Maciu 11

O Rau ka Talai mai vei Joni na Dauveipapitaisotaki

(Luke 7.18-35)

1Ni sa oti na nona vakaroti iratou na nona tisaipeli e lewe tinikarua o Jisu, sa qai lako tani mai kea me la'ki vakatavuvuli ka vunau ena nodra veikoro.

2Ni sa rogoca o Joni mai valeniveivesu na cakacaka i Karisito, sa qai tala e rua na nona tisaipeli, 3me rau la'ki tarogi koya, “Sa i kemuni beka o koya me lako mai, se me da waraka e dua tale?”

4A sauma o Jisu ka kaya, “Drau lako, ka tukuna vei Joni na veika drau sa rogoca ka raica tiko: 5era sa rai na mataboko, ka ra lako na lokiloki, era sa vakasavasavataki na vukavuka, era rogo rawa na didivara, ka ra vakaturi cake tale na mate, ka sa vunautaki na i tukutuku vinaka vei ira na dravudravua.#Aisea 35.5,6; Aisea 61.1 6Sa kalougata o koya e sega na ka e kunea vei au me vagolei koya tani.”

Sa Levu Cake mai na Parofita o Joni

7Ni rau sa lako tale, sa qai tekivu vosa vei ira na lewe vuqa o Jisu me baleti Joni: “Na cava li dou a lakova ki na vanua veitalasiga? Na gasau sa yavalati ena cagi? 8Ia, na cava li dou a lakova? Mo dou raica e dua na tamata e vakaisulu ena i sulu totoka? Raica, o ira era daramaka na i sulu totoka era dau kunei ga ena nodra veivale na tui. 9Ia, na cava ga dou a lakova? Mo dou raica e dua na parofita? Io, au sa kaya vei kemudou, e dua ka levu cake mai na parofita. 10Sa i koya sa volai tu vakaoqo ena vukuna:

‘Raica, au sa tala na noqu dautukutuku me liu vei iko,

Ena caramaka na nomu sala e matamu.’#Mala 3.1

11Au sa kaya vakaidina vei kemudou, e sa sega mada ni tubu oti e dua mai vei ira ka sucu ena yalewa me levu cake mai vei Joni na Dauveipapitaisotaki; ia, o koya e lailai duadua ena matanitu vakalomalagi sa qai uasivi cake vua. 12Mai na gauna i Joni na Dauveipapitaisotaki me yacova oqo, sa sotava tiko na matanitu vakalomalagi na veivorati kaukauwa ka ra tovolea na tamata voravora me ra tarova vakaukauwa.#Luke 16.16 13Me yacova na gauna i Joni, sa tukuna o ira na parofita kei na Lawa i Mosese na veika me baleta na matanitu vakalomalagi; 14ia kevaka sa lomamudou mo dou vakabauta na i tukutuku o ya, sai koya o Ilaijia ka sa dodonu me lako mai.#Mala 4.5; Maciu 17.10-13; Mari 9.11-13 15O koya e vakadaligana, ia me rogoca vinaka sara!

16“Ia, me'u vakatautauvatataka mada ena cava na i tabatamata oqo? E vakataki ira na gone era tiko voli ena veimakete, ka ra kacivi ira na nodra i caba ka kaya,

17‘Keitou a uvu i vakatagi vei kemudou, ia dou a sega ni meke!

Keitou a laga sere ni mate, ia dou a sega ni tagi!’

18Ni sa lako mai o Joni, ka sa ia na lolo ka sega ni gunu waini, era sa kaya kecega, ‘E tiko vua e dua na tevoro!’ 19Ni sa lako mai na Luve ni Tamata, ka sa ia na kana kei na gunu, era sa kaya kecega, ‘Dou raica na tamata oqo! Sa tamata daukana ka daugunu waini, ka nodra i tokani na daukumuni i vakacavacava kei ira na tamata i valavala ca!’ Ia sa dau vakadinadinataki na vuku ni Kalou ena mawe ni nona cakacaka.”

Na Koro Tawa Vakabauta

(Luke 10.13-15)

20Sa qai tekivu me vunauca na veikoro e sa caka vakalevu sara kina na nona cakacaka mana, ni ra sa sega ni veivutuni. 21“O sa kalouca sara Koresini! O sa kalouca sara Pecisaita! Ni kevaka sa caka mai Taia kei Saitoni na cakacaka mana ka a caka vei kemudrau, ke rau sa veivutuni makawa ena i sulu taga kei na dravusa.#Aisea 23.1-18; Isi 26.1–28.26; Joeli 3.4-8; Emo 1.9,10; Saka 9.2-4 22Ia au sa kaya vei kemudrau oqo, ena ca vakalailai o Taia kei Saitoni ena siga ni lewa, oi kemudrau, drau na ca vakalevu. 23O iko talega, Kapenaumi, o sa vakacerecerei iko li ki lomalagi? O na biu sobu ga ki Etesi. Ni kevaka a caka mai Sotoma na veika ka a caka vei iko, ke sa tu ga me yacova na siga oqo.#Aisea 14.13-15; Vteki 19.24-28 24Ia au sa kaya vei iko ni na ca vakalailai o Sotoma ena siga ni lewa, o iko, o na ca vakalevu.”#Maciu 10.15; Luke 10.12

Lako mai Vei Au ka Kunea na Vakacegu

(Luke 10.21-22)

25Ena gauna o ya sa qai vosa o Jisu ka kaya, “Au sa vakavinavinaka vei kemuni, Tamaqu, na Turaga ni lomalagi kei vuravura, ni o ni sa vunia na veika oqo vei ira na vuku kei ira na kila-ka, ka vakatakila ga vei ira na gone lalai: 26io, Tamaqu, ni sa vaka oqori na nomuni lewa loloma.

27“Sa soli tu vei au na veika kecega mai vei Tamaqu, ka sega e dua e kila se o cei na Luvena, na Tamaqu duadua ga, ka sega e dua e kila se o cei na Tamaqu, na Luvena duadua ga, kei koya ga e digitaka na Luvena me vakatakilai koya.#Joni 3.35; Joni 1.18; 10.15

28“Dou lako mai vei au, oi kemudou kecega sa oca ena kauta voli na i colacola bibi, ka'u na vakacegui kemudou.#Sr 6.24-30; 24.19; 51.23-26 29Vakataqara vei kemudou na noqu i vua, ka vuli vei au, ni'u sa yalomalua ka yalomalumalumu, ka dou na kunea kina na vakacegu ni yalomudou.#Jere 6.16 30Ni sa rawarawa na noqu i vua, ka mamada na noqu i colacola.”

Currently Selected:

Maciu 11: FNVDC12

Highlight

Copy