Luke 11

Na Veivakavulici i Jisu me Baleta na Masu

(Maciu 6.9-13; 7.7-11)

1A masu tiko o Jisu ena dua na vanua. Ia ni sa oti na nona masu, sa qai kaya vua e dua na nona tisaipeli, “Turaga, ni vakavulici keitou mada ena masu, me vaka na nona vakavulici iratou na nona tisaipeli o Joni.”

2Sa qai kaya vei iratou o koya, “Ni dou sa masu, dou kaya,

‘Tama i keimami, me vakarokorokotaki na yacamuni,

Me yaco mai na nomuni matanitu.

3Ni solia mai vei keimami ena veisiga na kakana e rauti keimami.

4Ni kakua ni cudruvi keimami ena vuku ni neimami i valavala ca;

Ni keimami sa sega ni cudruvi ira era sai valavala ca vei keimami.

Ka mo ni kakua ni kauti keimami ki na vere.’ ”

5Sa qai kaya tale vei iratou o koya, “O cei mada vei kemudou me na lako vua e dua na wekana ena lomaloma ni bogi ka kaya vua, ‘Na wekaqu, au kerea mo solia mada mai vei au e tolu na i buli madrai. 6A sa qai yaco walega mai oqo e dua na noqu i tokani ena nona i lakolako, ka sega sara ga na ka e tu vei au me'u tauca e matana.’ 7Ka me na qai sauma mai loma ni vale o koya, ‘Kakua ni mai vakaogai au! Sa sogo tu na katuba, ka keitou sa davo tu kei iratou na luvequ. Sa sega ni rawa me'u tucake tale ka solia vei iko e dua na ka!’ 8Au sa tukuna vei kemudou, e dina beka ni na sega ni via tucake ka solia vua e dua na ka na tamata o ya ena vuku ni nodrau veiwekani, ia ena nona cikecike ga, ena tucake kina o koya ka solia vua na ka e rauti koya.

9Au sa tukuna kina vei kemudou, Dou kerekere ka na soli vei kemudou; dou vakasaqara ka dou na kunea; dou tukituki ka na dolavi vei kemudou. 10Ni sa dau rawata o koya yadua sa dau kerekere, ka dau kunea o koya yadua sa dau vakasaqara, ka na dolavi vua sa dau tukituki. 11O cei li vei kemudou na tama kevaka sa kerea vua o luvena na ika, me na solia vua e dua na vatu, 12se kevaka e kere yaloka, me na solia vua e dua na batibasaga? 13O koya oqo, oi kemudou na tamata ca, ni kevaka dou sa dau solia na ka vinaka vei ira na luvemudou, sa na qai ka levu cake sara na nona solia na Yalo Tabu na Tamamudou vakalomalagi vei ira vakayadua era sa kerea vua!”

O Jisu kei Pielisepupi

(Maciu 12.22-30; Mari 3.20-27)

14E a vakasava tani tiko o Jisu e dua na tevoro galu. Ia ni sa lako tani na tevoro, sa qai vosa sara na tamata galu ka ra sa qoroqoro na lewe vuqa. 15Ia era a kaya eso na tamata, “Sa vakasavi ira na tevoro o koya ena kaukauwa i Pielisepupi, na nodra i liuliu na tevoro.”#Maciu 9.34; 10.25

16Eso tale era vakatovolei koya, ka taroga vua e dua na i vakatakilakila mai lomalagi.#Maciu 12.38; 16.1; Mari 8.11 17Ia ni sa kila o koya na nodra vakasama, sa kaya vei ira, “Na matanitu yadua era tatawasewase ka veisei vakai ira na lewena ena rusa ga, kei na vuvale era veisei vakai ira na lewena ena bale ga. 18Kevaka talega era na veisei vakai ira na lewe ni matanitu i Setani ena tudei vakaevei na nona matanitu? Me vaka ni dou kaya tiko ni'u sa vakasavi ira tani na tevoro ena kaukauwa i Pielisepupi. 19Ia kevaka au sa vakasavi ira tani na tevoro ena kaukauwa i Pielisepupi, a kaukauwa ga i cei era sa ia kina na veivakasavi o ira na nomudou i lawalawa? O ira mada ga era muri kemudou voli era sa vakadinata ni dou sa cala oi kemudou! 20E segai sara, ni ka'u sa vakasavi ira tani ga na tevoro ena kaukauwa ni Kalou, ka sa vakatakila oqo ni sa yaco mai vei kemuni na matanitu ni Kalou.

21“Ni sa vakaiyaragi vinaka tu e dua na qaqa, ka yadrava tu na nona vale, sa na tu vinaka tu ga na nona i yaya. 22Ia ni sa lako mai vua e dua e qaqa cake vua ka vakamalumalumutaki koya, sa na kaliraka tani na nona i yaragi ka dau vakararavi tu kina, ka veivotayaka na nona i yau.

23“O koya e sega ni to vata kei au sa noqu meca, kei koya e sega ni kumuna vata vei au sa veibiuyaka.#Mari 9.40

Nona Lesu Tale mai na Yalo Velavela

(Maciu 12.43-45)

24“Ni sa takali mai vua e dua na tamata na yalo velavela, sa na veilakoyaki voli ena vanua veitalasiga me vaqara e dua na vanua me vakacegu kina. Ia kevaka sa sega ni kunea, ena kaya, ‘Au na lesu tale ki na noqu vale ka'u a lako mai kina.’ 25Ni sa yaco kina, a sa kunea ni sa samaki vinaka tu ka tuvani vakamaqosa. 26Sa qai lako o koya ka kauta vata mai e vitu tale na tevoro e ratou ca vakalevu cake mai vua. E ratou sa curu ka tiko kina, ka sa yaco e muri me ca vakalevu cake sara na tamata o ya mai na nona bula e liu.”

Na Marau Dina

27Ni sa cavuta tiko na veika o ya o Jisu, sa qai rogo cake mai na domona e dua na yalewa mai vei ira na lewe vuqa, ka kaya vua, “Sa kalougata na kete o ni a sucu mai kina, kei na matanisucu o ni a sucuma!”

28Ia sa qai sauma o Jisu ka kaya, “Era sa kalougata cake o ira era rogoca na vosa ni Kalou ka muria!”

Vinakati me Dua na Cakacaka Mana

(Maciu 12.38-42)

29Ni ra sa soqoni vata tiko vei Jisu na lewe vuqa, sa qai kaya o koya, “Oqo e dua na i tabatamata ca; e vakasaqara e dua na i vakatakilakila, ia ena sega ni soli e dua na i vakatakilakila, vakavo ga na i vakatakilakila i Jona na parofita.#Maciu 16.4; Mari 8.12 30Me vaka ni a yaco o Jona me i vakatakilakila vei ira na kai Ninive, ena vakakina na Luve ni Tamata ki na i tabatamata oqo.#Jona 3.4 31Ena Siga ni Lewa, ena tucake mai na Radi ni Sipa ka beitaki ira na i tabatamata oqo ena nodra cala, baleta ni a lakova mai o koya na sala balavu mai na i yalayala kei vuravura me mai rogoca na i vakavuvuli vuku i Solomoni; ia au sa kaya vei kemuni ni sa tu oqo e dua ka sa uasivi cake sara mai vei Solomoni.#1Tui 10.1-10; 2Vei 9.1-12 32Era na tucake na kai Ninive ena Siga ni Lewa ka ra na beitaki kemuni ni ra a veivutuni ena vunau i Jona; ia sa tu oqo e dua e levu cake vei Jona!#Jona 3.5

Na Rarama ni Yago

(Maciu 5.15; 6.22-23)

33“E sega ni dua na tamata, ni sa tutuvaka oti na cina, me qai biuta ena dua na tikina vuni, se ena ruku ni vakarau ni sila; ia e biuta ga ena kena i tutu ka me ra raica rawa na kena rarama o ira era curu mai.#Maciu 5.15; Mari 4.21; Luke 8.16 34A cina ni yago na mata. Ni sa vinaka tu na matamu, sa rarama kina na yagomu taucoko; ia ni sa ca tu na matamu, sa butobuto kina na yagomu taucoko. 35O koya mo qai qarauna kina, de na qai butobuto na rarama sa tu vei iko. 36Kevaka sa sinai ena rarama na yagomu taucoko, ka sega na tikina e butobuto, ena rarama taucoko sara, me vaka sa cinavi iko na cina ena kena i serau.”

Sa Beitaki Ira na Farisi kei na Daunilawa o Jisu

(Maciu 23.1-36; Mari 12.38-40)

37Ia ni sa vosa tiko o Jisu, sa qai sureti koya sara e dua na Farisi me rau la'ki kana vata. A sa curu ki loma o koya ka tiko sobu me kana. 38E a kurabui na Farisi ni raica ni a sega ni vuluvulu o koya ni bera ni kana. 39Sa qai kaya vua na Turaga, “O kemuni na Farisi o ni sa dau vakasavasavataka ga na taudaku ni bilo kei na veleti, ia na lomamuni sa sinai tu ena kocokoco kei na i valavala ca. 40O ni sa rui yalowai! E sega li ni a cakava talega na tikina e loma o koya ka a cakava na tikina e taudaku? 41Ia ni solia me ka ni loloma vei ira na dravudravua na veika sa tu vei kemuni, ka raica sa na savasava vei kemuni na ka kecega.

42“Ia o ni na kalouca na Farisi! Ni o ni sa dau solia na i katini ni veimataqali kau lalai sara, na i vakaboi ni kakana, ia o ni sa biuta vakatikitiki tani toka ga na lewa dodonu kei na loloma ni Kalou. E dodonu mo ni vakayacora na veika oqo, ka kakua talega ni guilecavi ira na kena vo.#Vsoro 27.30

43“O ni na kalouca na Farisi! Ni o ni dau domona ga na i tikotiko cecere ena veivalenilotu, kei na veikidavaki ena vanua ni veivoli eso. 44O ni na kalouca! Ni o ni sa vaka na i bulubulu ka sa sega tu ni vakatakilakilataki; era lako voli ga e delana na tamata ka ra sega tu ni kila.”

45E a qai sauma lesu vua e dua na daunilawa, ka kaya, “Na i Vakavuvuli, ena nomuni kaya na ka oqori, o ni sa vosa vakacacataki keimami sara talega kina!”

46A sauma o Jisu ka sa kaya, “O ni na kalouca talega na daunilawa! Ni o ni sa vakataqara vei ira na tamata na i colacola ka dredre me colati, ka sega mada ga ni bau yavalata e dua na i qaqalo ni ligamuni mo ni bau vukei ira. 47O ni na kalouca! Ni o ni sa tara na veivale ni kedra i bulubulu na parofita - o ira na parofita era a vakamatea o ira na nomuni qase. 48O ni sa vakadinadinataka vakaoqo na nomuni a tokona na veika era a vakayacora na nomuni qase; oqo na nodra a vakamatei ira na parofita ka o ni qai tara na kedra i bulubulu qara vatu oi kemuni. 49O koya oqo sa kaya kina na Vuku ni Kalou, ‘Au na tala vei ira eso na parofita kei na i apositolo; ka ra na vakamatea eso vei ira oqo ka vakacacana eso tale.’ 50Ka me ra na tarogi kina na i tabatamata oqo ena vuku ni kedra dra na parofita kecega ka a vakadavei mai na i vakatekivu kei vuravura; 51mai na dra i Epeli ka yacova na dra i Sakaraia, o koya ka a vakamatei ena tadrua ni cabocabonisoro kei na Tikina Tabu. Io au sa kaya vei kemuni, ena tarogi kina na i tabatamata oqo.#Vteki 4.8; 2Vei 24.20,21

52“Dou na kalouca na daunilawa! Dou sa maroroya tikoga na i dola ki na katuba ni kila-ka; dou na sega ni curu kina oi kemuni, ka dou sa tarovi ira era sa via curu kina!”

53Ia ni sa lako tani mai kea o Jisu, era sa tekivu me ra vakalewai koya vakaca sara na daunilawa kei ira na Farisi, ka vaqaqai koya matua ena veika e vuqa, 54ka ra tovolea me ra lawakitaka ka coriti koya ena vosa e lutu mai gusuna.

Currently Selected:

Luke 11: FNVDC12

Highlight

Copy