Luke 3

Na Vunau i Joni na Dauveipapitaisotaki

(Maciu 3.1-12; Mari 1.1-8; Joni 1.19-28)

1Ena i katinikalima ni yabaki sa veiliutaki tiko kina na tui (Sisa) o Tiperiu, a kovana tiko mai Jutia o Ponitio Pailato, ka i liuliu mai Kalili o Eroti, ka i liuliu mai Ituria kei na vanua o Tirakoniti o Filipe na tacina, ka i liuliu mai Apilini o Laisenia, 2donuya ni rau bete levu tiko o Anasa kei Kaiava, sa qai yaco na vosa ni Kalou vei Joni na luve i Sakaraia ena vanua lala. 3Sa qai lako o koya ki na veivanua taucoko e tiko volekata na Joritani, ka vunautaka voli me ra papitaiso o ira sa veivutuni me bokoci kina na i valavala ca, 4me vaka sa volai tu ena i vola i Aisea na parofita,#Aisea 40.3-5 (LXX)

“Na domona e dua sa kacikaci voli ena loma ni vanua lala:

Ni caramaka na sala ni Turaga,

Cakava me dodonu na nona gaunisala.

5Ena buluti me cere i cake na buca kecega,

Ka na talaraki sobu na veiulunivanua kei na veidelana kecega.

Ka na vakadodonutaki na veika veve,

Ka na vakalogalogavinakataki na veisala sukusukura;

6Era na raica talega na veivakabulai ni Kalou na tamata kecega.”

7Sa qai kaya kina o Joni vei ira na lewe vuqa ka ra lako yani me papitaisotaki ira o koya, “Oi kemuni na kawa ni gata, o cei sa qai vakasalataki kemuni mo ni dro tani mai na cudru sa bera tiko mai?#Maciu 12.34; 23.33 8Ni vakaraitaka na nomuni veivutuni, ena nomuni cakacaka ka kakua ni tekivu mo ni veikayaka vakai kemuni, ‘Na tama i keimami o Epara-ama.’ Ni'u sa kaya vei kemuni, sa rawa vua na Kalou me vakatubura na luve i Epara-ama mai na veivatu oqo.#Joni 8.33 9Sa toka sara ga oqo na matau ena veivunikau; ka sa tatalaki sobu tiko kina na kau kecega era sega ni vuataka na vua vinaka, ka ra biu ki na bukawaqa.”#Maciu 7.19

10Era sa qai tarogi koya na lewe vuqa ka kaya, “Ia na cava me keimami cakava?”

11Sa qai sauma ka kaya vei ira, “O koya e rua na nona sote me solia e dua vua e sega na nona; o koya e tu vua na kakana me kitaka vaka talega kina.”

12Era sa qai lako talega yani na daukumuna na i vakacavacava me ra papitaisotaki, ka ra kaya vua, “Na i Vakavuvuli, na cava me keimami cakava?”#Luke 7.29

13Sa qai kaya vei ira o koya, “Ni kakua ni taura na ka e levu cake mai na ka e vakaroti vei kemuni.”

14O ira talega na sotia era sa tarogi koya, ka kaya, “Na cava me keimami cakava?”

Sa qai kaya vei ira o koya, “Ni kakua ni taura vakaukauwa na i lavo mai vua e dua na tamata se beitaki koya vakailasu. Ni kakua talega ni didivaka na kemuni i sau.”

15A sa tekivu me tubu cake na nodra vakanuinui na tamata, ka tekivu me ra vakataroga e lomadra de sai koya li na Mesaia o Joni. 16Sa qai vosa kina o Joni ka kaya vei ira kecega, “Au sa papitaisotaki kemuni ena wai, ia sa lako tiko mai o koya e levu cake vei keirau, ka sega mada ga ni rauti au me'u sereka na wa ni nona i vava. Ena papitaisotaki kemuni o koya ena Yalo Tabu kei na buka. 17Sa taura tu e ligana o koya na nona i sivi ni sila, me vakasavasavataka na sila ena nona rara ni qaqi sila ka binia vata mai na sila ki na nona lololo, ka na qai vakama na qana ena buka sa sega ni bokoci rawa.”

18A vunautaka na i Tukutuku Vinaka o Joni ena vuqa na sala, ka vakauqeti ira kina na tamata me ra veivutuni. 19Ia o Eroti, na i liuliu, o koya ka a vunauca o Joni ena vuku i Erotiasa na wati Filipe na tacina, kei na vuku ni veika ca kecega sa cakava oti o koya;#Maciu 14.3,4; Mari 6.17,18 20sa qai vakuria sara na nona ca ena nona biuti Joni ki na valeniveivesu.

Na Papitaisotaki i Jisu

(Maciu 3.13-17; Mari 1.9-11)

21Ni ra sa papitaisotaki na tamata, sa papitaisotaki talega o Jisu. Ia ni sa masu tiko o koya sa qai wase rua na lomalagi, 22ka sa lako sobu mai vua na Yalo Tabu, me vaka na ruve, ka sa rogo mai e dua na domo mai lomalagi, ka vaka, “Sa i iko na Luvequ lomani e duabau ga. Au sa dau vinakati iko vakalevu.”#Vteki 22.2; Same 2.7; Aisea 42.1; Maciu 3.17; Mari 1.11; Luke 9.35

Na i Tubutubu i Jisu

(Maciu 1.1-17)

23Ni sa tekivutaka na nona cakacaka o Jisu, sa yabaki tolusagavulu, ka a kainaki voli ni o koya e luve i Iosefo, na luve i Ili, 24na luve i Macati, na luve i Livai, na luve i Meliki, na luve i Janai, na luve i Iosefo, 25na luve i Mataceia, na luve i Emosi, na luve i Neumi, na luve i Esili, na luve i Nakai, 26na luve i Maaci, na luve i Mataceia, na luve i Semei, na luve i Iosefo, na luve i Juta, 27na luve i Joanani, na luve i Risa, na luve i Serupepeli, na luve i Salacieli, na luve i Niri, 28na luve i Meliki, na luve i Ati, na luve i Kosami, na luve i Elimotama, na luve i Eri, 29na luve i Josua, na luve i Iliesa, na luve i Jorima, na luve i Macati, na luve i Livai, 30na luve i Simione, na luve i Jutasa, na luve i Iosefo, na luve i Jonami, na luve i Elaiakimi, 31na luve i Melea, na luve i Menani, na luve i Mataca, na luve i Necani, na luve i Tevita, 32na luve i Jese, na luve i Opeti, na luve i Poasa, na luve i Salimoni, na luve i Nasoni, 33na luve i Amenatave, na luve i Atamini, na luve i Erami, na luve i Eseroma, na luve i Veresi, na luve i Juta, 34na luve i Jekope, na luve i Aisake, na luve i Epara-ama, na luve i Tera, na luve i Neori, 35na luve i Seruki, na luve i Rekau, na luve i Peleki, na luve i Eperi, na luve i Sela, 36na luve i Keinana, na luve i Arivakisati, na luve i Semi, na luve i Noa, na luve i Lemeki, 37na luve i Meciusela, na luve i Inoki, na luve i Jereti, na luve i Maleli, na luve i Kenana, 38na luve i Inosi, na luve i Seci, na luve i Atama, na luve ni Kalou.

Currently Selected:

Luke 3: FNVDC12

Highlight

Copy