Mateo 22
22
Huejaye Fiesta
1Jesús ti̱jupë ca huëo co̱pi, pa̱i ñañe ayeja̱'a i̱ñoquë ñeje:
2“Ma'tëmo cato pa̱i ëjaëpi mamaquëre huejaquëna, sihuaquë pa̱ire tsi'soni yo'ose'eje̱ pa'ye a'ë. 3Ja̱je yo'oquë jëjo saopi, i̱ jo'yare, huëosicohua'ire quërëja̱ijë'ë, caquë. Ja̱je pa'iquëta'are huëosicohua'ipi daiye coehuë. 4Ti̱jupë i̱ jo'yare jëjo saoquë capi: ‘Quëajë̱'ë, soisicohua'ire. Tsoe si'aye a̱i ja̱'ñe de'hua saohuë. Hue̱quëreje̱ hui'yape quë'iohua'ini huani ne de'huahuë, huejaye ñaja'cohua'i daija̱jë caquë.’ 5Caquëna, asani i̱ case'e quëajëna, huëosicohua'i asacaima'pë paë'ë. Yequëpi tsiona saji'i. Yequë co'amaña i̱si sapi. 6Cui'ne yecohua'ipi ja̱ ëjaë jo'yare tse̱ani co'aye yo'ojë huani je̱ahuë. 7Ja̱ maca pa̱i ëjaë pë̱i i̱ soldado pa̱ire jëjo saopi, huaisicohua'ire. Huani je̱ani i̱ti daripëje̱ ëo je̱oja'cohua'ire. 8Ja̱ jeteyo'je capi, i̱ jo'yare. ‘Hueja a̱o ne de'huase'epi paji'i. Ja̱je pa'iquëta'are soisicohua'i daiye pa̱huë. Ja̱ soisicohua'i cato do'i peocohua'i paë'ë. 9Ja̱je pa'i do'ire jai ma'añana sani huëojë̱'ë. Coa si'aohua'ire ma'a pa'icohua'ire dajë̱'ë, hueja a̱o a̱ija'cohua'ire.’ 10Caëna, pa̱i ëjaë jo'yapi etani sani ma'aja'a cu'ijë co'acohua'ire cui'ne de'ocohua'ire si'sohuë, huë'e ti̱më huesëyerepa.
11Ja̱ maca ëjaë cacani soisicohua'ire ñapi. Ñaquëna, te'i hueja ca̱ña su̱ñama'quëpi ñuji'i. 12Ñani capi, i̱te: ‘¿Cajei, me më'ë i̱ño cacaë'ni, hueja ca̱ña su̱ñama'quë?’ Ja̱je caquëna, i̱pi ti sehuoma'ë paji'i. 13Cama'ëna, ja̱ maca pa̱i ëjaëpi mesa ñu'icohua'ire necaijë pa'icohua'ire capi: ‘Ja̱ëte tse̱ani nëcañoa cui'ne jë̱ña sëani je̱ocojë̱'ë, nea hue̱'ña hue'sena. Ja̱ropi oi cui'ne cu̱ji qui̱'coja̱quë.’ 14Ja̱je pa'ina, jai pa̱i pa'iyë, soisicohua'i. Ja̱je pa'iquëta'are a'ri maña pa'iyë, sahuani jo'ya nesicohua'i.”
Pa̱i Do'i Sa̱iñe Ayere Case'e
(Mr 12.13-17; Lc 20.20-26)
15Ja̱ maca fariseohua'ipi sani sa̱'ñe coca cajë te'e cuasahuë. Ja̱je cajëna, tayo sehuouna co'aye capi cajë ne ja̱'ñere. 16Ja̱je cani jëjo saohuë, i̱ohua'i acohua'ire Herodes tsëcapë acohua'ina co̱ni te'e Jesure caja̱'cohua'ire ñeje:
“Ye'yaquë, asayë, yëquë më'ë nuñerepa caquë pa'iye, cui'ne nuñerepa Maija'quë ma'are ye'yaquëpi pa̱i cayere asacaima'quëpi cui'ne pa̱i pa'iye ë̱mëjese'e ñaquë cama'quë pa'iye. 17¿Ja̱je pa'ipi me më'ë caquë'ni? ‘¿De'oquë pa'i do'ire si'a pa̱i ëjaë Césarna curi sa̱iñe pa̱nita'a pa̱ñe?’ ”
18Ja̱je cajëna, Jesús tsoe asapi, i̱ohua'i co'aye cuasajë se̱ñe. Ja̱je pa'ina, capi, ja̱ohua'ire:
“Coa cacohua'i, ¿Me yo'ojë yë'ëre cosojë neñu'u cajë caye'ni? 19I̱ñojë'ë, pa'i do'i sa̱i të'quire.”
Caquëna, te'e të'qui romano curi të'quire dahuë. 20Darena, Jesús ñani ja̱ohua'ire se̱ji'i:
“¿Ne tsiare hue'eco'ni, iye të'qui ico cui'ne ne mamire hue'eco'ni?”
21Caquëna, i̱ohua'ipi sehuohuë:
“Si'aohua'i ëjaërepa mamipi pa'iji.”
Cajëna, Jesupi capi, ja̱ohua'ire:
“I̱sijë̱'ë, pa̱i ëjaë tse̱co pa'ito ja̱re i̱ti tse̱ aquëna. Cui'ne Maija'quë tse̱ pa'ito ja̱re Maija'quëna i̱sijë̱'ë.”
22Caquëna, iyere asani ai cuasahuë. Ja̱je yo'oni i̱te je̱oni saë'ë.
Ju̱'isicohua'i Huëiye Pa'iquë Cajë Se̱ñe
(Mr 12.18-27; Lc 20.27-40)
23Ja̱re ja̱ mu'se saduceohua'i Jesure sani ñañu'u cajë saë'ë. Saduceo hua'i cato ju̱'isicohua'i huëiye peoji, cacohua'i a'ë. Ja̱je pa'iohua'ipi iyere cahuë, i̱te:
24“Ye'yaquë, Moisés capi, huejasiquëpi mamajëre peoquë ju̱'isiquë pa'ito yo'jeipi huejaye pa'iji, hua'jeore, maja'yë ju̱'isi do'ire mamajëre pacaija̱'quëpi. 25Yëquë acohua'ipi siete yo'je tsi̱ te'e tsëcapëre paë'ë. Pa'icohua'ipi du'ru maja'yëpi huejani ju̱ji'i, mamajëre peoquë. Ju̱'i yo'jeina je̱ocaji'i, nëjore. 26Ja̱ëje mamajëre peoquë ju̱ji'i. Ju̱quëna, toaso̱ñe aquë huejapi. Huejani ja̱re ja̱je peoquë ju̱ji'i. Ja̱jese'e si'a tsëcapë siete ju̱ju sahuë. 27Ai jeteyo'jerepa nomio ju̱co'ë, si'aohua'i ju̱tena. 28Ja̱je pa'ito ju̱'isicohua'i huëi maca ¿ne nëjo pa'ija̱'coa'ni, ja̱je si'aohua'i te'oni huejasico?”
29Jesupi sehuopi, ja̱ohua'ire: “Mësarupi tayo cuasayë, toyapë ñama'cohua'i sëte cui'ne Maija'quë tutu ñama'cohua'i sëte. 30Ju̱i'sicohua'ipi huëisicohua'i huejama'pë pa'ija̱'cohua'i a'ë. Cui'ne mamajë nomiohua'ire huejoma'pë pa'ija̱'cohua'i a'ë. Ma'tëmo acohua'i hui̱ñaohua'ije̱ pa'iohua'i pa'ija̱'cohua'i a'ë. 31Ja̱je pa'ito mësaru ju̱'isicohua'i huëiye aye Maija'quë case'ere toyase'e ñama'cohua'i a'ë. Toyase'e ñeje caji: 32‘Yë'ë cato Abraham, Isaac, cui'ne Jacobo Diusu a'ë.’ Diusu cato ju̱'isicohua'i Diusu peoji. Ja̱ë cato huajëcohua'i Diusu api.” 33Ja̱je caquëna, iyere pa̱i asani ai cuasahuë, me ja̱ jerepa ye'yaquë'ni, cuasajë.
Ai Jerepa Pa'ye Cua̱ñese'e
(Mr 12.28-34)
34Jesupi saduceo pa̱ire ti sehuoye peoyerepa ca huesopi, asani fariseo pa̱ipi tsi'sihuë, coca cañu'u cajë. Ja̱ maca dani 35Fariseo pa̱i aquëpi cua̱ñese'e ye'yaquëpi neñasi'i caquë i̱te se̱ji'i:
36“Ye'yaquë, ¿Jeco a'ni, cua̱ñese'e si'aye se̱ña maca pa'io pa̱ire ye'ya ja̱'ñe?”
37Se̱ina, Jesupi capi:
“Oijë̱'ë, më Ëjaë Diusure, si'a më joyopi, si'a më pa'iyepi cui'ne si'a më'ë cuasayepi. 38Iye a'ë, si'aye se̱ña maca jerepa pa'ye cui'ne du'ru macarepa cua̱ñese'e. 39Yecoje̱ ja̱re cui'ne pa'io. Ja̱opi caji, ñeje: ‘Oijë̱'ë, më quë̱no maca aquëre më'ëja'a co'ye cuasaquë oiyeje̱ pa'ye.’ 40Iye cayayena si'aye Moisés cua̱ñese'e cui'ne Maija'quëre quëacaicohua'i ye'yase'e meñe quëco paji.”
¿Ne Mamaquë A'ni, Cristo?
(Mr 12.35-37; Lc 20.41-44)
41Ja̱ yë'ta'a fariseohua'i tsi'sisicohua'i pa'ijëna, 42Jesús se̱ji'i, ja̱ohua'ire:
“¿Me cuasaye'ni, mësaru Cristore? ¿Ne mamaquë a'ni?” Caquëna, i̱ohua'ipi sehuohuë: “David mamaquë api, ja̱ë cato.”
43Ja̱ maca Jesupi capi, ja̱ohua'ire: “¿Ja̱je pa'iquëta'are David Maija'quë joyopi quëaquëna, Ëjaë hue'you'ni, i̱te? Ja̱je pa'ina, Davidpi capi:
44Ëjaëpi capi, yë'ë Ëjaëre:
‘Ja'rujë̱'ë, yë'ë ëja te̱'tena,
Më'ëre sa̱ñope yo'ocohua'ire më'ë quë̱o huë'ehuëna të'ya me macaja̱'a.’
45¿Me ja̱je pa'ito Cristo David mamaquë pa'iquë'ni, Davidpi Ëjaë i̱te hue'yoto?”
46Ja̱ maca te'ije̱ ti te'e yë'opoje̱ caye pa̱pi. Cui'ne ja̱re ja̱ mu'sepi cua̱ñese'e ye'yacohua'ije̱ jaiye se̱ñe je̱ohuë, ca'rajë.
Currently Selected:
Mateo 22: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
