Cakacaka 15

Na Bose mai Jerusalemi

1Era a lako sobu mai Jutia ki Anitioki eso na tamata, ka vakatekivu vakatavulica vei ira na vakabauta ni ra na sega ni vakabulai kevaka era sega ni cili me vaka na ka e kaya na Lawa i Mosese.#Vsoro 12.3 2E rau a veileti vakalevu ka veiba kina kei ira o Paula kei Panapasa. Era sa mani lesi Paula kina kei Panapasa kei iratou tale eso vei ira mai Anitioki me ratou lako cake ki Jerusalemi kivei iratou na i apositolo kei ira na qase ni lotu ena vuku ni ka o ya.

3Era sa qai talaci iratou o ira na i soqosoqo lewenilotu, ka ratou sa lakovi Finisia kei Samaria ka talanoataka na nodra sa gole na kai matanitu tani vua na Kalou. Era sa marau vakalevu na vakabauta ena i tukutuku o ya. 4Ni ratou sa yaco yani ki Jerusalemi, era sa kidavaki iratou sara mai na i soqosoqo lotu kei iratou na i apositolo kei ira na qase, ka ratou sa qai tukuna na veika kecega ka sa cakava vata kei iratou na Kalou. 5Ia era sa qai tu cake eso na nodra i lawalawa na Farisi ka ra sa vakabauta, ka kaya, “Sa dodonu me ra cilivi o ira oqori, ka me ra vakaroti talega me ra muria na Lawa i Mosese.”

Na Vosa i Pita

6Era sa qai soqoni vata o iratou na i apositolo kei ira na qase me ra bosea na ka o ya. 7Ia ni sa oti e dua na veileti balavu, sa qai tu cake o Pita ka kaya, “Oi kemuni na veiwekani, o ni sa kila ni sa dede toka na gauna ka a digitaki au kina na Kalou mai na keda maliwa me'u vunautaka na i Tukutuku Vinaka vei ira na kai matanitu tani me rawa ni ra rogoca ka vakabauta.#Caka 10.1-43 8A sa vakadinadinataka na ka oqo vei ira na Kalou, o koya sa kila na loma ni tamata kecega, ena nona solia vei ira na Yalo Tabu me vaka ga na nona a solia vei keda.#Caka 10.44; Caka 2.4 9E a sega ni vakaduiduitaki keda mai vei ira, ni sa bokoca na nodra i valavala ca o koya ena vakabauta. 10A cava na vuna o ni qai via vakatovolea kina na Kalou mo ni vakataqara ena domodra na tisaipeli na i colacola ka ra a sega mada ga ni colata rawa o ira na noda qase se oi keda? 11E sega! Keirau sa vakabauta ni da na vakabulai ga ena vuku ni nona loloma-savu na Turaga o Jisu, ka sa vaka talega kina o ira.”

12Era sa qai tiko vakanomodi na lewe ni bose taucoko, ka vakarogoci Panapasa kei Paula ni rau sa talanoataka na veicakacaka mana kecega kei na veika veivakurabuitaki ka a cakava na Kalou ena ligadrau ena kedra maliwa na kai matanitu tani. 13Ni rau sa tukutuku oti, sa qai vosa cake o Jemesa ka kaya, “Kemuni na veiwekani, ni rogoci au mada! 14Sa qai tukuna oti ga oqo o Saimoni na i matai ni gauna me kauta mai kina eso na kai matanitu tani na Kalou, me ra nona. 15Koya e duavata kei na nodra vosa na parofita, me vaka sa volai tu ena i Vola Tabu:

16‘Ni sa oti o ya au na lesu mai, sa kaya na Turaga,

Ka'u na vakatikora lesu tale na matanitu i Tevita.

Au na tara vou na veitikina sa vakacacani

Ka vakaukauwataka tale.#Emo 9.11,12 (LXX)

17Era sa na qai lako mai kina vei au o ira na kena vo ni tamata

Kei ira na veimatanitu tani kecega;

O ira au sa vakatoka me ra noqu.

18Sa i koya o ya na ka e kaya na Turaga,

O koya ka a sa vakatakila tu na veika oqo mai na gauna makawa sara.’

19A tomana o Jemesa na nona vosa ka kaya, “Sa noqu lewa kina vakaoqo me da kakua ni vakavu leqa vei ira na kai matanitu tani era sa saumaki vua na Kalou; 20ia me da volavola ga vei ira me ra kakua ni kania na kakana dukadukali era sa vakacabori oti tu vei ira na kalou matakau; me ra kakua ni veibutakoci, se kania e dua na manumanu e vakamatei ni kuna se modroki na domona; ka me ra kakua talega ni gunuva se kania na dra.#Lako 34.15-17; Vsoro 18.6-23; Vsoro 17.10-16 21Ni sa dau taura e dua na gauna balavu sara na kena wiliki na Lawa i Mosese ena nodra veivalenilotu na Jiu ena Siga ni Vakacecegu kece sara, ka sa dau vunautaki na nona vosa ena veikorokoro.”

Na i Vola vei Ira na Kai Veimatanitu Tani Era sa Vakabauta

22E ratou sa qai lewa na i apositolo kei ira na qase, kei ira na i soqosoqo lotu taucoko me ra digitaka eso na tamata mai na kedra maliwa, ka talai ira me ra lako vata kei rau o Paula kei Panapasa ki Anitioki. Era sa qai digitaki Jutasa, ka yacana talega o Parisapa, kei Sailasa; e rau tamata dokai vakalevu vei ira na vakabauta oi rau oqo. 23Sa qai vakaoqo na vosa ni vola era vakauta:

“Mai vei keitou na i apositolo kei ira na qase, na wekamuni, keimami vakabula yani vei kemuni na weka na lewe ni veimatanitu tani o ni tiko mai Anitioki kei Siria kei Silisia. 24Keimami sa mai rogoca ni so era a cavutu yani eke era sa la'ki vakaleqai kemuni tiko ena ka era kaya, ka sa veilecayaki kina na nomuni vakasama. Ia keimami a sega ni solia yani e dua na i vakaro vei ira. 25Keimami sa mani lomavata kece sara kina ka digitaka e lewe rua vei keimami me rau talai yani vei kemuni, me rau lako vata yani kei rau na noda i tokani o Panapasa kei Paula, 26oi rau ka rau sa solia tu na nodrau bula ki na yaca ni Turaga o Jisu Karisito. 27Sa i koya o ya keimami sa talai Jutasa yani kina kei Sailasa, ka rau na tukuna talega ena gusudrau na veika keimami sa vola tiko yani oqo. 28Keimami sa duavata kei na Yalo Tabu me sa kakua ni dua tale na i colacola e soli vei kemuni me i kuri ni veika bibi ga eso ka sa koto oqo: 29O ya mo ni kakua ni kania e dua na ka sa vakacabori oti kivei ira na kalou matakau; ni kakua ni gunuva se kania na dra, se kania na manumanu ka vakamatei ni modroki na domona; ka kakua talega ni veibutakoci. Kevaka o ni sa qarauni kemuni mai na veika oqori, sa na daumaka sara. Ni sa moce.”

O Iratou na i Apositolo mai Anitioki

30Sa mani yaco na veitalatala ka ratou sa lako sobu sara ki Anitioki. Ni ratou sa yaco yani, e ratou sa qai vakasoqoni ira vata kece na vakabauta ka solia vei ira na i vola. 31Ia ni ra sa wilika na i vola, era sa sinai ena marau ena vuku ni vosa ni veivakayaloqaqataki e koto kina. 32E rau sa qai vosa vakabalavu o Jutasa kei Sailasa, ka ni rau parofita talega oi rau. E rau vakauqeti ira na vakabauta ka vakataudeitaki ira talega. 33Ni oti e vica na siga na nodratou tiko e kea, era sa qai vakasukai rau tale ena vakacegu o ira na veiwekani kivei ira ka a talai rau yani. 34[Ia sa mani loma i Sailasa me sa tiko ga e kea.]

35E rau sa mani tiko voli ga o Paula kei Panapasa mai Anitioki, ka rau vakatavuvulitaka ka vunautaka na vosa ni Turaga, vata kei ira e lewe vuqa.

E Rau sa Tawase o Paula kei Panapasa

36Ni oti e vica na siga, sa qai kaya o Paula vei Panapasa, “Me daru lako tale mada ka talevi ira na veiwekani ena veikoro e daru sa vunautaka oti kina na vosa ni Turaga, se sa vakaevei tiko na nodra bula.” 37A mani vinakata o Panapasa me rau kauti Joni Marika. 38Ia sa nanuma o Paula ni sega ni dodonu me rau kauti koya, baleta ni a sega ni vakaotia vata kei rau na nodrau veiqaravi ni veivakalotutaki taumada, ia sa vuki ga ka biuti rau mai Pamifilia.#Caka 13.13 39A yaco kina e dua na veileti katakata, ka rau sa tawase kina o Paula kei Panapasa. Sa mani kauti Marika o Panapasa ka rau soko sara ki Saipurusi. 40Ia sa digitaki Sailasa o Paula ka rau mai lako sara yani, ni sa oti na nodra tataunaki rau ki na loloma-savu ni Kalou o ira na veiwekani. 41E a lakova na lomai Siria kei Silisia o Paula ka vakaukauwataki ira na veisoqosoqo lewenilotu e kea.

Currently Selected:

Cakacaka 15: FNVDC12

Highlight

Copy