Cakacaka 16

Sa Lako Vata kei Rau o Paula kei Sailasa o Timoci

1A mani toso tiko na i lakolako i Paula ka yaco sara yani ki Tapi kei Lisitira. E tiko mai Lisitira e dua na tisaipeli ka yacana o Timoci, e luve ni dua na marama Jiu ka sa vakabauta, ia e kai Kirisi o tamana. 2E tamata rogo vinaka o koya vei ira na vakabauta mai Lisitira kei Ikoniumi. 3Sa mani vinakata o Paula me rau lako vata kaya, ka mani kauti koya ka la'ki ciliva. E a cakava o ya o Paula baleti ira na Jiu ka ra tiko ena yasayasa o ya ka ni ra kila kece tu ni kai Kirisi o tamana. 4Ia ni ratou sa vakalakova tiko na veikoro e kea, e ratou sa vakadewataka tale tikoga na veivakaro era sa lewa na i apositolo kei ira na qase mai Jerusalemi, ka kaya vei ira me ra muria. 5Era sa mani tubu me ra kaukauwa ena vakabauta o ira na veisoqosoqo lewenilotu, ka sa tubu tale tikoga na kedra i wiliwili ena veisiga.

Na Raivotu i Paula mai Tiroa

6E ratou a lakova na yasana taucoko o Firijia kei na vanua o Kalatia. Ia sa tarovi ratou na Yalo Tabu me ratou kakua ni vunautaka na vosa mai Esia. 7Ni ratou sa yaco ki na i yalayala ni yasana o Misia e ratou sa qai tovolea me ratou lako ki na yasana o Picinia, ia sa sega ni vakadonuya vei iratou na Yalo i Jisu. 8E ratou sa mani lako siviti Misia ka lako sobu sara ki na koro o Tiroa. 9Ena bogi ni siga o ya sa qai raica e dua na raivotu o Paula: sa raica ni tu cake tu e dua na kai Masitonia ka vakamasuti koya tiko ka kaya, “Lako mai ki Masitonia ka vukei keimami!” 10Ni oti ga na nona raica na raivotu o ya, keitou sasaga sara me keitou lako ki na vanua o Masitonia, ni keitou sa vakadinata ni sa kacivi keitou na Kalou me keitou la'ki vunautaka na i Tukutuku Vinaka vei ira maikea.

Na Vakabulai nei Litia mai Filipai

11Keitou sa soko sara mai Tiroa ka mua vakadodonu yani ki na yanuyanu o Samoceresa, ka ia sara ki na koro o Niapili ena siga ka tarava. 12Mai kea keitou sa qai la'ki muri e vanua ka yaco sara yani ki na koro levu o Filipai ena yasayasa vaka-Masitonia o ya, ka koloni vaka-Roma. Keitou tiko ena koro o ya ka vica vata na siga. 13Ena Siga ni Vakacecegu, keitou sa qai lako ki na taudaku ni koro, ki na bati ni uciwai ena vanua keitou nanuma ni dau caka kina na masumasu. Keitou a dabe sobu ka veitalanoa kei ira na marama era soqoni vata yani kina. 14E a vakarorogo tiko e dua na marama ni koro o Ceataira, o Litia na yacana. O koya e dua na dau volitaki i sulu lokaloka, ka dau qarava na Kalou. E a dolava na lomana na Turaga ka sa mani vakabauta kina na veika sa tukuna o Paula. 15Ia ni sa papitaisotaki oti o koya kei ira na lewe ni nona vale, sa qai kerei keitou, ka kaya, “Kevaka dou sa vakadinata ni'u sa vakabauta dina na Turaga, dou lako mai ka tiko mada ena noqu vale.” A sa cikevi keitou matua sara o koya me keitou lako kina.

E Rau sa Vesu o Paula kei Sailasa

16Ena dua na siga ni keitou sa lako tiko ki na vanua ka dau caka kina na masumasu, keitou sa qai sota kei na dua na goneyalewa bobula ka tiko vua e dua na yalo daurairai, ka rawa kina ni dau tukuna na veika e sa bera ni yaco. Sa dau vakavutuniyautaki iratou na nona turaga ena nona dau tukuna na ka vuni. 17Sa qai muri keitou mai ka qolouvaka tiko, “O iratou oqo na tamata ni Kalou Cecere Sara. E ratou sa vakaraitaka tiko vei kemuni na sala mo ni bula kina!” 18A cakava tiko vaka o ya o koya me vica vata na siga. Sa mani rarawa vakalevu na loma i Paula, ka sa qai vuki vua ka kaya vua na yalo, “Au sa vakarota vei iko ena yaca i Jisu Karisito mo lako tani mai vua!” A sa lako tani sara na yalo ena tiki ni gauna ga o ya.

19Ni ratou sa raica na nona turaga ni sa takali na ka e ratou a dau rawa i lavo tiko mai kina, e ratou sa qai tauri Paula kei Sailasa ka yarataki rau ki na makete vei ira na i liuliu. 20E ratou sa qai kauti rau yani vei iratou na i vakailesilesi ni vanua o Roma ka ratou sa kaya, “Oi rau na tamata oqo e rau Jiu ka rau sa mai vakatubu leqa vakalevu tiko ena koro oqo. 21E rau sa mai vakatavuvulitaka tiko na i valavala eso e sega ni dodonu vei keda me da taura se muria, oi keda na kai Roma.” 22Era sa qai tu vata kece mai na lewe vuqa me ra saqati rau.

E ratou sa qai luvata na nodrau i sulu o iratou na i vakalesilesi ka vakarota me rau vakanakuitataki. 23Ia ni ra sa kanakuitataki rau oti vakalevu, era sa qai biuti rau ki na valeniveivesu, ka vakarota vua na i vakatawa ni valeniveivesu me yadravi rau matua. 24Ni sa taura oti ga na i vakaro o ya o koya, sa qai biliraki rau yani ki na tiki ni valeniveivesu e loma sara ka vesuka matua sara na yavadrau ena i vesu kau bibi.

25Ia ena lomaloma ni bogi, e rau sa qai masu ka laga sere vua na Kalou o Paula kei Sailasa, ka ra a vakarogoci rau tiko o ira na kena vo ni kaivesu. 26Sa qai yaco vakasauri e dua na uneune levu, ka kuretaka sara ga na yavu ni valeniveivesu. Era sa qai tatadoladola vata kece vakadua na i sogo ni katuba, ka sa tataseresere na kedra i vesu kecega. 27Sa qai yadra mai ena moce na i vakatawa, ia ni sa raica ni sa tadola tu na katuba ni valeniveivesu, sa qai ucuna na nona i seleiwau, ka sa vakarau sara me vakamatei koya, ni nanuma ni ra sa dro na kaivesu. 28Sa qai kaci ena domo levu o Paula, ka kaya, “Kakua ni vakacacani iko! Keimami sa tiko kecega oqo!”

29Sa qai kaci na i vakatawa ni valeniveivesu me kau yani vua e dua na cina, ka mai cici sara yani ki loma. A sa sautaninini na yagona, ka bale sobu ena yavadrau o Paula kei Sailasa. 30Sa qai kauti rau ki tautuba ka kaya, “Oi kemudrau na turaga, a cava me'u cakava me'u bula kina?”

31E rau sa qai kaya, “Vakabauta na Turaga o Jisu, o na bula kina, o iko kei ira kece na nomu lewe ni vale!” 32E rau sa qai vunautaka vua na vosa ni Kalou, kei ira kece talega era tiko ena nona vale. 33Sa mani kauti rau sara yani o koya ena tiki ni bogi ga o ya, ka la'ki savata na we ni nodrau mavoa. A sa papitaisotaki sara o koya kei ira kece na nona lewe ni vale. 34Oti o ya sa qai kauti rau ki na nona vale, ka la'ki cakava e dua na kedrau kakana; a ratou sa reki vakalevu, kei iratou na nona lewe ni vale ni sa yaco me ratou vakabauta na Kalou.

E Rau sa Sereki mai Valeniveivesu o Paula kei Sailasa

35Ia ni sa siga mai na vanua, e ratou sa qai tala eso na ovisa o iratou na turaganilewa, ka kaya, “Dou la'ki sereki rau mai na tamata o ya.”

36Sa mani kaya sara na i vakatawa ni valeniveivesu vei rau o Paula kei Sailasa, “E ratou sa vakarota mai na turaganilewa mo drau sa sereki. Mo drau sa lako sara, ka mo drau lako ena vakacegu!”

37Ia sa qai kaya vei iratou na ovisa o Paula, “Oi keirau, keirau sa lewe ni matanitu o Roma! Sa sega mada ni vakadinadinataki se na cala cava keirau sa vakayacora, ia keirau sa vakanakuitataki ga ena matana levu. E ratou sa qai biuti keirau ki na valeniveivesu. Ia oqo, e ratou sa qai via vakauti keirau tani yani vakavuni. E sega ni rawa vakadua! Me lako sara ga mai o iratou na i vakailesilesi ni vanua o Roma ka mai kauti keirau tani eke!”

38E ratou sa qai la'ki tukuna na vosa o ya na ovisa vei iratou na i vakailesilesi ni vanua o Roma. A ratou sa rere sara ni ratou sa rogoca ni rau sa kai Roma o Paula kei Sailasa. 39E ratou sa qai lako yani ka kere veivosoti vei rau; ka ratou sa qai kauti rau ki tautuba ka vakamasuti rau me rau sa biuta na koro. 40Ni rau sa biuta mai na valeniveivesu, erau sa lako sara ki na vale i Litia. Era a sota maikea, ka rau vakayaloqaqataki ira na vakabauta, e rau sa qai lako sara yani.

Currently Selected:

Cakacaka 16: FNVDC12

Highlight

Copy