Cakacaka 17

Mai Cesalonaika

1E rau sa lakova yani na koro o Amifipoli kei Apolonia oi rau o Paula kei Sailasa ka yaco sara ki na koro o Cesalonaika, a sa tiko e kea e dua na nodra valenilotu na Jiu. 2Me vaka ga na i vakarau i Paula, sa la'ki curu sara o koya ki na nodra valenilotu. Ena loma ni tolu na Siga ni Vakacecegu e tiko kina e kea, a sa veivosaki kei ira na tamata mai na i Vola Tabu. 3E a vakamacalataka na veika sa volai kina ka vakadinadinataka mai kina ni sa dodonu ga me vakararawataki na Karisito, ka me qai vakaturi cake tale mai na mate. A sa kaya o Paula, “O Jisu ka'u kaya tiko oqo vei kemuni, sai koya ga oqo na Mesaia!” 4Era a mani vakabauta eso, ka ra sa gole sara me ra veitokani kei rau o Paula kei Sailasa; e vaka talega kina e lewe levu toka na marama dokai kei na dua na i wase levu ni kai Kirisi era sa qarava na Kalou.

5Ia era sa qai vuvu kina na Jiu ka ra sa vakasoqoni ira eso na tamata ca era wavoki wale tu ga ena makete, ka ra vakatubura e dua na vakasausa levu ena loma ni koro taucoko. Era sa qai curuma vakaukauwa na vale i Jesoni ena nodra vakasaqarai rau kina o Paula kei Sailasa me rau kau mai vei ira na tamata. 6Ia ni ra sa sega ni kunei rau rawa, era sa qai yarataki Jesoni yani kei iratou eso na vakabauta ki na matadra na turaganilewa ka i liuliu ni koro, ka kacivaka vei iratou, “O iratou ka ratou tiko oqo e ratou sa vakatubu leqa ena veivanua kecega! Ia oqo e ratou sa lako sara mai ki na noda koro, 7ka qai mai maroroi iratou o Jesoni. Era veisaqasaqa tiko o ira kece oqo kei na lewa nei Sisa, ni ra kaya voli ni sa tiko tale e dua na tui e yacana o Jisu!” 8Ena veivosa o ya era sa vakayavalati vakalevu sara kina na lewe vuqa kei iratou na veiliutaki. 9E ratou sa qai lewa na veiliutaki me sauma na i lavo lavaki ni sere o Jesoni kei iratou na kena vo, ka me ratou qai laivi iratou kina me ratou lako.

Mai Peria

10Ni sa buto mai na vanua, era sa qai vakauti rau sara o Paula kei Sailasa ki na koro o Peria o ira na vakabauta. Ni rau sa yaco kina, e rau sa lako sara ki na nodra valenilotu na Jiu. 11O ira maikea era tamata yalo vakaturaga cake mai vei ira era tiko mai Cesalonaika. Era taleitaka vakalevu na vakarogoca na vosa, ka ra sa dau vakasaqaqara ena i Vola Tabu ena veisiga me ra raica kina se sa dina na vosa i Paula era sa rogoca se segai. 12A sa yaco kina me ra vakabauta e lewe vuqa vei ira, ka vuqa talega vei ira na marama dokai ni Kirisi, kei ira na turaga. 13Ia ni ra sa kila na Jiu mai Cesalonaika ni sa la'ki vunautaka talega na vosa ni Kalou mai Peria o Paula, era sa qai lako talega kina, ka la'ki vakayavalati ira na lewe vuqa. 14Era sa vakatotolo sara na veiwekani ka ra vakauti Paula sobu vaka ki matasawa; ia e rau a tiko laivi tikoga e kea o Sailasa kei Timoci. 15E ratou a kauti Paula sara ki na koro o Aceni o iratou ka a veikau. E ratou sa qai lesu tale ki Peria vata kei na i vakaro i Paula me rau lako vakatotolo yani vua o Sailasa kei Timoci.

Mai Aceni

16Ni waraki rau tiko mai Aceni o Paula, sa katakata vakalevu na lomana ena nona raica na sinai ni koro ena veimatakau. 17A veileti kina o koya kei ira na Jiu ena valenilotu, kei ira na kai matanitu tani lotu vaka-Jiu, ka vakakina vei ira era dau lako yani vaka ki na makete ena veisiga. 18E a veileti talega kina o koya kei ira eso na tamata era vakabauta na i vakavuvuli vaka-Epikuro kei na so na qasenivuli ni vakavuvuli vaka-Sitoike. Era kaya eso, “A cava mada e via kaya tiko na tamata dau vosa oqo?”

Eso tale era sa kaya, “O koya e vaka e vunautaka tiko e dua na kalou vou,” ka ni vunautaka voli o koya na i Tukutuku Vinaka kei Jisu kei na tu cake tale mai na mate. 19Era sa qai tauri Paula ka kauta ki na matabose ni koro, na Areopakasi, ka kaya, “Keimami via kila se i vakavuvuli vou cava o sa mai tukuna tiko oqo. 20O sa kauta mai eso na ka veivakurabuitaki ki na daliga i keimami. Keimami via kila kina na kedra i balebale.” 21(Ni sa sega tale ni dua na ka era dau vakaogai ira tu kina na kai Aceni kei ira na vulagi era tiko kina, na nodra veitukunitaka ga ka vakarogoca na veivakasama vou e dau basika yani kina.)

Na Vosa i Paula mai Aceni

22Sa qai tu cake o Paula ena matadra na lewe ni matabose ni koro, ka kaya, “Oi kemuni na turaga e Aceni, au sa raica rawa ni o ni sa tamata yalodina ena qaravi lotu. 23Ena noqu lako voli, ka vakaraica na veika o ni dau sokalou kina, au a raica talega e dua na i cabocabonisoro ni volai tu kina, ‘Ki vua na Kalou e Tawa Kilai’. Ia na Kalou o ni dau qarava tiko oqo ka sega ni kila, sai koya na Kalou au sa mai tukuna tiko oqo vei kemuni.#Ym 13.1 24Sa i koya na Kalou ka a buli vuravura kei na veika kecega e tu kina. Sa i koya na Turaga ni lomalagi kei vuravura, ka sega ni tiko ena veivalenisoro e caka ena liga.#1Tui 8.27; Aisea 42.5; Caka 7.48 25E sega talega ni leqa ena dua na ka me rawa ni da vukei koya kina ena ka e cakava na liga ni tamata, ka ni sai koya ga ka solia tiko vei keda kece na bula, na i cegu kei na veika kecega.#2M 14.35 26E a bulia o koya na veimatatamata kecega mai na dua ga na tamata, me ra tiko ena veiyasa i vuravura kecega. A sa lesia taumada tu o koya na nodra gauna kei na i yalayala ni veivanua me ra tiko kina. 27E a cakava o ya o koya me ra qai vakasaqarai koya kina na tamata, ka nuitaka ena nodra vakayayamo voli ni ra na kunei koya. Ia e sega talega ni yawa mai vei keda yadudua na Kalou; 28me vaka sa tukuni,

‘Sa i koya ga eda sa cegu tiko ka yavala, ka bula voli kina.’

Me vaka talega era a kaya eso na nomuni daunivucu,

‘Eda sa luvena talega oi keda.’

29Me vaka ni da sa luve ni Kalou, sa sega kina ni dodonu me da nanuma ni sa tautauvata na Kalou kei na i vakatakarakara sa bulia vakamaqosa na tamata mai na koula, se na siliva, se na vatu. 30Ia na gauna ni lecaika sa vakanadakuya oti na Kalou, a sa vakarota na tamata kecega ena gauna oqo me ra veivutuni. 31Ni sa lokuca tu o koya e dua na siga me na lewai vuravura kina ena lewa dodonu, ena liga ni tamata sa lesia oti tu o koya. A sa vakadinadinataka na Kalou na ka oqo vei ira na tamata kecega ena nona vakatura cake tale mai na mate na tamata o ya.”

Na Veika sa Yaco ena Vuku ni Vosa i Paula

32Ia ni ra sa rogoca na tu cake tale mai na mate, era sa vakalialiai Paula kina eso; ia eso tale era kaya, “Keimami na rogoci iko tale ena vuku ni ka oqo.” 33Sa qai biuti ira o Paula. 34Ia era a muri koya tikoga eso vei ira ka mani yaco sara me ra vakabauta. E dua vei ira na lewe ni matabose o Taionisio, kei na dua na yalewa, o Tamarisi na yacana, kei na so tale.

Currently Selected:

Cakacaka 17: FNVDC12

Highlight

Copy