YouVersion Logo
Search Icon

Cakacaka 18

18
Mai Korinica
1Ni oti o ya, sa qai biuti Aceni o Paula ka lako sara ki na koro o Korinica. 2A sa sotava kina o koya maikea e dua na Jiu, o Akuila na yacana. E a sucu mai Ponito o koya, ka rau sa qai lako walega yani o ya mai Itali kei na watina o Virisila ni sa vakarota na tui o Kilotiu me ra vagalala tani mai Roma o ira kece na Jiu. Sa qai lako yani o Paula me la'ki raici rau, 3a sa mani tiko vata sara kei rau ka ratou cakacaka vata, baleta ni ratou sa dau caka valelaca kece sara. 4Ena Siga ni Vakacecegu kece sara, sa dau la'ki veivosaki o koya ena nodra veivalenilotu na Jiu, ka tovolea me rawai ira na Jiu kei ira na kai Kirisi mai na nona i vakamacala.
5Ni rau sa yaco yani o Sailasa kei Timoci ena nodrau i lakolako mai Masitonia, sa qai solia vakatabakidua na nona gauna taucoko sara o Paula me vunau kina, ka tukuniyalotaka tiko vei ira na Jiu ni sai Jisu dina ga na Mesaia. 6Ia ena gauna era sa saqati Paula ka vosavakacacataki koya kina, sa qai kureitaka na kuvu ni qele mai na nona i sulu ka kaya vei ira, “Kevaka o ni sa rusa, io sa bale ga vei kemuni oqori! Sa sega ni bale vei au. Me tekivu mai na gauna oqo ka lako yani, au sa na golevi ira na kai matanitu tani.” 7E a mani biuti ira kina o Paula ka la'ki vakaitikotiko ena nona vale e dua na kai matanitu tani, o Taito Jasitu na yacana, ka sa dau qarava na Kalou o koya; a sa toka tarava ga na nodra valenilotu na Jiu na nona vale. 8Sa mani vakabauta talega o Kirisipo, na i vakailesilesi liu ni valenilotu, kei iratou kece na nona matavuvale. Era sa vakabauta ka papitaisotaki talega e lewe vuqa na kai Korinica ni ra sa rogoca na i Tukutuku Vinaka.
9A sa vosa na Turaga vei Paula ena raivotu ena dua na bogi, ka sa kaya, “Kakua ni rere! Mo vosa tikoga, ka kakua ni galu, 10ni'u sa tiko vata kei iko. Ena sega ni dua ena rawa ni vakamavoataki iko, ka ni ra sa lewe levu vei ira na tiko ena koro oqo era sa noqu tamata.” 11Sa mani tiko kina e kea o Paula me dua veimama na yabaki, ka vakatavulici ira tiko ena vosa ni Kalou.
Era sa Vesuki Paula na Jiu
12Ia ena gauna e kovana tiko kina mai na yasana o Akaia o Kalio, era a qai soqoni vata na Jiu ka tauri Paula vakaukauwa ka kauta ki na mataveilewai, ka la'ki kaya kina, 13“Na tamata oqo e vakasagai ira tiko na tamata me ra lotu vua na Kalou ena dua na i vakarau sa sega ni dodonu vakalawa!”
14Ia ni sa vakarau me vosa o Paula, sa qai kaya vei ira na Jiu o Kalio, “Oi kemuni na Jiu, kevaka e baleta e dua na caka cala se dua na vakacaca levu na ka oqo, ke a dodonu me'u kauwaitaki kemuni kina. 15Ia kevaka e baleta ga na vosa se yaca eso kei na nomuni lawa, o kemuni ga mo ni vakatulewa kina. Au sega ni vinakata me'u turaganilewa ni veika vakaoqo.” 16Oti o ya sa qai vakasavi ira tani mai na vanua ni veilewai. 17Era sa qai tauri Sosiceni, na i liuliu ni valenilotu, ka vaculaki koya ena mata ni vale ni veilewai; ia sa sega sara ni bau kauwai ena ka o ya o Kalio.
Lesu Tale ki Anitioki
18E a tiko voli e kea o Paula ena vica tale na siga, ka sa qai tatau vei ira na vakabauta ka soko ki na nodra vanua na kai Siria, ka rau soko vata kei koya o Akuila kei Virisila. Ia ni bera ni ratou biuti Kenikiria sa tasivoritaki na ulu i Paula ena vuku ni dua na bubului ka a cakava e kea o koya.#Tiko 6.18 19Ni ratou sa yaco ki na koro o Efeso, sa mani la'ki biuti rau o Akuila kei Virisila o koya ka curu sara ki na nodra valenilotu na Jiu ka vakatavulici ira. 20Era a kerei Paula me tiko vakalailai tale mada kei ira, ia sa mani sega ni vakadonuya, 21ka kaya ga ni sa tatau me lako, “Au na lesu tale mai vei kemuni, kevaka ena vakakina na loma ni Kalou.” Oti o ya sa mai biu sara yani o Efeso.
22Ia ni sa yaco yani ki Sisaria sa lako cake sara ki na vanua o Jerusalemi me veikidavaki kei ira na i soqosoqo lewenilotu. Oti o ya sa qai lako sobu tale ki baravi ki na koro o Anitioki. 23Ni oti ga e vica na gauna na nona tiko e kea, sa biuta tale ka lakova na veikoro ena yasayasa vaka-Kalatia kei Firijia, ka vakayaloqaqataki ira kece era sa lotu.
O Apolosi mai Efeso kei Korinica
24Ena gauna o ya, sa qai yaco yani kina ki Efeso e dua na Jiu, o Apolosi na yacana, ka a sucu mai na koro o Alekisadria. E tamata matai sara ena vosa o koya ka sa kila vinaka talega na i Vola Tabu. 25A sa tuberi oti o koya ena Sala ni Turaga, ka sa dau qacoya ni vosa se vakatavuvulitaka vakadodonu na veika me baleti Jisu; ia e se kila wale tikoga o koya na papitaiso i Joni. 26A sa qai tekivu me vosa doudou o koya ena loma ni valenilotu. Ni rau sa rogoci koya o Virisila kei Akuila, e rau sa qai kauti koya ki na nodrau vale ka vakamacalataka vakavinaka sara vua na Sala ni Kalou. 27Sa qai vakatulewataka o Apolosi me lako ki Akaia, ka ra veivuke kina vua o ira na vakabauta mai Efeso ena nodra volavola vei ira na vakabauta mai Akaia ka tataunaki koya vakabibi vei ira. Ni sa yaco yani, sa vukei ira sara vakalevu na tamata era sa yaco me ra vakabauta ena vuku ni loloma-savu ni Kalou. 28Ena vuku ni nona gusu matata ena vakamacala kei na laulau ni nona i vunau, a sa vakadrukai ira na Jiu ena veileti e matana levu ni sa vakadinadinataka o koya mai na i Vola Tabu ni sai Jisu dina ga na Mesaia.

Currently Selected:

Cakacaka 18: FNVDC12

Highlight

Share

Copy

None

Want to have your highlights saved across all your devices? Sign up or sign in