Luke 6

Na Taro me Baleta na Siga ni Vakacecegu

(Maciu 12.1-8; Mari 2.23-28)

1Ena dua na Siga ni Vakacecegu, a sa lako voli o Jisu ena dua na veiloga ni sila. E ratou sa qai tekivu doloka eso na sola ni sila na nona tisaipeli, ka qilia e ligadratou, ka kania.#Vrua 23.25 2Era sa qai taroga eso na Farisi, “A cava dou sa cakava kina na ka e sa tukuna na neimami Lawa ni sega ni dodonu me vakayacori ena Siga ni Vakacecegu?”

3A sa qai sauma vei ira o Jisu vakaoqo, “O ni a sega beka ni wilika na ka sa cakava o Tevita ni sa viakana o koya kei iratou na nona tamata? 4E a curu o koya ki na vale ni Kalou, ka taura ka kania na madrai tabu (na ka e sega ni vakatarai me kania e dua, ka sega ni bete), ka solia talega vei ira era lako vata tiko.#Vsoro 24.9 #1Samu 21.1-6

5Sa qai kaya tale vei ira o Jisu, “Na Luve ni Tamata sai koya na Turaga ni Siga ni Vakacecegu.”

Na Tamata Liga Mate

(Maciu 12.9-14; Mari 3.1-6)

6Ena dua tale na Siga ni Vakacecegu sa curu ki na valenilotu o Jisu ka vakatavuvuli kina. E a tiko kina e dua na tamata sa mate tu na ligana i matau. 7Era sa qai vakaraici koya na daunilawa kei ira na Farisi, se na veivakabulai ena Siga ni Vakacecegu se sega, me rawa ni ra kunea kina e dua na ka me ra beitaki koya kina. 8Ia sa kila na nodra vakanananu o Jisu, sa qai kaya vua na tamata liga mate, “Tu cake, mai tucake tu e lomadonu eke.” Sa qai duri cake o koya ka la'ki tucake tu e kea. 9Sa qai kaya vei ira o Jisu, “Au tarogi kemuni mada: sa tara beka me caka na ka vinaka ena Siga ni Vakacecegu se na ka ca, na veivakabulai se na veivakamatei?” 10Sa qai vakawadravi ira wavoki kecega o koya, ka kaya vua na tamata tauvimate, “Dodoka mai na ligamu.” A sa kitaka vakakina o koya, ka sa vakabulai sara na ligana.

11Era sa qai cudru vakalevu sara, ka ra veivosaki vakai ira se cava me ra cakava vei Jisu.

Sa Digitaki Iratou na i Apositolo e Tinikarua o Jisu

(Maciu 10.1-4; Mari 3.13-19)

12Ena gauna o ya, a sa lako cake o Jisu ki na ulunivanua me la'ki masu, ka a masu tiko vua na Kalou ena bogi taucoko. 13Ni sa siga na vanua, sa qai kacivi ira vata yani ki vua na nona tisaipeli, ka sa digitaka mai vei ira e lewe tinikarua, ka vakatokai iratou na i apositolo: 14o Saimoni (o koya ka sa vakayacana me o Pita) vata kei Adriu na tacina; o Jemesa kei Joni, o Filipe kei Pacolomiu, 15o Maciu kei Tomasi, o Jemesa na luve i Alifio, kei Saimoni (sa vakatokai na Gugumatua), 16kei Jutasa na luve i Jemesa, kei Jutasa Isikarioti, o koya ka a qai bukiveretaki koya.

Sa Veivakatavulici ka Veivakabulai o Jisu

(Maciu 4.23-25)

17Sa qai lako vata sobu o Jisu kei iratou na nona apositolo kei na dua na i wase levu ni nona tisaipeli; ka la'ki tu ena dua na vanua buca. Era a lewe vuqa sara na tamata mai Jutia taucoko kei Jerusalemi, kei na baravi kei Taia kei Saitoni era lako yani kina me ra rogoci koya, ka vakabulai talega mai na kedra mate. 18O ira talega era dau vakaleqai mai vei ira na yalo velavela era sa vakabulai. 19Era a saga kecega na lewe vuqa me ra tarai koya, ka ni sa taka tiko mai vua na kaukauwa mana ka ra sa vakabulai kece kina.

Na Kalougata kei na Kalouca

(Maciu 5.1-12)

20Sa qai vakaraici iratou na nona tisaipeli o Jisu ka kaya:

“Dou sa kalougata, oi kemudou sa dravudravua;

Ni sa nomudou na matanitu ni Kalou!

21Dou sa kalougata, oi kemudou sa viakana edaidai;

Ni dou na vakamamautaki!

Dou sa kalougata, oi kemudou sa tagi edaidai,

Ni dou na dredre!

22“Dou sa kalougata ni ra sa cati kemudou na tamata, ni ra wasei kemudou tani mai na nodra i soqosoqo, ka vakasewasewani kemudou, ka vakarogocataka na yacamudou ena vuku ni Luve ni Tamata!#1Pita 4.14 23Dou reki ni sa yaco na veika o ya, ka meke ena marau, baleta ni sa ka levu na kena i sau vei kemuni mai lomalagi; ni ra a kitaka vakakina na nodra qase vei ira na parofita.#2Vei 36.16; Caka 7.52

24“Ia dou na kalouca oi kemudou sa vutuniyau edaidai;

ni dou sa tovolea oti na bula e rawarawa!

25“Dou na kalouca oi kemudou sa mamau tu edaidai;

ni dou na qai viakana mai!

Dou na kalouca oi kemudou sa dredre tiko edaidai;

ni dou na qai rarawa ka tagi!

26“Dou na kalouca oi kemudou sa ciqoma rawa oqo na vosa vinaka; o ira na nodra qase era a kitaka vakakina me baleti ira na parofita vakailasu.

Na Nodra Lomani na Meca

(Maciu 5.38-48; 7.12a)

27“Ia au sa kaya vei kemuni na vakarorogo tiko, lomani ira na nomuni meca, caka vinaka vei ira sa cati kemuni; 28vosa vinaka vei ira era vosacataki kemuni, ka masulaki ira era vakasosataki kemuni. 29Ni sa sabica na balumu e dua, vagolea talega vua na kena i karua, ka kakua ni bureitaka na nomu sote vei koya sa kauta tani na nomu kote. 30Mo solia vei ira kece era mai kerekere vei iko na ka era vinakata, ka kakua ni taroga tale na nomu i yau vei koya sa kauta tani. 31Mo ni kitaka vei ira na tamata me vaka na ka o ni sa vinakata me ra kitaka vei kemuni na tamata.#Tb 4.15; Maciu 7.12

32“Ia kevaka o ni dau lomani ira ga era lomani kemuni, a cava mo ni vakalougatataki kina? Ni o ira sara tale mada ga na tamata i valavala ca era dau kitaka vakakina. 33Ia kevaka o ni caka vinaka vei ira ga era caka vinaka vei kemuni, a cava mo ni vakalougatataki kina? Ni ra sa dau kitaka talega vakakina na tamata i valavala ca. 34Kevaka o ni dau soli i lavo vei ira ga o ni nuitaka ni o ni na rawata tale mai kina na i lavo, a cava mo dou vakalougatataki kina? O ira talega na tamata i valavala ca era dau veisolisoli vakai ira me ra na qai taura lesu tale na ka e tautauvata kei na ka era a solia. 35Ia mo ni dau lomani ira na nomuni meca, ka caka vinaka ga, ka dau solia na ka, ka sega ni namaka e dua na ka mo ni rawata tale mai kina; ena qai levu kina na kena i sau vei kemuni, ka mo ni na qai luve i Koya sa Cecere Sara; ni sa dau lomasoli o koya vei ira era sega ni dau vakavinavinaka, kei ira era dau nanumi ira ga vakai ira.#Sr 4.10,11 36Mo ni dau yalololoma me vaka sa dau yalololoma na Tamamudou.

Na Vakalewai Ira na Tani

(Maciu 7.1-5)

37“Mo ni kakua ni dau veivakalewai, ena qai sega ni lewai kemuni na Kalou; mo ni kakua ni dau veibeitaki, ena qai sega ni beitaki kemuni na Kalou; mo ni dau veivosoti, ka na qai vosoti kemuni na Kalou. 38Mo ni dau solisoli, ena qai solia ga vei kemuni na Kalou. Sa dina sara ni o ni na ciqoma na nomuni i votavota sa sinai vutuvutu, e dua na ka ni veivuke loloma sa sovaraki ki na ligamuni — na kena levu ga o ni rawa ni taura. Na i vakarau o ni dau vakayagataka vei ira na tani sai koya na i vakarau vata ga ena vakayagataka vei kemuni na Kalou.”

39Sa qai cavuta vei ira e dua na vosa vakatautauvata ka kaya: “E rawa li vua na mataboko me tubera na mataboko? E rau na sega beka ni lutu ruarua ki na i keli?#Maciu 15.14 40E sega ni dua na tisaipeli me uasivi cake vua na nona qasenivuli, ia o koya yadua sa vakaotia vakavinaka na nona vuli sa na qai tautauvata kei na nona qasenivuli.#Maciu 10.24,25; Joni 13.16; 15.20

41“Na cava o raica ga kina na mala ni kau ena mata ni wekamu ka sega ni raica rawa na tolo ni kau e tiko e matamu? 42Se o na kaya rawa vakacava vua na wekamu, ‘Na wekaqu, me'u leuta tani mada na mala ni kau e tiko e matamu,’ ia o iko o sega tiko mada ga ni raica na tolo ni kau ka tiko ga e matamu? Tamata dauveivakaisini, mo biuta tani mada na tolo ni kau mai na matamu o na qai rai vinaka mo leuta tani kina na mala ni kau ena matai na wekamu.

Na Kau kei na Vuana

(Maciu 7.16-20; 12.33-35)

43“Ni sa sega ni dua na kau vinaka me vuataka na vua ca, se na kau ca me vuataka na vua vinaka. 44Ni sa kilai ga na kau yadua ena vuana. E sega ni dau veti na lolo mai na wa vakavotona, se veti na qerepi mai na soni.#Maciu 12.33 45Sa dau kauta mai na ka vinaka na tamata vinaka mai na lololo vinaka ni lomana, ka dau kauta mai na ka ca na tamata ca mai na lololo ca ni lomana; ni sa dau vosataka na gusuna na ka sa sinai kina na lomana.#Maciu 12.34

E Rua na Dautara Vale

(Maciu 7.24-27)

46“Na cava o ni vakatokai au kina me, ‘Turaga, Turaga,’ ka sega ni muria na noqu vosa? 47O koya yadua e lako mai vei au ka rogoca na noqu vosa ka cakava, au na vakaraitaka vei kemuni na tamata e rau tautauvata kaya. 48Sa tautauvata o koya kei na dua na tamata, ni sa tara na nona vale, a sa kelikeli vakatitobu ka vakayavutaka na vale ena dela ni vatu. Sa qai yaco mai na waluvu, ka sa coka vakaukauwa na dobui ka tabaka ena vale o ya, ia sa sega ga ni yavalati rawa ni sa tara tu vakavinaka. 49Ia o koya sa rogoca ka sega ni cakava sa tautauvata kei na tamata sa tara e dua na nona vale ka qai sega ni cakava na yavu ni vale. Ni sa sotava na waluvu na vale o ya, sa qai bale sara kina, ka sa ka levu na rusa ni vale o ya!”

Currently Selected:

Luke 6: FNVDC12

Highlight

Copy