Luke 2

Na Sucu i Jisu

(Maciu 1.18-25)

1Ena gauna o ya, a sa vakarota na tui (Sisa) o Akusito me caka e dua na wili lewenivanua ena matanitu taucoko vaka-Roma. 2Na i matai ni wili lewenivanua oqo sa vakayacori ena gauna e kovana tiko kina mai Siria o Kirinio. 3Era a dui lako kece na tamata ki na nodra koro me ra volai kina.

4A sa lako cake talega o Iosefo mai na koro o Nasareci e Kalili ki na koro o Peceliema e Jutia, na koro ni sucu nei Tevita na tui. A sa lako ki kea o Iosefo baleta ni sa kawa i Tevita o koya. 5E rau la'ki volai vata kei Maria, o koya ka sa musuki tu vua me watina, ka sa bukete tiko. 6Ena gauna e rau tiko kina mai Peceliema, a sa yaco mai na nona siga ni vakasucu. 7A sa vakasucuma na nona ulumatua gonetagane, ka sa viviraki vua na i sulu ni gone ka vakadavora ena nodra i kanakana na manumanu; ni sa sega na tiki ni bure ni vulagi e lala me ratou tiko kina.

O Iratou na i Vakatawa ni Sipi kei Ira na Agilosi

8E ratou a tiko voli ena vanua veico ena yasayasa o ya eso na i vakatawanisipi, ka ratou veivuke vakatawa sipi tiko ena bogi. 9Sa qai rairai vei iratou e dua na agilosi ni Turaga, ka cila vakavolivoliti iratou na i serau ni Turaga; ka ratou sa rere vakalevu sara kina.#Tb 5.4 10Sa qai kaya vei iratou na agilosi, “Dou kakua ni rere, dou rogoca mada, au sa kauta tiko mai vei kemudou e dua na i tukutuku vinaka, ka ra na reki vakalevu kina o ira kecega na tamata, 11ni sa sucu vei kemuni edaidai, ena koro i Tevita, na i Vakabula, o koya na Karisito, na Turaga! 12Oqo na kena i vakatakilakila vei kemudou: dou na kunea na gone ni sa viviraki tu vua na i sulu ni gone, ka davo koto ena nodra i kanakana na manumanu.”

13E ratou qai kidacala ni sa rairai vata mai kei na agilosi o ya e dua na i lala levu mai lomalagi, ka ra sa vakacaucautaka na Kalou vakaoqo,

14“Sa nona na Kalou na lagilagi ena veiyasana cecere sara,

Ka sa veisaututaki rawa e vuravura o ira sa vinakata o koya!”

15Ia ni ra sa biuti iratou na agilosi ka lesu tale i lomalagi, e ratou sa qai veitukunitaka vakai iratou na i vakatawanisipi, “Tou lako i Peceliema, ka la'ki raica na veika sa qai yaco oqo, me vaka sa vakaraitaka oti vei kedatou na Turaga.”

16E ratou sa mani lako vakatotolo sara yani, ka kunei Maria kei Iosefo kei na gone ni davo koto ena nodra i kanakana na manumanu. 17Ia ni ratou sa raici koya, e ratou sa qai tukuna na vosa sa tukuni vei iratou me baleta na gone o ya. 18Era sa kurabui kecega o ira era sa rogoca na veika e ratou tukuna o iratou na i vakatawanisipi. 19A taura matua sara na ka kecega o ya o Maria, ka vakananuma voli e lomana. 20E ratou sa mani lesu tale na i vakatawanisipi, ka ratou sa vakarokorokotaka, ka vakacaucautaka na Kalou ena vuku ni veika kecega e ratou a rogoca ka raica; era a yaco kece me vaka sa tukuni vei iratou.

Sa Vakayacani o Jisu

21Ni sa oti na bogi walu me qai cilivi kina na gone, sa mani vakatokai me yacana o Jisu, me vaka ga ka a vakatoka na agilosi ni sa bera ni kunekunetaki.#Vsoro 12.3; Luke 1.31

Sa Vakacabori o Jisu ena Valenisoro

22Ia ni sa oti na gauna ni vakasavasavataki i tinana me vaka e tu ena Lawa i Mosese, e rau sa qai kauta na gone ki Jerusalemi me rau vakacabori koya vua na Turaga. 23Me vaka ga e volai tu ena lawa ni Turaga, “Na gonetagane kecega e sucu ulumatua, era na vakatabui me ra nona na Turaga.”#Lako 13.2,12 24Ia, me rau vakacabora talega na i soro me vaka na ka e kaya na lawa ni Turaga o ya, “me rua na soqe, se rua na luve ni ruve.”#Vsoro 12.6-8

25Ia e tiko voli mai Jerusalemi ena gauna o ya e dua na tamata yalo dodonu ka lotu dina, a yacana o Simione. Sa bula ka waraka wale tu ga o koya na nodra vakacegui na Isireli, ka sa tiko vua na Yalo Tabu. 26A sa vakatakila oti vua na Yalo Tabu ni na raica rawa mada o koya na Mesaia sa yalataka na Turaga ni bera na nona mate. 27A sa vakauqeti koya na Yalo Tabu ka sa lako ki na Valenisoro. Ni rau sa kauta yani ki na Valenisoro na gone o Jisu oi rau na nona i tubutubu me qaravi vua na valavala ni Lawa, 28sa qai keveta cake na gone e ligana o Simione ka vakavinavinaka vua na Kalou, ka kaya,

29“Kemuni na Turaga, o ni sa maroroya na nomuni vosa ni yalayala,

Ia mo ni qai laiva na nomuni tamata me lako ena vakacegu.

30Ni sa qai raica na mataqu na nomuni vu-ni-bula,

31O koya o ni sa vakarautaka e matadra na tamata kecega:

32A rarama me vakatakila na lomamuni vei ira na kai matanitu tani,

Ka kauta mai na lagilagi vei ira na nomuni tamata na Isireli!”#Aisea 42.6; 49.6; 52.10

33Ia e rau sa kurabui o tamana kei tinana ena vuku ni veika sa tukuni me baleti koya. 34Sa qai vosa vakalougatataki rau o Simione ka kaya vei Maria na tinana, “Raica, na gone oqo sa digitaka na Kalou me kauta mai na veivakarusai kei na veivakabulai ki na lewe vuqa e Isireli. Ena yaco o koya me nona i vakatakilakila na Kalou ka ra na lewe vuqa era na vosa vakacacataka, 35me vakavotui kina na nanuma vuni ni lomadra. Na rarawa talega, ni sa vaka na i seleiwau yame gagata, ena suaka talega na yalomu.”

36A sa tiko talega e kea ena gauna o ya e dua na parofita yalewa; a yacana o Ana, ka luve i Fanueli ena yavusa i Aseri. A sa qase sara o koya. A vakawati ena gauna ni nona goneyalewa donu, ka rau a tiko vata voli kei na watina me vitu na yabaki, 37ia sa yada tu oqo o koya ka sa yabaki 84. E sega ni dau lako tani mai na Valenisoro o koya ni sa dau lotu, ka lolo masumasu ena siga kei na bogi.#Ud 8.4,5 38A sa yaco mai o koya ena gauna vata o ya ka ia na vakavinavinaka vua na Kalou, ka tukuna na veika me baleta na gone kivei ira kece era waraka tiko na vakabulai nei Jerusalemi mai vua na Kalou.

Lesu Tale ki Nasareci

39Ia ni rau sa qarava oti o Iosefo kei Maria na veika kece me vaka e tu ena lawa ni Turaga, e ratou sa lesu tale ki Kalili, ki na nodratou koro o Nasareci.#Maciu 2.23 40Sa qai tubu cake na gone me levu ka kaukauwa mai; sa sinai ena vuku, ka sa tu vua na veivakalougatataki ni Kalou.

Na Cauravou Lailai o Jisu ena Valenisoro

41E rau dau lako na i tubutubu i Jisu ena veiyabaki ki Jerusalemi ki na Solevu ni Lakosivia.#Lako 12.1-27; Vrua 16.1-8 42Ena gauna sa yabaki tinikarua kina o Jisu, e ratou sa lako yani ki na solevu me vaka na kena i vakarau. 43Ni sa oti na solevu me ratou sa lesu tale, sa mani tiko laivi ga na cauravou lailai o Jisu mai Jerusalemi, ka rau sega ni kila na nona i tubutubu. 44Ia ni rau sa nanuma ga ni tiko o koya ena dua na matailakolako ka ra lako vata tiko, e rau sa mani lako tu ga ena siga taucoko o ya ni bera ni rau tekivu vakasaqarai koya vei ira na wekadrau kei na nodrau i tokani. 45Ni rau sa sega ni kunei koya, e rau sa qai lesu tale ki Jerusalemi ka la'ki vakasaqarai koya kina. 46Ena i katolu ni siga, e rau sa qai kunei koya ena Valenisoro ni dabe tiko ena kedra maliwa na i vakavuvuli, a sa vakarogoci ira tiko, ka vakatarogi ira talega. 47Era sa kurabuitaka na nona vuku kei na nona i sau ni taro o ira na tamata kecega era sa rogoci koya. 48Ni rau sa raici koya o rau na nona i tubutubu, e rau sa kurabui, ka sa kaya vua o tinana, “Na luvequ, na cava na vuna o sa cakava kina na ka oqo vei keirau? Raica, keirau sa vakasaqarai iko tiko kei tamamu ka keirau sa loma taqaya vakalevu.”

49Sa qai kaya vei rau o koya, “Na cava o drau vakasaqarai au kina? Drau sega ni kila ni sa dodonu me'u tiko ena vale nei Tamaqu?” 50Ia e rau a sega ni kila rawa na i balebale ni vosa e cavuta vei rau o koya.

51Sa qai lako sobu vata kei rau o koya ka yaco ki Nasareci; sa dau talairawarawa vei rau, ka sa maroroya e lomana na vosa kecega o ya o tinana. 52A sa tubu cake tikoga me levu o Jisu, ka sa toro cake tikoga na nona vuku; a sa vinakati koya vakalevu na Kalou ka vaka talega kina o ira na tamata.#1Samu 2.26; Vbale 3.4

Currently Selected:

Luke 2: FNVDC12

Highlight

Copy