Maciu 17

Na Vukici ni Rairai kei Jisu

(Mari 9.2-13; Luke 9.28-36)

1Ni sa oti e ono na siga, sa qai kauti Pita kei Jemesa, kei Joni na tacina, o Jisu, ka kauti iratou cake vakatikitiki ki na dua na ulunivanua cecere. 2Sa qai vukici na kena i rairai e matadratou, ka serau na matana me vaka na matanisiga, ka vulavula mai na nona i sulu me vaka na rarama. 3Ia sa qai rairai mai vei iratou o Mosese kei Ilaijia, ka rau mai veivosaki kaya tiko. 4Sa qai kaya vei Jisu o Pita, “Kemuni Turaga, sa vinaka dina na neitou tiko eke; kevaka o ni vinakata, au na tara eke e tolu na vale vakacevaceva, e dua me nomuni, dua me nei Mosese ka dua me nei Ilaijia.”

5Ni sa vosa tikoga o koya, sa vakarurugi iratou mai e dua na o lumilumisa, ka rogo e dua na vosa mai na o, “Oqo na Luvequ daulomani, au sa dau vinakati koya vakalevu, dou vakarogoci koya.”#Vteki 22.2; Same 2.7; Aisea 42.1; Maciu 3.17; 12.18; Mari 1.11; Luke 3.22; Vrua 18.15 #2Pita 1.17,18

6Ni ratou sa rogoca na tisaipeli e ratou sa cuva vakatoboicu ka rere vakalevu. 7Sa qai lako mai o Jisu ka tarai iratou, ka kaya, “Tu cake, dou kakua ni rere.” 8Ni ratou sa tacake e ratou sa sega ni raica e dua tale, o Jisu taudua ga.

9Ni ratou sa siro sobu tiko mai na ulunivanua, sa vakaroti iratou o Jisu, ka kaya, “Dou kakua ni tukuna vua e dua na raivotu, me yacova ni sa tucake tale mai na mate na Luve ni Tamata.”

10E ratou sa qai tarogi koya na tisaipeli, ka kaya, “Na cava era kaya voli kina na daunilawa ni sa dodonu me liu taumada mai o Ilaijia?”#Mala 4.5

11Sa qai sauma o Jisu ka kaya vei iratou, “Sa lako dina mai e liu o Ilaijia me vakarautaka vinaka na veika kece sara.#Sr 48.10 12Ia au sa kaya vei kemudou ni sa lako oti mai o Ilaijia, ka ra sega ni kilai koya rawa na tamata, ia era sa cakava vua na ka ga era vinakata. Ena sala vata o ya, era na vakasosataka vakakina na Luve ni Tamata.”#Maciu 11.14

13E ratou sa qai kila na tisaipeli ni sa vosa tiko vei iratou o koya me baleti Joni na Dauveipapitaisotaki.

Sa Vakabula e Dua na Gonetagane Curumi Tevoro o Jisu

(Mari 9.14-29; Luke 9.37-43a)

14Ni ratou sa yaco mai vei ira na lewe vuqa, sa qai lako mai vua e dua na tamata, ka tekiduru e matana 15ka kaya, “Turaga, ni yalololoma vua na luvequ tagane, ni dau tauvi manumanusoni o koya, ka sa dau vakaleqai koya sara vakalevu; sa dau bale vakavuqa ki na buka, ka vakavuqa ki wai. 16Ia, ni'u sa kauti koya mai vei iratou na nomuni tisaipeli, e ratou qai sega ga ni vakabulai koya rawa.”

17Sa qai sauma o Jisu, ka kaya, “Sa dua dina na i tabatamata tawa vakabauta ka yalo vakatani oi kemuni oqo! Me cava soti na dede ni gauna me'u tiko vata kina kei kemuni? Me cava soti na dede ni noqu vosoti kemuni voli? Kauta mai vei au na gone oqori!” 18Sa qai vakaroti koya na tevoro o Jisu, ka sa lako tani kina mai vua na gone, ka sa bula sara ena gauna vata o ya.

19E ratou sa qai lako mai vakatikitiki na tisaipeli vei Jisu, ka kaya, “Na cava keitou sa sega ni vakasavi koya tani rawa kina?”

20Sa qai kaya vei iratou o koya, “E baleta ni lailai ga na nomudou vakabauta. Ni'u sa kaya vakaidina vei kemudou, kevaka e tu vei kemudou na vakabauta me vaka na sore ni musita, dou na kaya ki na ulunivanua oqo, ‘Mo toso mai na vanua oqo ki kea,’ ka na toso vakakina. Sa sega na ka e dredre vei kemudou!#Maciu 21.21; Mari 11.23; 1Kori 13.2

21[Ia, sa dau rawa me vakasavi tani na kena mataqali oqo mai na masu kei na lolo duadua ga.]”

Sa Tukuna Tale na ka e Baleta na Nona Mate o Jisu

(Mari 9.30-32; Luke 9.43b-45)

22Ni ratou sa lako vata mai na tisaipeli e Kalili, sa qai kaya o Jisu vei iratou, “Ena soli yani na Luve ni Tamata ki na ligadra na tamata, 23ka ra na vakamatei koya; ia ena vakaturi cake tale mai na mate o koya ena i katolu ni siga.”

A ratou sa lomabibi sara kina na tisaipeli.

Na Saumi i Vakacavacava ni Valenisoro

24Ni ratou sa yaco ki Kapenaumi, era sa qai lako mai vei Pita o ira na daukumuni i vakacavacava ka kaya, “E sega li ni dau soli me baleta na vale ni Kalou na nomudou i vakavuvuli?”#Lako 30.13; 38.26

25A sauma o Pita ka kaya, “Io, e dau solia o koya.” Ni sa curu ki vale, sa namaki koya mai o Jisu, ka kaya, “A cava o nanuma, Saimoni? Era dau kumuna mai vei cei o ira na tui e vuravura na i vakacavacava se na soli? Mai vei ira na nodra lewe ni vanua, se mai vei ira ga na kai tani?”

26A sa kaya o Pita, “Mai vei ira ga na kai tani.”

Sa qai kaya vua o Jisu, “Sa vinaka, e kena i balebale o ya ni ra sega ni dodonu me ra sausaumi na lewenivanua. 27Ia, eda sega ni vinakata me da vakasosataki ira oqo. Mo lako sara mada kina ki matasawa, ka viritaka na siwa. Ni o sa yavia cake mai na i matai ni ika o rawata, o na raica ni tiko e gusuna e dua na i lavo ka rauta vinaka na i sau ni nomu soli ni valenisoro kei na noqu. Kauta oqori ka la'ki sauma kina na nodaru i vakacavacava.”

Currently Selected:

Maciu 17: FNVDC12

Highlight

Copy