Santiago 4

Iye Yeja Ayere Ëa Ñañe

1¿Jeropi daquë'ni, sa̱'ñe huajo huaiye, cui'ne mësaruja̱'a sa̱'ñe pë̱ti coca caye? Ja̱ cato mësaru sa̱'nahuëpi etapi, co'aye yo'o ëaye nëiñepi mësaru sa̱'nahuë uihuaquë pa'iyepi. 2Ja̱je pa'ina, mësaru yëyere ti̱'ama'pë pa'i do'ire yecohua'i payere ëa ñajë, huani je̱ojë yo'ojë, mësaru yëyere ti̱'añu'u cajë yo'ojë uihuayë, mësaru. Mësaru yëye ti̱'ama'pë pa'iyë. Maija'quëni i̱sijë̱'ë cajë se̱ma' do'ire. 3Ja̱je pa'ina, mësarupi se̱ni i̱si cua̱ñoñe pa̱ñë, mësaru co'aye yëyere yo'ojë nejañu'u cajë se̱ do'ire. 4Nëjore pacohua'ipi yequë nomioni yo'ocohua'ije̱ pa'iohua'i a'ë, mësaru. Huesëye mësaru iye yeja ayere ëa ñajë oicohua'i pani Maija'quëre oima'cohua'i de'ojë, i̱te sa̱ñope yo'ocohua'i pa'iyë. Ja̱je pa'ina, iye yeja ayere ëa ñajë oicohua'i cato Maija'quë cajeohua'i peoyë, Maija'quëre sa̱ñope yo'ocohua'i a'ë. 5Ja̱je pa'ina, Maire i̱sisi joyopi iye yeja ayere oima'pë pa'ijë̱'ë, caquë ai oi ë̱sequë ñacaiji, maire. Ja̱je toyase'e cani coa cama'ë pa'iji, care paji. 6Ja̱je pa'iquëta'are Diusu maire oi co̱caiquë api. Ja̱je pa'ina, toyase'e caji: “Maija'quë cato teaye pa'iohua'ini oi co̱caiquë api, jerepa pa'iohua'i a'ë cuasacohua'ire cato co̱caiye pa̱quë api.” 7Maija'quëna mësaru pa'iye i̱sisicohua'irepa pa'ijë i̱se'ere necaijë̱'ë, huati yëyere necaima'pë. Ja̱je yo'ojëna, ña jujani mësarute je̱oni huë'huëja̱quë api. 8Maija'quëna tsioja̱ijë'ë, i̱pi mësaruna tsioja̱ija'quëre. Co'aye yo'ocohua'i të̱no to̱jë'ë, mësaru jë̱ñare si'si pa'iye. Maija'quëre oñu'u cajëta'a iye pa'iye se oijë yo'ocohua'ipi ja̱ si'si pa'iye tsoa to̱jë'ë, mësaru joñoare. 9Otare papi oijë ai co'a ju̱'ijë'ë, mësaru co'aye yo'ose'ere cuasajë. Mësaru sose'epi ota po̱nëjaquë cui'ne mësaru sihuayepi oiyena po̱nëja'quë. 10Ja̱je pa'ina, Maija'quë ña hue̱'ñare pana teaye pa'iohua'i de'ojë̱'ë, i̱pi mësarute jerepa pa'iohua'ire neja'quëre.

Yequë Tayoyere Ñaquë Cama'ë Pa'ijë̱'ë

11Maija'quë do'ijë, sa̱'ñe mësaruja̱'a co'aquë api cama'pë pa'ijë̱'ë. Ja̱je pa'ina, Maija'quë do'iquëre co'aquë api caquë cato cua̱ñese'e cayere co'aji caji, i̱pi cua̱ñese'e meñe ña ëjaë de'oni. Ja̱je pa'ina, më'ëpi cua̱ñese'e cayere co'aji caquë pani i̱ti cua̱ñese'ere sehuoma'ë pa'i coa më'ëja'a co'ye ñani ca tëji ëjaëje̱ pa'i de'oyë. 12Te'i pa'iji, cua̱ñese'e pa̱ire i̱siquë. Ja̱re i̱ api, tayose'e ñani ca tëji ëjaërepa. Cui'ne ja̱re ja̱ëse'e pa'iji, huasoye paquë, cui'ne nejoñe paquë. ¿Ja̱je pa'ito më'ë i̱quei macapi më'ë cajei tayoye ñaroja̱i caquë'ni?

Ñamina'a Pa'i Ja̱'ñe Huesëjë Caye

13De'oji, yure iyere asajë̱'ë. Yure pa̱nita'a ñamina'a ja̱ daripëna sani ja̱rona te'e o̱metëcahuë pa'ijë co'amaña nejë i̱sijë curi neñu'u, cacohua'i maña. 14Ñamina'a mësaru pa'i ja̱'ñe huesëyë. Mësaru cato picoja̱'a pa'isicota'a peo hue̱'ña tiya saiyeje̱ pa'iohua'i a'ë. 15Ja̱je pa'ina, mësaru cato ñeje caye pa'iji: “Ëjaëpi yëna huajëcohua'i pa'ijë iye maña nesi'i pa̱nita'a ja̱ yequë co'amañaje nesi'i caye pa'iji.” 16Ja̱je pa'iquëta'are mësaru cato si'a tuturepa cacohua'i a'ë, pa'ire payeje̱ nëina. Si'aye ja̱je jerepa pa'iohua'ire nëina, tutu caye co'aye a'ë. 17Ja̱je pa'ina, de'oye yo'oye asaquëpi ja̱ yë'ta'a de'oye yo'oma'ë pani tsoe co'aye yo'opi.

Currently Selected:

Santiago 4: sey

Highlight

Copy