Maciu 10

O Iratou na i Apositolo e Lewe Tinikarua

(Mari 3.13-19; Luke 6.12-16)

1Sa qai kacivi iratou mai na nona tisaipeli e lewe tinikarua ka solia vei iratou na kaukauwa me ratou vakasavi ira tani na tevoro, ka vakabula na tauvimate kecega kei na veimataqali mate kece sara. 2Sa i koya oqo na yacadratou na i apositolo e lewe tinikarua: na i matai o Saimoni ka vakatokai o Pita, kei Adriu na tacina; kei Jemesa na luve i Sepeti, kei Joni na tacina; 3o Filipe kei Pacolomiu; o Tomasi kei Maciu na daukumuni i vakacavacava; o Jemesa na luve i Alifio, kei Cateo; 4o Saimoni na gugumatua, kei Jutasa Isikarioti, o koya ka soli Jisu yani.

Na Nodratou Kauta na i Tukutuku Vinaka na Lewe Tinikarua

(Mari 6.7-13; Luke 9.1-6)

5Sa qai talai iratou yani na lewe tinikarua oqo o Jisu, ka vakaroti iratou ka kaya, “Dou kakua ni muria na sala kivei ira na veimatanitu tani, ka mo dou kakua ni curu ki na dua na koro vaka-Samaria; 6ia, mo dou lako ga kivei ira na sipi ni mataqali ni Isireli era sa yali tu. 7Ni dou sa lako voli, dou vunau, ka kaya, ‘Sa voleka mai na matanitu vakalomalagi.’ 8Dou vakabulai ira na tauvimate, vakaturi ira cake tale na sa mate, vakasavasavataki ira na vukavuka, vakasavi ira na tevoro; dou sa rawata wale, mo dou solia wale talega. 9Kakua ni kauta na koula se siliva se i lavo ena nomudou beleti, 10kakua na taga ni vaqa e gaunisala, se rua na sote, se na i vava, se na i titoko; ni sa dodonu me soli vua na tamata cakacaka na kena kaka na.#1Kori 9.14; 1Timo 5.18

11Ena koro kecega dou curu kina, dou vakataroga se o cei na tamata dina e tiko kina; dou la'ki tiko vua me yacova ni dou sa lako tale yani. 12Ni dou sa curu ki vale, dou kidavaka; 13kevaka sa daumaka na vale o ya, laiva koto kina na nomudou veivakacegui; ia, kevaka era sega ni veiciqomi, me suka tale vei kemudou na nomudou veivakacegui. 14Ia, o koya e sega ni vakacegui kemudou se rogoci kemudou, dou lako tani ena vale se koro o ya, ka kuretaka laivi na kuvu ni soso mai na yavamudou.#Caka 13.51 15Au sa kaya vakaidina vei kemudou, ena ca vakalailai na vanua o Sotoma kei Komora ena siga ni lewa, ena ca vakalevu na koro o ya.#Maciu 11.24; Vteki 19.24-28 #Luke 10.4-12

Na Veivakacacani sa Vakarau Yaco Mai

(Mari 13.9-13; Luke 21.12-17)

16“Raica, au sa talai kemudou yani me vaka na sipi ena kedra maliwa na olifa; o koya oqo, mo dou vuku me vaka na gata ka yalovinaka me vaka na ruve.#Luke 10.3 17Ia, mo dou qarauni ira na tamata, ni ra na soli kemudou yani ki na mataveilewai, ka ra na vakanakuitataki kemudou ena nodra veivalenilotu.#Mari 13.9-11; Luke 12.11,12; 21.12-15 18O ni na kau ki matadra na kovana kei na tui ena vukuqu, me dua na ka ni vakadinadina vei ira, kei ira talega na veimatanitu. 19Ni ra sa soli kemudou yani, dou kakua ni lomaleqataka se dou na vosa vaka e vei, se cava mo dou kaya; ni na soli vei kemudou na tiki ni gauna o ya na ka mo dou kaya. 20Dou na sega ni vosa oi kemudou, ia ena vosa ga na Yalo ni Tamamudou ena lomamudou.

21“Ena dui solia yani na tuakana se tacina me mate, ka na solia yani na luvena o tamana, era na vorati ira na nodra i tubutubu na gone, ka vakamatei ira;#Mari 13.12; Luke 21.16 22era na cati kemudou na tamata kecega ena vuku ni yacaqu. Ia, o koya ga ena vosota tiko me yacova na kena i otioti ena vakabulai.#Maciu 24.9; Mari 13.13; Luke 21.17; Maciu 24.13; Mari 13.13 23Ni ra sa vakacacani kemudou ena koro oqo, dro ki na dua tale; ni'u sa kaya vakaidina vei kemudou, ni dou sa sega mada ni vakaotia na veikoro e Isireli; e sa na yaco mai na Luve ni Tamata.

24“E sega ni levu cake e dua na tisaipeli mai vua na nona i vakavuvuli, se na tamata dauveiqaravi, mai vua na nona turaga.#Luke 6.40; Joni 13.16; 15.20 25Sa rauti koya na tisaipeli me yaco me vakataki koya na nona i vakavuvuli, kei na dauveiqaravi me vakataki koya na nona turaga. Kevaka era sa vakatokai koya na i taukei ni vale me o Pielisepupi, era na vakatokai ena so na yaca ca vakalevu cake o ira na lewe ni nona matavuvale!#Maciu 9.34; 12.24; Mari 3.22; Luke 11.15

O Koya me Rerevaki

(Luke 12.2-7)

26“O koya oqo, dou kakua ni rerevaki ira, ni sega na ka e tabonaki me na sega ni vakaraitaki, se vunitaki me na sega ni kilai.#Mari 4.22; Luke 8.17 27Na ka au tukuna vei kemudou ena buto, dou tukuna ena rarama, kei na ka dou rogoca ni vakasolokakanataki e daligamudou, dou kacivaka ena dela ni vale. 28Mo dou kakua talega ni rerevaki ira era rawa ni vakamatea na yago, ka ra sega ni rawata me vakamatea na yalo; dou rerevaki koya ga e rawa ni vakarusa ruarua na yalo kei na yago mai eli. 29E sega li ni volitaki e rua na siparo ena dua na sede? Ia, ena sega ga ni lutu ki na qele e dua vei rau me sega ni kila na Tamamudou. 30Ia, oi kemudou, e wiliki yadua sara ga na drau ni ulumudou. 31O koya oqo mo dou kakua ni rere; ni dou sa talei cake sara mai vei ira na siparo e vuqa.

Na Tusanaki Karisito e Matadra na Tamata

(Luke 12.8-9)

32“O koya oqo, o koya ga e tusanaki au e matadra na tamata, au na tusanaki koya talega ena mata i Tamaqu mai lomalagi; 33ia, o koya e cakitaki au e matadra na tamata, au na cakitaki koya talega ena mata i Tamaqu mai lomalagi.#2Timo 2.12

E Sega na Veisaututaki, na i Seleiwau Ga

(Luke 12.51-53; 14.26-27)

34“Dou kakua ni nanuma ni'u sa lako mai me'u kauta mai na veisaututaki ki vuravura; e sega ni'u lako mai me'u kauta mai na veisaututaki, na i seleiwau ga. 35Ni'u sa lako mai me'u veiseitaki rau na veitamani tagane, kei na veitinani yalewa, kei na veivugoni yalewa talega;#Maika 7.6 36ka ra na nona meca na tamata o ira ga na nona lewe ni vale.

37“O koya e lomani tamana se tinana vakalevu cake mai vei au sa tawa yaga vei au, kei koya e lomani luvena tagane se luvena yalewa vakalevu cake mai vei au sa tawa yaga vei au; 38kei koya e sega ni colata na nona kauveilatai ka muri au sa tawa yaga vei au.#Maciu 16.24; Mari 8.34; Luke 9.23 39O koya sa maroroya na nona bula ena vakayalia, ia, o koya sa vakayalia na nona bula ena vukuqu ena maroroya.#Maciu 16.25; Mari 8.35; Luke 9.24; 17.33; Joni 12.25

Na i Sau

(Mari 9.41)

40“O koya e vakacegui kemudou sa vakacegui au, kei koya sa vakacegui au sa vakacegui koya sa talai au mai.#Luke 10.16; Joni 13.20; Mari 9.37; Luke 9.48 41O koya sa vakaceguya e dua na parofita e baleta ni sa parofita, ena taura o koya na i sau ni parofita, kei koya sa vakaceguya e dua na tamata dodonu e baleta ni sa tamata dodonu ena taura o koya na i sau ni tamata dodonu. 42O koya ga ena solia vua e dua vei ira na lalai oqo e dua walega na bilo wai liliwa e baleta ni sa tisaipeli, au sa kaya vakaidina vei kemudou, ena sega sara ni yali vua na kena i sau.”

Currently Selected:

Maciu 10: FNVDC12

Highlight

Copy