Mateo 23

Fariseohua'ire Cui'ne Cua̱ñese'e Ye'yacohua'ire Sa̱ñope Case'ere

(Mr 12.38-40; Lc 11.37-54; 20.45-47)

1Ja̱ maca Jesupi capi, pa̱ire cui'ne i̱ ye'yacohua'ire:

2“Cua̱ñese'e ye'yacohua'i cui'ne fariseo pa̱i cato Moisésje̱ pa'iohua'i a'ë. 3Ja̱je pa'ina, mësaru si'aye ja̱ohua'i caye sehuocaiye pa'iji. Ja̱je pa'iquëta'are i̱ohua'i yo'oyere ye'yema'pë pa'ijë̱'ë. Ja̱ohua'i cato ñeje yo'oye pa'iji casicohua'ipi i̱ohua'i case'ere yo'oma'pë ai yequere yo'ocohua'i a'ë. 4Ja̱ohua'i cato hue'ocaiyë, dëquëyere pare. Quëco ëa ma'ñere pare ja̱re pa̱ipi hue'eja̱jë cajë yo'oyë. Ja̱je yo'ojëta'a i̱ohua'i cato moño maca pu̱'peyeque coecohua'i a'ë. 5Si'aye i̱ohua'i yo'oye cato pa̱ipi ñajajë cajë yo'oye a'ë. Ja̱je pa'ina, tsia ti̱ñare pana cui'ne ta̱ta tuna ca̱ña ca̱'tina Maija'quë coca ayepi toyase'ere sëoni ju'ijë cu'iyë. Cui'ne ju'i ca̱ niamoaja'a de'oyerepa tsoa ca̱ña nëojë huatose'ere ju'iyë, yequë pa̱i ju'iye se̱ña maca de'oyere. 6De'o hue̱'ñana a̱o a̱iñere yëcohua'i a'ë. Cui'ne sihua cua̱ñocohua'i ñu'i saihuëna ja'ruye yëcohua'i a'ë, pa̱i tsi'si hue̱'ñana. 7Cui'ne pa̱ipi de'oyerepa ëjaohua'i a'ë cajë ca'rajë pëpayere yëcohua'i a'ë.

8Ja̱je ja̱ohua'i yo'ocohua'ita'are mësaru cato pa̱ipi ye'yacohua'i a'ë hue'yoja̱jë cajë yo'oma'pë pa'ijë̱'ë. Ja̱je pa'ina, si'aohua'i mësaru cato te'e yo'je tsi̱ a'ë. Cui'ne te'ere ye'yaquëre pacohua'i a'ë, Cristore. 9Ja'quë hue'yoma'pë pa'ijë̱'ë, te'ireje̱ iye yeja acohua'ire. Coa te'ire ma'tëmo pa'iquëse'ere ja'quëre payë, mësaru. 10Pa̱ipi mësarute ëjaohua'i a'ë, caja̱jë cajë yo'oma'pë pa'ijë̱'ë, te'i mësaru ëjaë Cristo pa'ito me ja̱je yo'oye. 11Ja̱je pa'ina, mësaru aquëpi yecohua'ire necaiquëpi ai jerepa pa'i pa'iji. 12I̱ja'a co'ye jerepa pa'i a'ë, cuasaquë cato meñe casa cua̱ñoñe pa'iji. Ja̱je pa'iquëta'are jerepa pa'i a'ë cuasama'quëni jerepa pa'ire neñe pa'iji.

13¡Teayerepa mësaru cua̱ñese'e ye'yacohua'i cui'ne fariseo pa̱i! Coa cacohua'i. Teayerepa mësaru cua̱ñese'e ye'yacohua'i cui'ne fariseo pa̱i, coa cacohua'i. ¿Me yo'ojë ma'tëmo caca sa'ro tëhuoye'ni? yecohua'i pa'ija̱jë cajë. Ja̱je yo'ojë mësaruje̱ cacama'pë yecohua'i cacañu'u cajë yo'ocohua'ireje̱ ë̱seyë.

14¡Teayerepa, mësaru cua̱ñese'e ye'yacohua'i cui'ne fariseo pa̱i. Coa cacohua'i! ¿Me neñu'u, cajë hua'jeohua'i huë̱'ña siojë yo'oye'ni, mësaru? Ja̱je yo'ocohua'ipi pa̱ipi de'ocohua'i a'ë cuasaja̱jë cajë tsoaye se̱ñë. Ja̱je yo'osi do'ire mësarute jerepa co'ayerepa sa̱iñe pa'iji.

15¡Teayerepa mësaru cua̱ñese'e ye'yacohua'i cui'ne fariseo pa̱i! ¡Coa cacohua'i! Mësaru cato cu'icohua'i a'ë, yeja cui'ne jai tsiaya pa̱ini mësaru sehuoyena ye'yañu'u cajë. Ja̱je yo'oroja̱ijë neni i̱ti sehuoquëni mësaru se̱ña maca cayaye jerepa co'aquëre neñë, toana uja̱'quëre.

16Teayerepa mësaru ñaco ca̱ peocohua'ije̱ pa'iohua'ipi yecohua'ire sacohua'i pa'iyë. Ja̱je pa'iohua'ipi cayë, ‘Maija'quë huë'e do'ipi ca nëose'e cato neñe peoji. Maija'quë huë'e pa'i oropi ca nëose'epi neñe pa'iji.’ 17Huesëohua'ipi cui'ne ñaco ca̱ peocohua'ije̱ pa'iohua'ipi. ¿Mësaru ñato je a'ni, i̱ti jerepa pa'ye, oro pa̱nita'a Maija'quë huë'epi orore Maija'quë tse̱ necaiye a'ni, i̱tirepa? 18Yequeje̱ mësaru cayë, ‘Maija'quëre i̱si saihuë do'ipi nesi'i ca nëoñe peoji.’ 19¡Huesëohua'i cui'ne ñaco ca̱ peocohua'ije̱ pa'iohua'i! ¿I̱que a'ni, jerepa pa'ye, ë̱mëje'e tuiye pa̱nita'a i̱ti saihuë, Maija'quë tse̱ necai saihuë? 20Ja̱je pa'ina, i̱ti saihuë do'ipi ca nëoquë pani coa i̱ose'ere cama'ë pa'iji. Si'aye i̱o ë̱mëje'e tuiye co̱ni caji. 21Cui'ne Maija'quë huë'e do'ipi ca nëoquë pani ja̱ro pa'iquëni Diusuni caye pa'iji. 22Cui'ne ma'tëmo do'ipi ca nëoquë pani Maija'quë ñu'i saihuëna caye pa'iji. Cui'ne i̱oni caquë Maija'quë i̱ote ñu'iquëni caye pa'iji.

23¡Teayerepa mësaru cua̱ñese'e ye'ya pa̱i cui'ne fariseo pa̱i! ¡Coa cacohua'i! Maija'quëre mësaru i̱siyë, menta, anis cui'ne comino a̱iñe së̱ñe neñere, diez ayere te'ore huase'ere. Ja̱je yo'ojëta'a cuasaye pa̱ñë, ai jerepa do'i quë'yere, nuñerepa pa'iyere, pa̱ire oiyere, cui'ne Maija'quëre pa'iji cuasayere. Iyeje̱ yo'ojë cui'ne ja̱ yë'ta'a yequeje̱ yo'oye pa'iji, je̱oma'pë. 24Ñaco ca̱ peocohua'ipi yecohua'ire sacohua'ipi pa'iyë, mësaru. Mi'are de'oye ñajë i̱ma je̱ocohua'ita'a camellore nëocohua'i a'ë.

25¡Teayerepa mësaru cua̱ñese'e ye'yacohua'i cui'ne fariseo pa̱i! ¡Coa cacohua'i! Ë̲mëje'ese'e u̱cu duruhuë̱a cui'ne quë̱na ne'ña tsoacohua'i a'ë. Sa̱'nahuë cato co'amaña yahue i̱mañe cui'ne te'ohua'i jaiye co'amaña pañu'u caye ti̱mësicohua'i pa'iyë. 26¡Fariseo, ñaco ca̱ peoquë! Du'ru macarepa u̱cu duruhuëre cui'ne quë̱na de'huare tsoajë̱'ë. Sa̱'nahuë pa'iyere jeteyo'je yureta'a hue'se pa'iyeje̱ si'si peoye pasipi.

27Teayerepa mësaru cua̱ñese'e ye'yacohua'i cui'ne fariseohua'i. Coa cacohua'i. Mësaru cato pa̱ire ta̱si darije̱ pa'iohua'i a'ë, huë'ese'e poja'icore tsoase'eje̱ pa'iohua'ipi. Ja̱je pa'iohua'ipi sa̱'nahuë cato ju̱'isi tara cui'ne si'aye si'si ti̱më huesësicohua'i a'ë. 28Ja̱je pa'iohua'i a'ë, mësaru, pa̱i ña hue̱'ñase'e de'ocohua'ipi. Sa̱'nahuë cato coa cosoyena cui'ne co'aye yo'oyena ti̱mësicohua'i a'ë.

29¡Teayerepa mësaru cua̱ñese'e ye'yacohua'i cui'ne Fariseo pa̱i! ¡Coa cacohua'i! Mësarupi de'oye necaicohua'i a'ë, cuasajë tsoe Maija'quëre quëacaicohua'i ju̱tena, ta̱si darire cui'ne de'o pa̱ipi ju̱'isicohua'ini i̱ohua'ire ta̱si darina quë̱na tupë̱a ëja de'huacohua'i a'ë. 30Ja̱je yo'ojë cayë: ‘Maipi mai aipë pa'inë pa'icohua'i pani co̱ huaiye pa̱ra'huë, Maija'quëre quëacaicohua'ire.’ 31Ja̱je iyere yo'ojë tsoe mësaruja̱'a ñañë, Maija'quëre quëacaicohua'ire huasi tsëcapë acohua'i a'ë cajë. 32¡Ja̱je pa'ito ja̱ macaja̱'a yo'o tëjijë̱'ë, mësaru aipë yo'o huëojë pa'ise'e! 33¡A̲ñaohua'i! ¡A̲ña tsëcapë! ¿Me jëaja̱'cohua'i a'ni, mësaru toa yeja uye? 34Mësarupi yo'o saoja̱jë iyere caquë jëjo daoja̱'quë a'ë, yequë mu'seña pa'i ja̱'ñe quëacohua'ire, ta̱'ñe asacohua'ire, cui'ne cua̱ñese'ere ye'yacohua'ire. Ja̱je pa'iquëta'are mësarupi yecohua'ire huani je̱ojë so̱quë sarahuana que̱ni huani je̱ojë yo'oja̱'cohua'i a'ë. Ja̱ohua'i acohua'ire cui'ne yecohua'ini tsi'si huë̱'ñana tse̱ani të'caja̱'cohua'i a'ë. Cui'ne si'a pa̱i dari ñape co'eroja̱ijë jo̱sa yo'oja̱'cohua'i a'ë. 35Ja̱je yo'ojëna, mësaruna si'a de'o pa̱ire huani je̱osi do'i to̱meja'coa. Nuñerepa yo'oquë Abelre huani je̱osi macapi Zacarias, Berequías mamaquëre huani je̱osi macana, ëojë se̱ saihuë cui'ne de'o hue̱'ña jopo sa'rona mësaru huani je̱osiquëna to̱mesipi. 36Nuñerepa cayë. Si'aye iye do'i cato yure pa'i pa̱ipi sa̱iñe to̱meja'coa.

Jerusalén Pa̱ire Jesús Ñaquë Oiye

(Lc 13.34-35)

37Jerusalén, Jerusalén, yequë mu'se pa'i ja̱'ñe quëacohua'ire cui'ne Maija'quë coca quëacohua'ire më'ëni caquë Maija'quë jëjo daoquëna, huani je̱ohuë, mësaru. Yo'ojëta'are de'huerepa më'ë mamajëre tsisosi'i caquë yo'ohuë, cura mamajëre i̱o capë̱a huë'ehuëna de'huasi'i caco yo'oyeje̱. Yo'oquëna, coehuë. 38Ñajë'ë. Yure mësaru huë'e je̱ocosico pa'ico. 39Nuñerepa cayë. Yë'ëre mësaru ña co̱ñe pa̱ja'cohua'i a'ë, ‘mësarupi de'oquëre pa'ni ëjaë mamirepa hue'equë daiquë’ ca maca ti̱'añe pa̱to.”

Currently Selected:

Mateo 23: sey

Highlight

Copy