Mateo 24

Maija'quë Huë'e Nejosico Pa'i Ja̱'ñe

(Mr 13.1-2; Lc 21.5-6)

1Jesupi Maija'quë huë'epi etani je̱'në saina, i̱ ye'yacohua'ipi tsio dani i̱te Maija'quë se̱ huë'e ayere ñajë ca huëohuë. 2Cajëna, Jesupi capi:

“¿Si'aye mësaru ñañe? De'oji, nuñerepa mësarute cayë. Si'aye ja̱ mësaru ñañe nejose'e pa'ija̱'coa. Iye maca ti te'e quë̱na pëje̱ jupë u̱iñe pa̱ja'coa.”

Ja̱ Yë'ta'a Yeja Caraja̱ima'ñë I̱ño Ja̱'ñe

(Mr 13.3-23; Lc 21.7-24; 17.22-24)

3Ja̱ maca Olivos cu̱tihuëna saë'ë. Sani Jesús ja'runi ñu'ina, i̱ ye'yacohua'ipi i̱te yahuerepa cahuë:

“I̱na, yëquëre quëajë̱'ë. ¿Je yëhua ja̱je yo'oja̱coa'ni? ¿Me i̱ñoñe pa'ija̱'coa'ni, më'ë daiye cui'ne yeja caraja̱iñe?” 4Cajëna, Jesupi capi:

“De'hua ñajë pa'ijë̱'ë, mësarute yecohua'ipi coso huesojë. 5Jai pa̱i yë'ë mamipi cajë daija̱'cohua'i a'ë: ‘Yë'ë a'ë, Cristo’ cajë. Cajëna, jai pa̱i i̱ohua'ire tuija̱'cohua'i a'ë. 6Si'a hue̱'ña sa̱'ñe huajo huaiyere mësaru asaja̱'cohua'i a'ë. Asani quëquëma'pë pa'ijë̱'ë. Ja̱re ja̱je tëto saiye pa'iji. Pa'iquëta'a ja̱ yë'ta'a tëjiye peoji. 7Yequë yeja pa'icohua'ipi yequë yeja pa'icohua'ire se uihuaja̱'cohua'i a'ë. Cui'ne yequë pa̱ipi yequë pa̱ini se uihuaja̱'cohua'i a'ë. Cui'ne a̱iñeje peoquëna, a̱i ëa ju̱'ija'cohua'i a'ë. Cui'ne yeja ñu'cueye pa'ija̱'coa, yequë hue̱'ña ñape. 8Iye cato ja̱'a ai yo'o huëoyepi pa'ija̱'coa.

9Cui'ne yë'ë do'ire mësarute co'aye yo'ojë tse̱ani yecohua'ina i̱sijë cui'ne huani je̱ojë yo'ojë cui'ne si'a pa̱i mësarute coeja̱'cohua'i a'ë. 10Ja̱ mu'seña ai Maija'quëre cuasase'e nejo huesoja̱'cohua'i a'ë. Ja̱je yo'ojë yecohua'ire coejë cajeohua'ije̱ pa'iohua'ita'a sa̱ñope yo'ocohua'i pa'ija̱'cohua'i a'ë. 11Cui'ne jai pa̱i coa cosocohua'ije̱ pa'ija̱'cohua'i a'ë, Maija'quëre quëacaicohua'i a'ë cacohua'ije̱. Ja̱je yo'ojëna, jai pa̱i cosoyere asaja̱'cohua'i a'ë. 12Cui'ne ja̱je jaiye co'aye pa'ina, yo'ojë jai pa̱i pa̱ire oiye je̱oja'cohua'i a'ë. 13Ja̱je pa'iquëta'are i̱ti quëcoquë nuiñe pa'isiquëpi ja̱ëpi huasosiquë pasipi. 14Cui'ne iye de'o cocaje̱ si'a hue̱'ña yeja pa'icohua'ire quëase'e pa'ija̱'coa, ja̱ohua'ije̱ asaja̱jë cajë. Ja̱ macata'a ti̱'aja'coa, caraja̱iñerepa. 15Maija'quëre quëacaiquë Daniel toyapi, pa̱ire co'a de'huaquë cui'ne pa̱ire ne huesoquë yo'oye ayere. Ja̱je pa'ina, iquëpi si'si peo hue̱'ñana ti̱'asi maca ñani toya ja'o ñaquëpi asaye pa'iji, ti̱'api, caquë. 16Ja̱ maca Judea pa'icohua'ipi catiye pa'iji, ai cu̱tina. 17Huë'e ë̱mëje'e totore pa'iquë pani cajeye peoji, sa̱'nahuë co'amaña pa'iye i̱si'i caquë. 18Cui'ne tsiore pa'iquë pani co'iye peoji, ca̱ña i̱masi'i caquë. 19Teayerepa ja̱ mu'seña nomiohua'i tsi̱ ë̱tapë̱a pa'icohua'i cui'ne oje tsu̱'sucohua'ire pacohua'i maña ai yo'oja̱'cohua'i a'ë. 20Ja̱je pa'ina, se̱jë'ë, Maija'quëre sësë tëcahuë catiye peoja̱'core, cui'ne huajë mu'seña catiye peoja̱'core. 21Ja̱ mu'seña cato jaiye ai yo'oye pasipi, ja̱'a yeja de'huasi maca ti peose'epi jeteyo'jeje̱ peo ja̱'ñepi. 22Ja̱ mu'seña Maija'quëpi tëama'quë pa'ito te'i macaje̱ huaso cua̱ñoñe peora'pi. Ja̱je pa'iquëta'are Maija'quëpi i̱ jo'ya nesicohua'ini oi tëaja̱'quë api.

23Mësarute yecohua'ipi caja̱'cohua'i a'ë: ‘Ñajë'ë, i̱ñore pa'iji, Cristo pa̱nita'a Ñajë'ë, ja̱rote pa'iji.’ Ja̱je catoje̱ carepa ma'ñe cuasama'pë pa'ijë̱'ë. 24Daija̱'cohua'i a'ë, yë'ë Cristo a'ë, cacohua'i coa cosocohua'ipi. Cui'ne Maija'quë coca quëacaicohua'i a'ë, cacohua'ipi. Ja̱ohua'ipi cui'ne jaiye pa̱i yo'o ma'ñe ne i̱ñoja'cohua'i a'ë, coa cosoñu'u cajë. Ja̱je yo'ojëna, Maija'quërepa jo'ya nesicohua'ije̱ care payë cajë sehuoja̱'cohua'i a'ë, a̱'ji sehuocohua'i cato. 25Ja̱je pa'ina, tsoe du'ru cahuë iye mësarute ja̱je yo'o ma'ñe caquë. 26Ja̱je pa'ina, yecohua'ipi mësarute ‘jeto cue̱ne yejare pa'iji, ñajë'ë’ cacohua'i pa'ito saima'pë pa̱nita'a yeque ‘Ñajë'ë, i̱ño tu'rihuëre pa'iji,’ catoje̱ asama'pë pa'ijë̱'ë. 27Pa̱i Mamaquë daiyerepa cato ë̱së mëi hue̱'ñapi cui'ne ë̱së sa du'i hue̱'ñana mujuë ye'hueyeje̱ pa'yerepa pa'ija̱'coa. 28Ju̱'isiquë ca̱pë pa'i hue̱'ñana ja̱rona pë'përi tsi'sija̱'cohua'i a'ë.

Pa̱i Mamaquë Dani Co̱ñe

(Mr 13.24-37; Lc 21.25-33; 17.26-30, 34-36)

29Esa ai yo'o mu'seña tëto sai maca ë̱së yayaja̱'quë api. Cui'ne ñañëje miama'ë pa'ija̱'quë api. Ma'ñocoje̱ ma'tëmopi to̱meja'cohua'i a'ë. Cui'ne ma'tëmo tutu pa'iyeque tsasija̱'coa. 30Ja̱ maca Pa̱i Mamaquë tutu yo'oye ñaja'cohua'i a'ë, ma'tëmopi yo'oquëna. Cui'ne si'a pa̱i dari yeja pa'icohua'i oija̱'cohua'i a'ë. Ja̱ maca ñaja'cohua'i a'ë, Pa̱i Mamaquë ma'tëmopi sirija̱'a daiye, tutu quë'ire papi cui'ne de'oyepi quëcosiquëpi daina. 31Ja̱ maca hui̱ñaohua'ire cua̱ñeja'quë api, i̱ sahuasicohua'ire cajese'e yeja te̱'ña, si'a yeja pa'icohua'ire tsi'sojë̱'ë, caquë ai tutu duruhuë juiyepi.

32Ye'yejë̱'ë, higuera so̱quë yë yo'oye ayere quëaquëna. Hui̱ña capë̱a pa'i maca ja'o etaquëna, mësaru ñani je̱'në utëcahuë ti̱'aquëna, yo'oji cacohua'i a'ë. 33Ja̱je cui'ne si'aye iye tëto saina, ñani je̱'në caraja̱i mu'seña ti̱'aquëna, eta sa'rore pa'ina, yo'oji cuasajë̱'ë. 34Nuñerepa cayë, mësarute. Si'aye iye yo'o ja̱'ñe a'ë, ja̱ yë'ta'a iye mu'seña pa̱i ju̱ju sama'pëna. 35Ma'tëmo cui'ne yeja caraja̱i ja̱'ñe a'ë. Yë'ë cocata'a ti caraja̱iñe pa̱ ja̱'ñe a'ë. Ja̱re i̱ti case'eje̱ ti̱'aquë pa'i ja̱'ñe a'ë.

36Ja̱je pa'iquëta'are peoji, i̱ti mu'serepa cui'ne hora quëaye. Huesëyë, yecohua'ije̱. Ma'tëmo pa'icohua'i hui̱ñaohua'ije̱ cui'ne Maija'quë mamaquëje̱ huesëji, coa Maija'quëse'e asaji, i̱ti.

37Noé pa'i mu'seña yo'ojë pa'ise'eje̱ pa'ye pasipi, Pa̱i Mamaquë dai macaje̱. 38Ja̱ mu'seña ja̱ yë'ta'a co'jema'në pa̱ipi a̱o a̱ijë, u̱cujë, nomi huejajë, cui'ne pëca ja'quëohua'ipi nomi tsi̱re huejojë paë'ë, Noé jai yohuëna caca macaja̱'a. 39Ja̱ huesëjëna, jai co'je dani si'aohua'ire peo hue̱'ña co'je hue̱a'co'ë. Ja̱je cui'ne pasipi, Pa̱i Mamaquë dai macaje̱. 40Ja̱ mu'seña caya ë̱mëohua'i tsiore pa'ija̱'cohua'i a'ë. Pa'ijëna, te'ire saquë cui'ne te'ire je̱osipi. 41Caya nomiohua'i hueare toaja̱'cohua'i a'ë. Toajëna, te'ore saquëna, cui'ne te'o je̱o saisico pa'ija̱'coa.

42Ëjaë daija̱'a maca huesëye sëte cui'ñasicohua'ipi pa'ijë̱'ë. 43Ja̱je pa'iquëta'are iyeje̱ asajë̱'ë, i̱ti huë'e aquëpi ñami ja̱ hora pa'i maca co'amaña ñaquë daija̱'quë api asaquë pani sëtasiquëpi i̱ huë'e co'amaña cacani i̱mañe ë̱seja̱'quë api. 44Ja̱je pa'ina, mësaruje̱ ne de'huasicohua'ipi pa'ijë̱'ë, mësaru hua̱nëyesi maca Pa̱i Mamaquë dani quëcoquë.

Nuñerepa De'o Jo'yaë Cui'ne Co'a Jo'yaë

(Lc 12.41-48)

45¿Jequë a'ni, nuñerepa de'o jo'yaë, cui'ne asaquërepa i̱ti ti̱'asi maca i̱ huë'e acohua'ire a̱ocaijë̱'ë, caquë je̱oni saisiquë? 46Sihua cua̱ñoja'quë api, i̱ ëjaë cua̱ñese'eje̱ yo'oquë pa'ina, ti̱tani ñasiquëpi. 47Nuñerepa cayë i̱ti tse̱ aquë si'aye i̱ paye ñacaijë̱'ë caquë cua̱ñe nëoja'quë api. 48Ja̱je pa'iquëta'are co'a jo'yaë pani cuasaji, tsoe nëija'quëre me je esa ti̱tasina, cuasaquë. 49I̱ ëjaë jo'yare co'aye yo'o huëoni cui'ne a̱o a̱i huëoni cui'ne co̱no u̱cu huëoni cuepecohua'i ja̱'re co̱ni yo'oquë pasipi. 50Pa'ina, ja̱ maca i̱ ëjaë co'isipi, i̱ jo'yaë hua̱nëyeni je dasina caquë utema'ë yo'o maca. 51Ja̱ maca i̱te ai co'ayerepa si'seni coa cacohua'ire nejoñepi nejoñe pa'iji. Ja̱ maca oisipi, cu̱jije qui̱'coquë.

Currently Selected:

Mateo 24: sey

Highlight

Copy