Luke 13

Veisautaka na Nomu i Lakolako De o Mate

1Era a tiko eso na tamata ena gauna vata o ya ka ra tukuna vei Jisu na ka e baleti ira na kai Kalili ka a vakamatea o Pailato ena gauna era vakacaboisoro tiko kina vua na Kalou. 2Sa qai kaya vei ira o Jisu, “O ni nanuma beka ni ra sai valavala ca vakalevu cake o ira sa mate vaka o ya mai vei ira na vo ni kai Kalili? 3E sega sara!; Ka'u sa tukuna oqo vei kemuni ni kevaka o ni sa sega ni veivutuni mai na nomuni i valavala ca, o ni na rusa kecega me vakataki ira. 4Se vakaevei beka o iratou na lewe tinikawalu ka mate ni a lutuki iratou na doka ni vale cecere mai Sailoama? O ni nanuma beka ni sa vakaraitaka oqo ni ratou sa ca vakalevu cake mai vei ira na vo ni tamata era tiko e Jerusalemi ena gauna o ya? 5Au sa kaya vei kemuni, E segai; ia, kevaka o ni sa sega ni veivutuni, o ni na mate kece talega vakakina.”

Na Vosa Vakatautauvata ni Vunilolo Sega ni Vua

6Sa qai tukuna talega vei ira o Jisu na vosa vakatautauvata oqo: “E dua na tamata sa tea ena loma ni nona loganivaini e dua na vunilolo. Ia ni sa lako me la'ki vakasaqara kina eso na vuana, a sa sega ni kunea kina e dua. 7Sa qai kaya vua na i vakatawa ni vaini o koya, ‘Raica, sa tolu na yabaki oqo na noqu dau lako tiko mai me'u mai vaqara na vua ni vunilolo oqo; ka sega ni'u se bau kunea kina e dua na vuana. Taya laivi! Na cava e mai vakamaumautaki qele tiko kina?’ 8Sa qai sauma vua na dauteitei, ‘Ni laiva saka me bau dua tale mada ga na yabaki, me'u se tei cukiraka vakavolivolita mada, ka biuta kina na i vakabulabula ni qele. 9Kevaka ena mani vua ena yabaki vou, ena daumaka sara o ya; ia kevaka e sega, mo ni qai taya laivi.’ ”

Sa Vakabula o Jisu na Yalewa Lokiloki ena Siga ni Vakacecegu

10E a veivakatavulici tiko o Jisu ena dua na valenilotu ena Siga ni Vakacecegu. 11A tiko kina e dua na yalewa ka curumi koya tu e dua na yalo velavela ka vakavuna voli me tauvimate me yabaki tinikawalu. A sa vakalairoro vakalevu sara o koya ka sega ni duri cake rawa vakadodonu. 12Ia ni sa raici koya o Jisu, sa kaciva ka kaya vua, “Yalewa, o sa sereki mai na nomu tauvimate.” 13Sa qai tarai koya o Jisu, ka vakasauri ga ni sa tucake sara vakadodonu ka vakacaucautaka na Kalou.

14Ia sa cudru kina na i liuliu ni valenilotu baleta ni sa ia na veivakabulai o Jisu ena Siga ni Vakacecegu. Sa qai kaya o koya vei ira na tamata, “Sa tu e ono na siga me ia kina na cakacaka, mo ni lako mai kina mo ni vakabulai, ka kakua ga ena Siga ni Vakacecegu.”#Lako 20.9,10; Vrua 5.13,14

15A sauma vua na Turaga ka kaya, “Dou tamata dauveivakaisini! E sega li ni dou dau sereki ira na nomudou bulumakau kei na asa ena Siga ni Vakacecegu mai na vale ni manumanu ka la'ki vagunuvi ira? 16E sega li ni dodonu vua na yalewa oqo, o koya e dua na kawa i Epara-ama, ka sa vauci koya tu o Setani ka sa yabaki tinikawalu, me sereki mai na i vau oqo ena Siga ni Vakacecegu?” 17Na nona i sau ni taro oqo sa vakavuna me ra madua kecega kina na nona meca, ia era sa marau kina na tamata kecega ena vuku ni veika talei sa cakava o koya.

Na Vosa Vakatautauvata ni Sore ni Musita

(Maciu 13.31-32; Mari 4.30-32)

18Sa qai kaya tale o Jisu, “E vaka tu beka evei na matanitu ni Kalou? Me'u vakatautauvatana beka kei na cava? 19Sa tautauvata kei na dua na sore ni musita, sa taura e dua na tamata ka tea ena nona i teitei, ka sa tubu ka yaco me dua na vunikau levu, ka ra sa caka sova na manumanu vuka ena veitabana.”

Na Vosa Vakatautauvata me Baleta na i Vakatubu

(Maciu 13.33)

20A sa kaya tale o Jisu, “Me'u vakatauvatana na matanitu ni Kalou kei na cava? 21Sa tautauvata kei na i vakatubu, ka sa taura e dua na yalewa, ka wakia vata kei na tolu na i vakarau falawa me yacova ni sa vakatubutaki vinaka na falawa kece o ya.”

Na Katuba Qiqo

(Maciu 7.13-14,21-23)

22A veilakoyaki voli o Jisu ena veikoro lelevu kei na veikoro lalai, ka veivakatavulici tiko, ka lako tiko vaka ki Jerusalemi. 23Sa qai kaya vua e dua, “Turaga, era na lewe lailai wale beka ga era na vakabulai?”

A sa kaya vei ira o koya, 24“Ni gumatua sara mo ni curu ena katuba qiqo; ni'u sa kaya vei kemuni, e lewe vuqa era na saga me ra curu ki loma ka ra na sega ni rawata. 25Ni sa na tucake na i taukei ni vale, ka sogota na katuba, o ni sa na qai tu ga e tautuba, ka tukituki ena mata ni katuba ka kaya, ‘Turaga, ni dolava mada vei keimami!’ Ena qai sauma vei kemuni o koya, ka kaya, ‘Au sega ni kila se o ni lako mai vei!’ 26O ni na qai kaya, ‘Keimami a dau kana ka gunu vata kei kemuni, ka o ni a dau veivakatavulici ena neimami koro!’ 27Ia ena qai kaya o koya, ‘Au sa kaya vei kemuni, au sa sega ni kila se o ni lako mai vei. Ni lako tani, oi kemuni kece na tamata i valavala ca!’#Same 6.8 28O ni na qai tagi ka vakasequruquru bati ena gauna o ni sa raici Epara-ama kina, vata kei Aisake, kei Jekope, kei ira kecega na parofita ni matanitu ni Kalou, o ya ena gauna o ni sa biu tani kina ki tautuba.#Maciu 22.13; 25.30 #Maciu 8.11,12 29Ia era na lako mai na tamata mai na tokalau kei na ra, mai na vualiku kei na ceva talega, ka ra na tiko me ra kana ena matanitu ni Kalou. 30Ka raica, eso era tu e muri era na liu, ka so era tu e liu era na muri.”#Maciu 19.30; 20.16; Mari 10.31

Sa Lomani Jerusalemi o Jisu

(Maciu 23.37-39)

31Ena gauna vata o ya, era a lako mai eso na Farisi ka kaya vei Jisu, “Mo biuta na vanua oqo ka lako tani ki na dua tale na vanua, baleta ni sa via vakamatei iko tiko o Eroti.”

32Sa qai sauma vei ira o Jisu, “Ni la'ki tukuna vua na fokisi o ya: Au sa vakasavi ira na tevoro ka veivakabulai tiko edaidai kei na siga ni mataka, ka'u na qai vakaotia na noqu cakacaka ena i katolu ni siga. 33Ia sa dodonu vei au me'u sa lako edaidai, ni mataka, kei na siga ka tarava; ni sa sega ni dodonu me mate e dua na parofita ena vanua tani, mai Jerusalemi duadua ga.

34“Isa Jerusalemi, isa Jerusalemi! O iko o a vakamatei ira na parofita, ka vakaviriki ira ena vatu na i talatala sa tala yani vei iko na Kalou! Sa vakavuqa na noqu vakasoqoni ira vata na luvemu, me vaka na nona vakasoqoni ira vata na luvena na tina ni toa ena ruku ni tabana, ia o a sega ga ni vinakata! 35Raica, sa biu wale tu mai na nomu Valenisoro. Au sa kaya vei kemuni ni o ni na sega ni raici au tale me yacova na gauna ni o sa kaya kina, ‘Sa kalougata o koya sa lako mai ena yaca ni Turaga!’ ”#Same 118.26

Currently Selected:

Luke 13: FNVDC12

Highlight

Copy