Cakacaka 14

Mai Ikoniumi

1E a yaco vakakina mai Ikoniumi. E rau a lako ki na nodra valenilotu na Jiu o Paula kei Panapasa ka sa mana vakalevu na nodrau i vunau ka yaco me ra vakabauta kina e lewe vuqa na Jiu kei ira na kai matanitu tani. 2Ia o ira na Jiu ka ra sega ni vakabauta era sa qai vakauqeti ira ga na kai matanitu tani me ra saqati ira era sa yaco me ra vakabauta. 3E rau sa mani tiko kina vakadede na i apositolo ka vosa vakadodonu tiko ena vuku ni Turaga. A sa vakadeitaka na Turaga ni sa dina na nodrau i tukutuku me baleta na nona loloma-savu, ena kaukauwa sa solia vei rau me rau cakava rawa kina na veicakacaka mana kei na veika veivakurabuitaki. 4Era sa mani tawase rua na lewe vuqa ena koro o ya; e dua na i wase era to vei ira na Jiu, ka dua tale na i wase era to vei rau na i apositolo.

5Ia era sa qai nakita eso na Jiu kei ira eso na kai matanitu tani me ra vakasosataki rau ka vakaviriki rau ena vatu. 6Ia ni rau sa kila na i apositolo na ka o ya e rau sa qai dro ki na koro o Lisitira, kei Tapi mai Likeonia kei na veivanua vakavolivolita, 7ka rau vunautaka kina na i Tukutuku Vinaka.

Mai Lisitira kei Tapi

8E a tiko mai Lisitira e dua na tamata lokiloki; sa lokiloki sara tu ga mai ni sa qai sucu, ka sega sara ga ni bau lako rawa. 9E a vakarogoci Paula tiko o koya ena gauna e vosa tiko kina. A sa wanonovi koya matua o Paula, ka raica ni sa tu vua na vakabauta me vakabulai kina. 10Sa qai kaya ena domo levu o Paula, “Tu cake vakadodonu e yavamu!” Sa qai lade cake sara o koya ka tekivu me veilakoyaki. 11Ia ni ra sa raica na lewe vuqa na ka sa cakava o Paula, era sa qai tabalaka cake na domodra ka kaya ena vosa vaka-Likeonia, “Era sa rairai mai vakatamata vei keda na veikalou!” 12Era sa vakatokai Panapasa me o Seusi, kei Paula me o Eremasi, ni sai koya ka dau vosa tiko vei rau. 13E vaka talega kina na bete i Seusi ka tiko na nona burekalou ena matamata ki na koro. Sa kauta yani ki na matamata ni koro eso na bulumakau kei na so na senikau, ka vinakata me ra vakacaboisoro vata kei ira na lewe vuqa vei rau na i apositolo.

14Ni rau sa rogoca o Panapasa kei Paula, e rau sa qai dresulaka na nodrau i sulu, ka cici yani ki na kedra maliwa na lewe vuqa, 15ka qolouvaka, “Oi kemuni na turaga, a cava o ni sa cakava kina na veika oqo? Keirau tamata talega vakataki kemuni o keirau! Ia keirau sa mai vunautaka vei kemuni na i Tukutuku Vinaka mo ni saumaki tani kina mai na veika tawayaga vakaoqo, ka vakanamata vua na Kalou bula, o koya sa bulia na lomalagi kei na vuravura, kei na wasawasa kei na veika kecega sa tu kina.#Lako 20.11; Same 146.6 16E a laivi ira na veimatanitu o koya ena veitabatamata sa oti yani me ra dui muria ga na nodra sala. 17Ia sa sega ga ni laiva o koya me sega na nona i vakadinadina, ka ni sa dau caka vinaka tikoga, ka dau solia mai vei kemuni na uca mai lomalagi kei na vuata ena kena gauna. Sa dau solia vei kemuni na kakana ka sa vakamarautaka na lomamuni.” 18Ia ni sa tau oti na vosa o ya, e se dredre ga na tarovi ira rawa na lewe vuqa, ni ra sa via vakacaboisoro tikoga vei rau.

19Era sa lako mai eso na Jiu mai Anitioki e Pisitia, vata kei Ikoniumi, ka ra sa rawai ira na lewe vuqa me ra tokoni ira. Era sa qai vakaviriki Paula ena vatu ka yarataka yani ki na i bili ni koro, ni ra nanuma ni sa mate. 20Ia ni ra sa mai tu vakavolivoliti koya na tisaipeli, sa qai tu cake mai ka lako sara ki na koro. Ena siga ka tarava, e rau sa lako sara yani kei Panapasa ki Tapi.

Lesu Tale ki Anitioki mai Siria

21E kea e rau sa vunautaka kina na i Tukutuku Vinaka, ia ni rau sa rawa oti kina eso na tisaipeli, e rau sa qai lesu yani ki Lisitira, kei Ikoniumi kei Anitioki. 22E rau sa vakadeitaka na lomadra na tisaipeli ka vakauqeti ira me ra tu dei ena vakabauta, ka kaya, “Sa dodonu me da na sota kei na vuqa na ka rarawa ena noda curu ki na Matanitu ni Kalou.” 23E rau sa qai lesia eso me nodra qase ena veivavakoso lotu. Ni sa oti na nodra masumasu kei na lolo, e rau sa qai tataunaki ira ki vua na Turaga, o koya era sa vakabauta.

24Ni rau sa lakova oti na vanua vaka-Pisitia, e rau sa mani yaco ki Pamifilia. 25E kea e rau sa qai vunautaka kina na i tukutuku vinaka ena koro o Perika. Oti o ya e rau sa gole ki Atalia. 26Mai kea e rau sa qai soko ki Anitioki, mai Siria, na koro e rau a vakacabori taumada kina ki na loloma-savu ni Kalou me baleta na cakacaka e rau sa qai vakaotia mai o ya.

27Ni rau sa yaco ki Anitioki, e rau sa vakasoqoni ira vata sara na i soqosoqo lotu ka tukuna vei ira na veika kecega sa cakava vata na Kalou vata kei rau, kei na nona sa dolava na katuba ni vakabauta vei ira na kai matanitu tani. 28E rau a tiko e kea vata kei ira na tamata vakabauta ena dua na gauna balavu.

Currently Selected:

Cakacaka 14: FNVDC12

Highlight

Copy