Luke 8

O Iratou na Yalewa ka Dau Sala Vata kei Jisu

1Ni oti toka ga o ya, sa lako voli o Jisu ena veikoro lelevu kei na veikoro lalai me vunau ka tukuna kina na i Tukutuku Vinaka ni matanitu ni Kalou. E ratou a lako vata kei koya na tisaipeli lewe tinikarua, 2ka vakakina eso na yalewa era sa vakabulai oti mai na yalo velavela kei na tauvimate eso. O ya o iratou o Maria na yalewa ni Makitala, o koya ka a lako tani mai vua e vitu na tevoro,#Maciu 27.55,56; Mari 15.40,41; Luke 23.49 3kei Joana, o koya na wati Kusa na dauniyau i Eroti, kei Susana, kei ira e lewe vuqa tale era dau qaravi Jisu kei iratou na nona tisaipeli ena nodra i yau.

Na Vosa Vakatautauvata ni Daukabukaburaki

(Maciu 13.1-9; Mari 4.1-9)

4Era a tabili tikoga vei Jisu o ira na tamata mai na veikoro, ia ni ra sa soqoni vata yani e dua na i lala levu, sa qai tukuna vei ira na vosa vakatautauvata oqo o koya:

5“A sa tiko voli e dua na dauteitei ka sa lako yani me la'ki kaburaka na nona i tei ni sila. Ni sa kabukaburaki tiko, sa qai lutu eso ena tutu ni sala, ka sa laubutu kina, ka ra kania na manumanu vuka. 6A sa lutu eso ena dela ni vatu; ia ni sa tubu cake, sa mamaca sara vakatotolo ka raqosa, baleta ni sa sega ni suasua. 7Ka sa lutu eso ena loma ni veiwavakavotona; era sa tubu vata cake ka sa vakaruguti ira na veiwavakavotona. 8A sa lutu eso ena qele vinaka, ka ra sa tubu cake, ka ra mani vua, ka ra sa vuavuaidrau.”

Ni sa cavuta oti o koya na veika oqo, sa qai kacivaka, “O koya sa vakadaligana me rogo kina, me rogoca sara.”

Na Kedra i Naki na Vosa Vakatautauvata

(Maciu 13.10-17; Mari 4.10-12)

9Era sa qai tarogi Jisu na nona tisaipeli se na cava na i balebale ni vosa vakatautauvata o ya. 10Sa qai kaya o koya, “Sa soli ga vei kemuni mo ni kila na veika vuni ni matanitu ni Kalou; ia vei ira na tani sa tukuni ga vei ira na vosa vakatautauvata, me ra raica tu ka sega ni kunea, ka ra rogoca tu ka sega ni kila.#Aisea 6.9 (LXX)

Sa Vakamacalataka o Jisu na Vosa Vakatautauvata ni Daukabukaburaki

(Maciu 13.18-23; Mari 4.13-20)

11“Sa i koya oqo na i balebale ni vosa vakatautauvata: Na i tei ni sila, koya na vosa ni Kalou. 12Na i tei ni sila e tutu ni sala, sai ira era sa rogoca na vosa, sa qai lako mai na tevoro ka kauta laivi na vosa mai na lomadra, me ra kakua kina ni vakabauta ka vakabulai. 13Kei ira ena dela ni vatu, sai ira era sa rogoca ka vakabauta na vosa ena reki, ia sa sega na wakadra. Era sa vakabauta vakadede vakalailai ga, ia ni sa yaco na veivakatovolei era sa mani bale tale. 14Kei ira ka ra a lutu ena veiwavakavotona, sai ira era sa rogoca na vosa, ia ni ra sa lako tu ena nodra sala era sa vakaruguti ena lomaocaoca kei na i yau kei na veika ni lasa ni bula oqo, ka sa sega ni matua rawa na vuadra. 15Ia o ira ena qele vinaka, sai ira era sa rogoca na vosa, ka ra sa taura matua sara ena lomadina ka vinaka, ka ra sa vuataka mai na vuadra ena nodra dau vosota.

Na Cina ena Ruku ni Bilo

(Mari 4.21-25)

16“E sega ni dua na tamata e vakawaqaca na cina me qai ubia ena dua na bilo se biuta ena ruku ni davodavo, ia ena biuta ga ena kena i tutu me ra raica na rarama o ira era curu mai.#Maciu 5.15; Luke 11.33

17Ni sa sega na ka e vunitaki me na sega ni vakaraitaki ena matana levu, ka sega na ka e tabogo me na sega ni kilai se vakavotui.#Maciu 10.26; Luke 12.2

18“Ni qarauni kemuni kina ena i tovo ni nomuni dau vakarorogo; o koya ga sa tu vua na ka ena soli vakalevu tale vua, ia o koya e sega na ka e tu vua, ena kau tani mai vua na ka e nanuma ni sa bau tu vua.”#Maciu 25.29; Luke 19.26

Na Tina i Jisu kei Iratou na Tacina

(Maciu 12.46-50; Mari 3.31-35)

19E ratou sa qai lako vei Jisu o tinana kei iratou na tacina, ka ratou a sega ni yaco rawa vua ena vukudra na lewe vuqa. 20Sa mani tukuni yani vua, “E ratou tu e tautuba na tinamu kei iratou na tacimu, ka ratou via raici iko.”

21Ia sa qai kaya vei ira o koya, “O ira ga era rogoca na vosa ni Kalou ka cakava, sai ira oqo na tinaqu kei na taciqu.”

Sa Vakamaravutaka na Cava o Jisu

(Maciu 8.23-27; Mari 4.35-41)

22Ena dua na siga e ratou sa qai vodoka e dua na waqa o Jisu kei iratou na nona tisaipeli. A sa kaya vei iratou, “Tou lako mada ki tai kadua ni drano.” E ratou sa mani tekivu soko sara. 23Ia ni ratou sa soko tiko sa qai moce o koya. E a qai tabaka sobu mai e dua na bati ni cagi kaukauwa, ka sa tekivu luvu na nodratou waqa, ka sa vovoleka sara na leqa. 24E ratou sa qai la'ki vakayadrati koya sara, ka kaya, “Turaga, Turaga, e datou sa leqa!”

Sa qai tu cake o koya ka vunauca na cagi kei na biau cudrucudru; a rau sa mani mudu sara, ka mai lutu yani na maravu. 25Sa qai kaya vei iratou o koya, “Sa evei na nomudou vakabauta?”

Ia ratou sa rere ga ka kurabui ka veikayaka vakai iratou, “O cei beka oqo? Ni rau sa bau talairawarawa talega ki na nona i vakaro na cagi kei na wai!”

Sa Vakabula o Jisu na Tamata Curumi Tevoro

(Maciu 8.28-34; Mari 5.1-20)

26E ratou sa qai kele yani ki na nodra vanua na kai Katara ka toka veidonui kei Kalili. 27Ni sa sobu yani o Jisu ki vanua, e rau sa sota sara kei na dua na tamata mai na koro, ka curumi tevoro tu. Sa dede na nona sa sega voli ni dau vakaisulu, ka sega talega ni dau tiko e vale, ia sa dau tu voli ga ena i bulubulu. 28Ni sa raici Jisu, sa qai qoqolou mai, ka mai cuva sobu e matana, ka kaya ena domo levu, “Na cava o ni via cakava vei au, Jisu, na Luve ni Kalou Cecere Sara? Au vakamasuti kemuni mo ni kakua ni vakararawataki au!” 29Sa vosa vakaoqo ni a sa vakarota oti na yalo velavela o koya me lako tani mai vua na tamata o ya. Ni sa vaka vuqa sara me curumi koya; ka sa dau yadravi matua kina, ka dau vesu ena sinucodo kei na i vau kaukauwa, ia sa dau drutidrutilaka na kena i vesu ka kauti koya na tevoro ki na vanua lala.

30Sa qai tarogi koya o Jisu, “O cei na yacamu? Sa qai kaya o koya, “O Vavakoso,” ni ra sa curumi koya tu e lewe vuqa sara na tevoro. 31Era sa vakamasuti koya me kakua ni vakaroti ira me ra lako tani ki bulu.

32Ia era a kana voli ena dua na baba e dua na qele ni vuaka levu ka ra mani masuti koya me laivi ira me ra la'ki curumi ira na qele ni vuaka. Sa mani laivi ira sara o koya. 33Era sa qai lako tani mai vua na tamata o ya na tevoro ka la'ki curumi ira na vuaka. Era sa qai ciciva sobu na baba na qele ni vuaka ka ra sa la'ki luvu kece sara ena drano.

34Ia ni ra sa raica na i vakatawa ni vuaka na ka sa yaco, era sa qai dro, ka la'ki tukuna ki na koro kei na veiyasana ki vanua. 35Era sa qai lako yani na tamata me ra raica talega na ka sa yaco, ka ra sa mani yaco vei Jisu. Era sa raica na tamata sa lako tani oti mai vua na tevoro, ni sa dabe toka ena yava i Jisu, sa vakaisulu tu ka sa tu vinaka na nona vakasama; a sa yacovi ira na rere. 36O ira ka raica na ka oqo era sa qai tukuna vei ira na lako yani na i tovo ni nona vakabulai o koya ka a daucurumi tevoro. 37Era sa qai masuti koya o ira kecega na lewe ni yasana o Katara me lako tani mai vei ira, ni sa yacovi ira e dua na rere levu. Sa mani vodo ki waqa o Jisu me lesu tale. 38Sa qai vakamasuti koya o koya na tamata ka a lako tani mai vua na tevoro me bau tiko vata ga kei koya.

Ia sa mani vakatalai koya lesu ga yani ka kaya, 39“Lesu ga ki nomudou ka tukuna kina na ka sa cakava vei iko na Kalou.”

Sa mani lako sara o koya ka tukuna wavoki ena loma ni koro na ka sa cakava vua o Jisu.

Na Luve i Jairo Yalewa kei na Yalewa ka Tara na i Sulu i Jisu

(Maciu 9.18-26; Mari 5.21-43)

40Ni sa lesu mai o Jisu era sa tavaki koya na lewe vuqa, ni ra sa waraki koya kece tiko. 41Sa qai lako mai e dua na tamata, na yacana o Jairo, ka dua o koya na i liuliu ni valenilotu, sa mai cuva e yava i Jisu ka masuti koya me lako mada ki na nona vale, 42ka ni duabau ga na luvena yalewa, ka sa yabaki tinikarua toka, ia sa voleka sara tiko ni mate.

Ni sa lako voli o Jisu, era sa drigiti koya na tamata mai na veiyasana kecega. 43A sa tiko ena kedra maliwa e dua na yalewa sa tauvi turudrabalavu tu me yabaki tinikarua, ka sa sega ni dua e vakabulai koya rawa. 44Sa qai lako yani ena daku i Jisu o koya, ka tara na tutu ni nona i sulu, ka sa mani mudu vakasauri na nona turudra. 45Sa qai kaya o Jisu, “O cei sa tarai au?”

Ia ni ra sa kaya kecega ni ra sega ni kila, sa qai kaya o Pita, “Turaga, era sa osoti kemuni ka drigiti kemuni na lewe vuqa!”

46Ia sa kaya ga o Jisu, “E dua sa tarai au, ni'u kila ni sa lako tani mai vei au na kaukauwa.” 47Ni sa kila na yalewa ni sa sega ni vuni rawa tale, sa qai lako sautaninini yani; a sa cuva e matana, ka tusanaka e matadra na tamata kecega na vuna e tarai koya kina, kei na nona vakabulai vakasauri. 48Sa qai kaya vua o Jisu, “Na luvequ, sa vakabulai iko na nomu vakabauta; mo lako ena vakacegu.”

49Ni se vosa tikoga, sa lako mai e dua na tamata mai na nona vale na i liuliu ni valenilotu, ka kaya, “Sa mate na luvemuni, ni kakua ni vakaoga tale na i Vakavuvuli.”

50Ni sa rogoci koya o Jisu, sa qai kaya vei Jairo, “Kakua ni yalolailai. Mo vakabauta ga, ena qai vakabulai o koya.”

51Ia ni sa yaco yani ki vale o koya, sa sega ni vakatara e dua tale me curu ki loma, o Pita ga, kei Joni kei Jemesa, kei rau na tama kei na tina ni gone. 52Era sa tagicaki koya kecega ka tagi lagalaga; ia sa qai kaya o Jisu, “Ni kakua ni tagi; sa sega ni mate na gone, ia sa moce voli ga!.”

53Era sa qai dredrevaki koya, ni ra kila ni sa mate na goneyalewa. 54Ia ni sa taura na ligana o Jisu, sa qai kaci ka kaya, “Lewa, mo duri cake!” 55Sa qai lesu tale vua na yalona, ka sa duri cake sara, ka sa vakarota o Jisu me soli vua e dua na ka me kania. 56E rau a kurabui vakalevu sara na nona qase; ia sa vakaroti ira ga o koya me ra kakua ni tukuna vua e dua na tamata na ka sa qai yaco.

Currently Selected:

Luke 8: FNVDC12

Highlight

Copy