Luke 7

Sa Vakabula o Jisu na Nona Tamata na Turaganivalu ni Roma

(Maciu 8.5-13)

1Ia ni sa tinia o Jisu na nona vosa vei ira na lewe vuqa, sa qai curu ki Kapenaumi. 2E tiko kina e dua na turaganivalu ka tauvimate tu e dua na nona bobula, ka dau lomana vakalevu, ka sa voleka koto ni ciba. 3Ni sa rogoca na i tukutuku kei Jisu, sa qai tala vua eso na nodra qase na Jiu me ra kerei koya me lako mai ka vakabula na nona tamata. 4Ia ni ra sa yaco vei Jisu, era sa vakamasuti koya vagumatua, ka kaya, “Na tamata oqo sa ganiti koya vakaidina na nomuni veivuke. 5Sa dau lomani ira na noda tamata o koya, ka sa tara oti talega e dua na neimami valenilotu.”

6Sa qai lako vata kei ira o Jisu. Ni ratou sa voleka yani ki na vale o ya, a sa tala mai eso na nona i tokani na turaganivalu me ra kaya vua, “Turaga, ni kakua ni vakaocai kemuni, ni sa sega ni ganiti kemuni mo ni curu mai ki na noqu vale, 7ka sa sega talega ni ganita na i tuvaki ni noqu bula druka me'u lako yani vei kemuni. Ia ni cavuta ga na vosa, ena vakabulai kina na noqu tamata. 8Ka ni oi au talega au tu ena ruku ni nodra lewa era liu, ka ra vakarorogo tu vei au na sotia eso. Au kaya vua e dua, ‘Mo lako!’ ka sa lako sara; ki vua tale e dua, ‘Lako mai!’ ka sa lako mai; ki vua na noqu bobula, ‘Kitaka oqo!’ ka sa kitaka.”

9Ni sa rogoca na veika oqo o Jisu, a sa kurabuitaka, ka sa qai vuki vei ira na lewe vuqa era muri koya tiko, ka kaya, “Au sa tukuna vei kemuni, au se sega mada ni bau raica e dua na vakabauta levu vakaoqo, e sega sara tale mada ga e Isireli!”

10Ia ni ra sa lesu tale ki vale o ira era a talai, era sa kunea ni sa bula vinaka tale na bobula koya.

Sa Vakabula Tale o Jisu e Dua na Luve ni Yada

11Ni oti o ya, sa qai lako yani o Jisu ki na dua na koro ka yacana o Neini. Era a salavata kei koya o iratou na nona tisaipeli kei ira e lewe vuqa sara na tamata. 12Ena gauna e yaco yani kina ki na matamata ni koro, raica, sa dua na i lakolako ni veibulu sa gole yani ki na i bili ni koro. Na tamata ka sa mate oqo e sega ni dua na tuakana se tacina, ka sa yada tu ena gauna o ya o tinana. Era lewe vuqa na lewe ni koro era sa lako vata tiko yani kei na vada. 13Ia ni sa raici koya na Turaga, a sa lomana vakalevu, ka kaya vua, “Kakua ni tagi.” 14A sa qai lako yani o koya ka tara na kisinimate, ka ratou mani tu vakadua o iratou ka colata tiko. Sa qai kaya o Jisu, “I cauravou! Au sa tukuna vei iko oqo, mo duri mai!” 15Sa qai duri cake na tamata ka sa mate, ka vakatekivu me vosa, ka sa soli koya lesu vei tinana o Jisu.

16A sa tuburi ira kecega na rere ka ra vakalagilagia na Kalou ka kaya, “Sa tubu cake oqo ena keda maliwa e dua na parofita levu, ka sa mai sikovi ira na nona tamata na Kalou!”

17A sa robota na vanua taucoko o Jutia kei na veiyasana kecega e vakavolivolita na kena i rogorogo.

O Ira ka Talai mai vei Joni na Dauveipapitaisotaki

(Maciu 11.2-19)

18Era sa qai vakatakila vei Joni na ka kecega oqo o ira na nona tisaipeli. 19Sa qai kacivi rau e lewe rua na nona tisaipeli o Joni ka talai rau vei Jisu me rau la'ki kaya, “Sa i kemuni beka o koya me lako mai, se me keitou waraka e dua tale?”

20Ni rau sa yaco vua, e rau sa kaya, “E talai keirau mai o Joni na Dauveipapitaisotaki, ka kaya, ‘Sa i kemuni beka o koya me na lako mai, se me keitou waraka e dua tani tale?’ ”

21Ena gauna o ya, sa vakabulai ira kina o koya e lewe vuqa mai na kedra mate eso, kei na rarawa, kei na yalo velavela eso, ka dolava na matadra e lewe vuqa na mataboko me ra rai rawa kina. 22Sa qai sauma o Jisu ka kaya vei rau, “Drau lako ka tukuna vei Joni na ka drau sa raica ka rogoca: era sa rai na mataboko, era sa lako na lokiloki, era sa vakabulai na vukavuka, ka ra sa rogo na didivara; era sa vakaturi cake tale na mate, ka sa vunautaki na i Tukutuku Vinaka vei ira na dravudravua.#Aisea 35.5,6; Aisea 61.1 23Era sa kalougata o ira sa dei tu ga na nodra vakabauta!”

24Ni rau sa lako tale oi rau ka a tala mai o Joni, sa qai tekivu vosa vei ira na lewe vuqa o Jisu me baleti Joni, ka kaya, “Na cava beka o ni a lakova ki na loma ni vanua lala mo ni raica? Na gasau sa yavalati ena cagi? 25Ia na cava beka ga o ni a la'ki raica? Na tamata vakaisulu ena i sulu malumu? Raica, o ira era dau vakaisulu ena i sulu sau levu ka ra tiko vinaka ena veika ni bula oqo era dau tiko ga ena veivale vakatui. 26Ia na cava beka ga o ni a la'ki raica? E dua li na parofita? Io, au sa kaya vei kemudou, e dua ka sa levu cake mai na parofita. 27Sa i koya ga sa volai tu vakaoqo ena vukuna:

‘Raica, au sa tala na noqu dautukutuku me liu vei iko,

ena caramaka o koya na nomu sala e matamu.’#Mala 3.1

28Au sa kaya vei kemuni, vei ira kece era a sucu mai na yalewa e sega ni dua me uasivi cake mai vei Joni; ia o koya e lailai duadua ena matanitu ni Kalou e uasivi cake vua.”

29Ni ra sa rogoca oqo o ira na tamata kece kei ira na daukumuni i vakacavacava, era sa qai kaya ni sa dodonu ga na Kalou, ni sa papitaisotaki ira oti kina o Joni.#Maciu 21.32; Luke 3.12 30Ia o ira na Farisi kei ira talega na daunilawa era cata na i naki ni Kalou me baleti ira, ka ra mani sega ni papitaisotaki kina mai vua.

31Sa qai kaya o Jisu, “Na cava beka me'u vakatautauvatataki ira kina na tamata ena i tabatamata oqo; era tautauvata beka kei na cava? 32Era sa vakataki ira na gone era tiko voli ena makete ka ra veikaciyaki ka kaya,

‘Keitou a uvu i vakatagi vei kemudou, ia dou a sega ni meke.

Keitou a qoqolou ena rarawa, ia dou a sega ni tagi.’

33Ni sa lako oti mai o Joni na Dauveipapitaisotaki ka sega ni kana madrai se gunu waini, o ni qai kaya, ‘E tiko vua e dua na tevoro.’ 34Sa lako oti mai na Luve ni Tamata ka dau kana ka gunu, ia o ni a kaya, ‘Raica na tamata dau kana ka dau gunu waini ka nodra i tokani na dau kumuni i vakacavacava kei ira na tamata i valavala ca!’ 35Ia na vuku ni Kalou sa laurai na kena dina vei ira kece era sa ciqoma.”

O Jisu ena Vale i Saimoni na Farisi

36Sa qai sureti Jisu e dua vei ira na Farisi me rau la'ki kana vata. Sa mani lako ki na vale ni Farisi koya, ka tiko sobu me kana. 37Ia e tiko ena koro o ya e dua na yalewa i valavala ca; ni sa kila o koya ni sa kana tiko o Jisu ena vale ni Farisi, sa qai kauta kina e dua na tavaya waiwai,#Maciu 26.7; Mari 14.3; Joni 12.3 38ka la'ki tucake tu e dakuna vaka ki yavana, ka sa tagi tiko. Sa qai tekivu me vakasuasuataka na yava i Jisu ena wai ni matana, ka quwa ena drauniuluna; sa qai reguregulaka na yavana, ka lumuta ena waiwai. 39Ia ni sa raica na Farisi ka a sureti Jisu sa kaya e lomana, “Ke parofita na tamata oqo, ke kila se o cei, ka yalewa vakacava talega o koya ka tarai koya tiko oqo; ni sa yalewa i valavala ca o koya.”

40Sa qai vosa o Jisu, ka kaya vua, “Saimoni, e dua na ka au via kaya vei iko.”

Sa qai kaya o koya, “Vakavuvuli, mo tukuna ga mai.”

41“E dua na tamata e rau dinau tu vua e lewe rua; e dua e dinautaka tu e lima na drau na tiki ni siliva, ka dua vei rau e limasagavulu. 42Ni rau sa sega ni sauma rawa, sa qai bokoca wale vei rau ruarua o koya. O cei mada vei rau ena lomani koya vakalevu cake?”

43Sa qai sauma o Saimoni, “Au nanuma ni sai koya ga e levu cake na ka e bokoci vua.”

Sa qai kaya vua o koya, “O sa vakataulewa vakadodonu.” 44Sa qai vuki vua na yalewa, ka mani kaya vei Saimoni, “O sa raica na yalewa oqo ne? Au a curu mai ki na nomu vale, ka sega na wai o solia me vui kina na yavaqu, ia sa vakasuasuataka na yavaqu o koya ena wai ni matana ka quwaraka ena drauniuluna. 45O a sega ni bau reguci au, ia mai na noqu yaco mai ki ke, a sa sega ni mudu na nona reguca tiko na yavaqu. 46O a sega ni bau lumuta na uluqu ena waiwai olive, ia sa lumuta o koya na yavaqu ena i lumu sau levu. 47O koya oqo au sa kaya kina vei iko, na loloma levu sa vakaraitaka oqo o koya sai vakadinadina ni sa vosoti na nona i valavala ca e vuqa. Ia o koya yadua sa vosoti ga vakalailai sa loloma talega vakalailai.”

48Sa qai kaya o koya vua na yalewa, “Sa bokoci na nomu i valavala ca.”

49Ia o ira era kana vata kaya tiko era veikayaka vakai ira, “O cei beka oqo me bokoca rawa talega na i valavala ca?”

50Sa qai kaya o Jisu vua na yalewa, “Sa vakabulai iko na nomu vakabauta; mo lako ga ena vakacegu.”

Currently Selected:

Luke 7: FNVDC12

Highlight

Copy