Luke 12

Na Veivunauci me Baleta na Veivakaisini

(Maciu 10.26-27)

1Ena gauna o ya, ni ra sa vakasoqoni vata mai e udolu vakavuqa na tamata, ka ra sa veidrigidrigi ena kedra lewe levu, sa qai vosa taumada o Jisu vei iratou na nona tisaipeli ka kaya, “Dou qarauni kemudou mai na nodra i vakatubu na Farisi, o ya na nodra dau veivakaisini.#Maciu 16.6; Mari 8.15 2Na veika kecega sa vunitaki ena vakaraitaki, kei na veika sa vakayacori lo ena vakatakilai.#Mari 4.22; Luke 8.17 3Na veika kece dou sa tukuna ena tikina butobuto ena rogoci ena rarama, kei na ka dou sa vakasolokakanataka ena veiyasana vuni ena kacivaki ena veidela ni vale.

O Koya me Da Rerevaka

(Maciu 10.28-31)

4“Au sa kaya vei kemudou na noqu i tokani, dou kakua ni rerevaki ira era vakamatea na yago, ka sega ni cakava rawa tale e dua na ka e muri. 5Ia ka'u na vakasalataki kemudou se o cei mo dou rerevaka: dou rerevaki koya ga e tu vua na kaukauwa me biuta na tamata ki eli ni sa vakamatea oti. Dou vakabauti au, ni sai koya ga oqori mo dou rerevaka!

6“E sega li ni sau walega ni lima na siparo e rua na sede? Ia e sega ni dua bulu na siparo e bau guilecavi ena mata ni Kalou. 7Ia oi kemudou, na drau ni ulumudou yadudua sara mada ga era wili. O koya oqo mo dou kakua kina ni rere, ni dou sa bibi cake vua na Kalou mai vei ira na siparo e vuqa.

Vakatusa i Karisito e Matadra na Tamata

(Maciu 10.32-33; 12.32; 10.19-20)

8“Au sa kaya vei kemudou, O koya yadua e vakatusa i au ena matadra na tamata, ena vakatusa i koya talega na Luve ni Tamata ena matadra na agilosi ni Kalou, 9ia o koya e cakitaki au ena matadra na tamata ena cakitaki ena matadra na agilosi ni Kalou.

10“O koya yadua e vosa vakacacataka na Luve ni Tamata ena bokoci rawa na nona i valavala ca, ia o koya e vosa vakacacataka na Yalo Tabu ena sega ni bokoci rawa na nona i valavala ca.#Maciu 12.32; Mari 3.29

11“Ia ni ra sa kauti kemudou ki na veivalenilotu vei ira na i liuliu kei ira na daulewa, dou kakua ni lomaleqataka se dou na sauma vakacava na taro, se na cava mo dou kaya;#Maciu 10.19,20; Mari 13.11; Luke 21.14,15 12ni na vakavulici kemudou na Yalo Tabu ena gauna sara ga o ya ena ka e dodonu mo dou tukuna.”

Na Vosa Vakatautauvata ni Tamata Vutuniyau Yalowai

13E a qai kaya vei Jisu e dua vei ira na lewe vuqa, “Na i Vakavuvuli, ni vakaroti tuakaqu mada me solia vei au na noqu i votavota i yau mai vei tama i keirau.”

14Ia sa qai kaya vua o koya, “Na wekaqu, o cei sa lesi au me'u lewa ka vota na i yau vei kemudrau?” 15Sa qai kaya vei ira o koya, “Ni yadra tiko ka qarauni kemuni mai na veivalavala kocokoco kecega, ni sa sega ni vakatau na bula ni tamata ena levu ni ka e tu vua.”

16Sa qai cavuta vei ira o koya e dua na vosa vakatautauvata, ka kaya, “E a vakalewe vinaka sara na nona vanua e dua na tamata vutuniyau. 17A sa vakananuma e lomana o koya, ‘Na cava mada me'u cakava, ni sa sega na vanua me'u maroroya kece kina na noqu vuata?’ 18Sa qai kaya tale o koya, ‘Au na cakava na ka oqo: au na basuka na noqu veilololo, ka'u na tara eso era lelevu cake, ka maroroya kina na noqu vuata kecega, kei na noqu i yau. 19Ka'u na kaya ki yaloqu, Yaloqu sa levu tu oqo na veika e nomu me rauta na veiyabaki e vuqa: mo vakacegu mada, kana, gunu ka marau tiko.’#Sr 11.19 20Ia sa qai kaya vua na Kalou, ‘Tamata lialia! Ena bogi ga edaidai ena tarogi kina vei iko na yalomu, era na qai nei cei na ka o sa vakarautaka tu?’

21“Sa na vakakina vei koya e dau binia na i yau me nona ga, ka sega ni vutuniyau ena mata ni Kalou.”

Na Vakanuinui Vua na Kalou

(Maciu 6.25-34)

22Sa qai kaya tale vei iratou na nona tisaipeli o Jisu, “O koya oqo au sa kaya kina vei kemudou; dou kakua ni lomaocaoca me baleta na nomudou bula, na ka mo dou kania, se me baleta na yagomudou, na ka mo dou vakaisulu kina. 23Ni sa bibi cake na bula mai na kakana, ka bibi cake na yago mai na i sulu. 24Dou vakasamataki ira mada na reveni: era sega ni dau kabukaburaki se tatamusuki, ka sega na nodra valeniyau se lololo; ia sa vakani ira na Kalou! Ia oi kemudou, dou sa yaga vakalevu cake sara mai vei ira na manumanu! 25O cei mada vei kemudou sa rawa me vakaikuritaka tale vakalailai na gauna ni nona bula ena vuku ni nona lomaocaoca? 26Ia ke sega ni dou cakava rawa na ka lailai walega o ya, na cava ga o dou lomaocaocataka kina na kena vo? 27Dou vakasamataka mada na veisenikau, na i tovo ni nodra tubu; era sega ni dau cakacaka se dau tali i sulu, ia oqo au kaya vei kemudou, o Solomoni ena nona i ukuuku kecega, sa sega ni vakaisulu me bau vaka e dua vei ira oqo.#1Tui 10.4-7; 2Vei 9.3-6 28Ia kevaka sa vakaisulutaka vakaoqo na Kalou na co era bula tu e veivanua edaidai ka ra biu ki na lovo ni mataka, sa na qai uasivi sara na ka ena vakasulumi kemudou kina — oi kemudou sa lailai na nomudou vakabauta!

29“Dou kakua ni vakasaqara na ka mo dou kania, se na ka mo dou gunuva, ka me kakua talega ni veidreyaki na yalomudou. 30(Ni ra sa dau vakasaqara na tawa vakabauta ni vuravura oqo na veika oqo.) Sa kila tiko na Tamamudou ni ra sa yaga vei kemudou na veika oqo. 31Ia dou kauwaitaka ga vakalevu na nona matanitu, ka na soli na veika oqo vei kemudou me kena i kuri.

Na i Yau mai Lomalagi

(Maciu 6.19-21)

32“Dou kakua ni rere na qele ni sipi lailai, ni sa ka ni marau vua na Tamamudou me solia vei kemudou na matanitu. 33Dou volitaka na veika e tu vei kemudou ka solia na kena i lavo vei ira na dravudravua; dou vakarautaka ga na nomudou taga ni lavo e sega ni madra rawa, ka maroroya na i yau mai lomalagi ena sega ni oti rawa, ena tikina e sega ni torova rawa na daubutako, se kakana kina na sarasara. 34Ka ni vanua ga e tiko kina na nomudou i yau, ena tiko talega kina na yalomudou.

O Ira na Dauveiqaravi Yalodina

35“Me vauci tikoga na tolomudou, ka caudre tikoga na nomudou cina,#Maciu 25.1-13 36ka mo dou vakataki ira na tamata era waraka tiko na nodra turaga me lesu mai ki vale mai na kana magiti ni vakawati, ka me ra na dolava sara vua na katuba ni sa mai tukituki.#Mari 13.34-36 37Era sa kalougata na dauveiqaravi e kunei ira na nodra turaga ni ra yadra tiko ena gauna sa yaco mai kina o koya. Au sa kaya vei kemudou, ena vakadreta vakavinaka na nona i sulu, ka vakatikori ira me ra kana, ka na lako yani o koya ka qaravi ira. 38Ia e vaka e lako mai ena i karua ni wase ni bogi se na i katolu, ka kunei ira ni ra sa vakarau tu, era sa kalougata o ira na dauveiqaravi o ya! 39Ia mo dou kila oqo, kevaka e kila na i taukei ni vale na gauna ena lako mai kina na daubutako, ke a yadra tiko, ka sega ni laiva tu ga na nona vale me mai basuki.#Maciu 24.43,44 40Oi kemudou talega mo dou vakarau tu, ni na yaco mai na Luve ni Tamata ena dua na gauna o dou sega ni namaka.”

Na Dauveiqaravi Yalo Dina se Tawa Yalo Dina

(Maciu 24.45-51)

41Sa qai kaya o Pita vei Jisu, “Turaga, o ni cavuta tiko na vosa vakatautauvata oqo vei keitou ga, se vei keimami taucoko?”

42A sauma na Turaga ka kaya, “O cei mada na dauniyau yalodina ka vuku, o koya ena lesia na nona turaga me lewa na nona matavuvale, me solia vei ira na kedra i vakarau kakana ena kena gauna dodonu? 43Sa kalougata na tamata e kunei koya na nona turaga ena gauna e yaco mai kina ni sa cakava tiko vakakina. 44Au sa kaya vakaidina vei kemudou, ena lesi koya na nona turaga me lewa na veika kece e tu vua. 45Ia kevaka sa mani kaya e lomana na tamata o ya, ‘Ena yaco vakaberabera toka mai na noqu turaga,’ ka sa mani tekivu kina me mokulaki ira na tagane kei na yalewa veiqaravi, ka dau mai kana yani, ka gunu, ka mateni, 46ena qai yaco mai na nona turaga ena dua na siga e sega ni namaka, ena tiki ni gauna e sega ni kila, ka na totogitaki o koya, ka biu vata kei ira na tamata talaidredre.

47“Na tamata ka sa kila vinaka tu na veika sa vinakata vua na nona turaga, ka sa sega ni vakarau kina me cakava, ena sotava o koya na i totogi kuita mosimosi. 48Ia na tamata ka a sega ni kila na veika sa vinakata vua na nona turaga, ka sa qai cakava na ka e dodonu me kuita kina, ena sota kaya e dua na i kuita mamada ga. Na tamata e soli vakalevu vua na ka ena namaki talega mai vua e levu na ka; ia sa ka levu sara na veika e sa namaki mai vua e dua sa soli vakalevu vua na ka.

O Jisu na Vu ni Veitawasei

(Maciu 10.34-36)

49“Au sa lako mai me'u mai vakamai vuravura ena bukawaqa, ka'u diva mada ga me a sa waqa oti tu! 50Sa tu e dua na papitaiso me'u papitaisotaki kina, ka sa ka levu na noqu rarawa me yacova ni sa vakayacori oti!#Mari 10.38 51Dou nanuma beka ni'u sa lako mai me'u kauta mai na veisaututaki e vuravura? E segai, e sega ni tiko sautu, ia na veitawasei ga. 52Ni sa tekivu oqo e ratou na veisei e lewe lima ena dua na vale; e lewe tolu me veimecaki kei na lewe rua, ka lewe rua me veimecaki kei na lewe tolu. 53Era na veimecaki vakai ira na veitamani tagane; kei ira na veitinani yalewa; kei ira na veivugoni yalewa.”#Maika 7.6

Na Kena Kilai Rawa na Gauna

(Maciu 16.2-3)

54E a qai kaya tale vei ira na lewe vuqa o Jisu, “Ni o ni sa raica ni sa tubu e dua na o mai na ra, o ni sa dau kaya sara, ‘Sa lako mai oqo e dua na uca’, ka dau mani yaco sara vakakina. 55Ia ni o ni sa raica ni sa liwa tiko na cagi mai na ceva, o ni sa kaya sara, ‘Ena ka levu na katakata’, ka sa dau mani yaco vakakina. 56Oi kemuni na dauveivakaisini! O ni sa kila rawa na i balebale ni rairai ni vuravura kei na macawa, ia a cava ga o ni qai sega ni vakaibalebaletaka rawa kina na dela ni gauna oqo?

Veivinakati kei na Nomu Meca

(Maciu 5.25-26)

57“Ia na cava o ni sega ni lewa rawa kina vakai kemuni na ka e dodonu mo ni kitaka? 58Ni drau sa salavata yani kei koya sa beitaki iko ki vua na turaganilewa, mo saga sara me sereki iko rawa o koya e gaunisala, de qai kauti iko vua na turaganilewa, ka soli iko na turaganilewa vua na ovisa, ka qai biuti iko na ovisa ki na vale ni veivesu. 59Au kaya vei iko, o na sega ni sereki mai kina me yacova ni o sa sauma oti sara na i lavo.”

Currently Selected:

Luke 12: FNVDC12

Highlight

Copy