Luke 5

Sa Kacivi Iratou na i Matai ni Tisaipeli o Jisu

(Maciu 4.18-22; Mari 1.16-20)

1Ena dua na gauna ni a tucake tu o Jisu ena bati ni Drano o Kenisereti, era sa drigiti koya yani na tamata me ra rogoca na vosa ni Kalou.#Maciu 13.1,2; Mari 3.9,10; 4.1 2Sa qai raica o koya e rua na waqa ni rau kele volekata toka na bati ni drano; a ratou sa sega ni tiko kina na kena gonedau ni ratou se la'ki savata na nodratou lawa. 3Sa mani vodoka e dua vei rau na waqa o Jisu, o ya na waqa nei Saimoni, ka kerei koya me tosoya yani vakalailai ki wai. Sa qai dabe sobu o Jisu ena loma ni waqa ka vakatavulici ira na lewe vuqa.

4Ni sa tinia na nona vosa, sa qai kaya vei Saimoni, “Tosoya tale yani na waqa ki na wai titobu, ka dou vakasobura na nomudou lawa me rawa eso na ika.”

5Sa qai kaya vua o Saimoni, “Turaga, keitou a sasaga voli ena bogi taucoko me yacova na mataka, ka sa segai na ka e rawa! Ia ena vuku ga ni nomuni vosa, au sa na vakasobura kina na lawa.”#Joni 21.3 6A ratou sa qai vakasobura na lawa ka sa levu sara na ika e ratou tagava rawa mai; ka sa voleka sara ni bote na nodratou lawa.#Joni 21.6 7E ratou sa qai yalovi iratou na nodratou i tokani ena waqa kadua me ratou la'ki vukei iratou. A ratou sa qai lako mai ka vakasinaita na waqa ruarua me yacova ni rau sa voleka ni luvu. 8Ia ni sa raica o Saimoni Pita na ka oqo, a sa tekiduru sobu ena mata i Jisu, ka kaya, “Turaga, mo ni lako tani vei au! O au oqo e dua na tamata i valavala ca!”

9Ni sa kurabui o koya kei iratou kece e ratou tiko vata kaya, ena vuku ni qele ni ika vakaitamera e ratou sa rawata. 10Sa vaka talega kina vei Jemesa kei Joni, oi rau na luve i Sepeti, ka rau i tokani i Saimoni. A sa kaya o Jisu vei Saimoni, “Kakua ni rere, me tekivu oqo o sa na dau qolivi ira na tamata.”

11Ia ni ratou sa kauta rawa ga na waqa ruarua ki vanua, e ratou sa biuta sara na ka kecega ka muri koya.

Sa Vakasavasavataka o Jisu e Dua na Vukavuka

(Maciu 8.1-4; Mari 1.40-45)

12Ena dua na gauna sa tiko voli o Jisu ena dua na koro; sa tiko talega e kea e dua na tamata e robota tu na yagona na vukavuka. Ni sa raici Jisu o koya, sa qai cuva vakatoboicu ka masuti koya, ka kaya, “Turaga, kevaka o ni sa vinakata, sa rawa mo ni vakasavasavataki au!”

13Sa qai dodoka na ligana o Jisu ka tarai koya, ka kaya, “Au sa vinakata! Mo savasava mai!” Sa mani takali sara mai vua na vukavuka. 14Sa qai vakarota vua o koya me kakua ni tukuna vua e dua, “ia mo la'ki vakaraitaki iko ga vua na bete, ka vakacabora na nomu i soro mo vakasavasavataki kina, me vaka e vakarota o Mosese, me i vakadinadina vei ira na tamata.”#Vsoro 14.1-32

15Ia sa qai kuruvaki vakalevu sara kina na kena i rogorogo, ka ra lewe vuqa sara era soqo vata vua me ra vakarogoci koya, ka vakabulai talega mai na kedra mate. 16Sa dau lako o koya ki na vanua lala, ka masu kina.

Sa Vakabula o Jisu e Dua na Tamata Paralasi

(Maciu 9.1-8; Mari 2.1-12)

17Ena dua na siga ni a vakatavuvuli tiko o Jisu, era a dabe tale tikoga kina eso na Farisi kei na qasenivuli ni lawa, ka ra cavutu mai na veikoro kece mai Kalili kei Jutia kei Jerusalemi. A sa tu vua na kaukauwa ni Turaga me veivakabulai kina. 18E ratou sa qai lako yani eso na tamata, ka ratou colata tiko yani ena i mocemoce e dua na tamata tauvi paralasi. E ratou a saga me ratou kauti koya sara ki loma, ka vakadavora ena mata i Jisu. 19Eratou a sega ni qai kunea rawa e dua na sala ki loma ena vuku ni lewe levu ni tamata. Eratou sa qai kauti koya cake ki na dela ni vale, ka cakava e dua na qara ena lomadonu ni delavuvu ni vale, ka qai vakalutulututaka sobu kina vakamalua na tauvimate kei na nona i mocemoce, ka tauca ena mata i Jisu. 20Ni sa raica na nodratou vakabauta o Jisu, sa qai kaya vua, “Na wekaqu, sa bokoci na nomu i valavala ca.”

21Era a tekivu vaqaqa e lomadra o ira na daunilawa kei ira na Farisi ka ra kaya, ‘O cei e mai vosa vakacacataka tiko oqo na Kalou? E sega tale ni dua e rawa ni bokoca na i valavala ca, na Kalou duadua ga!”

22Ia ni sa kila o Jisu na nodra vakanananu, sa qai sauma, ka kaya vei ira, “Na cava o ni vaqaqa tiko kina e lomamuni na ka oqo? 23E vei e rawarawa cake, me kainaki, ‘Sa bokoci na nomu i valavala ca,’ se me tukuni, ‘Tu cake, ka lako’? 24Ia mo ni kila rawa kina ni sa tu na kaukauwa vua na Luve ni Tamata e vuravura me bokoca na i valavala ca.” Sa qai kaya o koya vua e tauvi paralasi, “Au sa kaya vei iko, tucake taura na nomu i mocemoce, ka lako ki nomudou.”

25E a tucake sara o koya e matadra, ka taura na ka sa davo koto kina, ka lako sara ki na nona vale, ka vakalagilagia tiko na Kalou. 26Era sa qoroqoro kecega, ka ra vakalagilagia na Kalou; ka sa curumi ira talega na rere ka ra kaya, “Sa veivakurabuitaki dina na ka eda raica edaidai!”

Sa Kacivi Livai o Jisu

(Maciu 9.9-13; Mari 2.13-17)

27Ni oti o ya, a sa lako sara o Jisu ka kunea e dua na daukumuni i vakacavacava, na yacana o Livai. A dabe toka o koya ena vale ni kumuni i vakacavacava, ka sa kaya vua o Jisu, “Muri au mai!” 28Sa qai duri cake o Livai, ka biuta na nona veika kecega, ka muri koya.

29Sa qai cakava e dua na magiti levu o Livai ena nona vale, ka ra lewe vuqa na daukumuni i vakacavacava kei ira tale eso era tiko kina me ra kana. 30Ia era sa qai vosa kudrukudrutaki iratou na tisaipeli o ira na Farisi kei ira na nodra daunilawa, ka ra kaya, “A cava o dou sa kana ka gunu vata kina kei ira na daukumuni i vakacavacava kei ira na tamata i valavala ca?”#Luke 15.1,2

31Sa qai sauma o Jisu ka kaya vei ira, “Sa sega ni yaga na vuniwai vei ira na bula vinaka, vei ira ga era tauvimate. 32Au sa sega ni lako mai me'u kacivi ira na tamata dokai me ra veivutuni, ia vei ira ga sa biliraki sobu na nodra bula.”

Na Taro me Baleta na Lolo

(Maciu 9.14-17; Mari 2.18-22)

33Era sa qai kaya vei Jisu eso na tamata, “Era dau lolo ka masu vakavuqa o ira na tisaipeli i Joni, kei na nodra tisaipeli talega na Farisi, ia na nomuni e ratou dau kana ga ka gunu.”

34Sa qai kaya o Jisu vei ira, “E rawa li mo dou lewa me ra lolo na weka ni tagane vou ena gauna e tiko voli kina kei ira na tagane vou? 35Ia ena yaco mai na gauna ena kau tani kina mai vei ira na tagane vou, era na qai lolo ena gauna o ya.”

36Sa qai tukuna tale vei ira e dua na vosa vakatautauvata: “E sega ni dua e dresuka mai e dua na tikina mai na i sulu vou me mai botana kina e dua na i sulu madra; ke caka vakakina, ena kadresu walega na ka vou, ka na sega ni rau sota na tikina vou kei na ka makawa. 37E sega talega ni dua me vakataloca na waini vou ki na bolaniwaini makawa; kevaka e sa kitaka vakakina, ena vakacabotetaka na bolaniwaini vou, ka na tasova na waini, ka na vakacacana talega na kena bola kuli-ni-manumanu. 38Ia sa dodonu ga me vakataloci na waini vou ki na bolaniwaini vou. 39Sa sega ni dua na tamata ka sa gunuva oti na waini makawa me qai vinakata tale na waini vou. A sa kaya o koya, ‘Sa vinaka cake vei rau na waini makawa.”

Currently Selected:

Luke 5: FNVDC12

Highlight

Copy