni madrai, ia mai na nodra i vakavuvuli ga na Farisi kei na Setoki.

Na i Tukutuku e Tusanaka o Pita me Baleti Jisu

(Mari 8.27-30; Luke 9.18-21)

13Ni sa yaco o Jisu ki na yasayasa sa voleka ki na koro o Sisaria Filipai, sa qai tarogi iratou na nona tisaipeli, ka kaya, “O cei mada era sa kaya na tamata me baleta na Luve ni Tamata?”

14E ratou sa qai kaya, “Eso era kaya, o Joni na Dauveipapitaisotaki, ka so tale era kaya ni o Ilaijia, ka so tale era kaya ni o Jeremaia, se e dua tale na parofita.”#Maciu 14.1,2; Mari 6.14,15; Luke 9.7,8

15Sa qai kaya vei iratou o koya, “E vakacava o kemudou? O cei ga dou sa kaya ni sai au?”

16Sa qai sauma o Saimoni Pita, ka kaya, “Sa i kemuni na Mesaia, na Luve ni Kalou bula.”#Joni 6.68,69

17Sa qai sauma o Jisu, ka kaya vua, “O sa kalougata, Saimoni na luve i Jona, ni sa sega ni vakatakila vei iko na lewe kei na dra na ka oqo, ia, o Tamaqu ga mai lomalagi. 18Au sa kaya talega vei iko, O iko o Pita, ka'u na tara ena dela ni vatu oqo na noqu i soqosoqo, ka na sega ni vakamalumalutaka rawa o mate. 19Au na solia vei iko na i dola ni matanitu vakalomalagi; na ka kecega o sa vakatabuya e vuravura ena vakatabui talega mai lomalagi, kei na ka kecega o sa vakatara e vuravura ena vakatarai talega mai lomalagi.”#Maciu 18.18; Joni 20.23

20Sa qai vakaroti iratou matua na tisaipeli me ratou kakua ni tukuna vua e dua ni sai koya ga na Mesaia.

Sa Tukuna Tiko o Jisu na Nona Rarawa kei na Nona Mate

(Mari 8.31–9.1; Luke 9.22-27)

21Mai na gauna o ya sa tekivu vakaraitaka tiko kina o Jisu vei iratou na nona tisaipeli ni sa dodonu me lako yani ki Jerusalemi ka vosota kina na veika rarawa e vuqa mai vei ira na qase, kei ira na bete levu, kei ira na daunilawa, ka me vakamatei, me na qai vakaturi cake tale mai na mate ena i katolu ni siga.

22Sa qai kauti koya vakatikitiki o Pita ka tekivu me vunauci koya, ka kaya, “Me kakua sara, Turaga. Ena sega sara ni yacovi kemuni na ka oqo.”

23Ia, sa qai vuki o koya ka kaya vei Pita, “Lako tani ki dakuqu, Setani! O iko na i vakatatao ni noqu sala, baleta ni sa vakatamata ga na nomu vakasama ka sa sega ni lako mai vua na Kalou.”

24Sa qai kaya vei iratou na nona tisaipeli o Jisu, “Kevaka e dua sa via muri au, me na kakua ni lewai koya vakataki koya, ia me colata ga na nona kauveilatai, ka muri au.#Maciu 10.38; Luke 14.27 25Ni o koya sa via maroroya na nona bula ena vakayalia, ia o koya sa vakayalia na nona bula ena vukuqu ena qai kunea.#Maciu 10.39; Luke 17.33; Joni 12.25 26Na cava li ena kena yaga vua na tamata kevaka sa rawati vuravura taucoko ka qai vakayalia kina na nona bula? Se na cava ena solia na tamata me i sau ni nona bula? 27Ena lako mai na Luve ni Tamata ena i serau nei Tamana, kei ira na nona agilosi, ka na qai saumi ira yadua na tamata o koya me vaka na nodra dui i valavala.#Maciu 25.31; Same 62.12; Roma 2.6 28Au sa kaya vakaidina vei kemudou, eso vei ira era tucake tu oqo era na sega ni tovolea mada na mate me yacova ni ra sa raica na Luve ni Tamata ni sa lako mai ena nona matanitu.”

Currently Selected:

Maciu 16: FNVDC12

Highlight

Copy