Santiago 3

Cayere Ye'yaye

1De'oji, Maija'quë do'ijë mësarupi tsoe asacohua'i a'ë, yecohua'ire se ye'yacohua'ipi jerepa i̱ohua'i yo'ose'e ña de'hua cua̱ño ja̱'ñe pa'iye. Ja̱je pa'i do'ire mësaru acohua'ipi jai pa̱irepa pa'ima'pë pa'ijë̱'ë, yecohua'ire se ye'yacohua'i. 2Si'aohua'i tayocohua'ise'e pa'iyë. Ja̱je pa'iquëta'are te'i pa̱ipi i̱ coca cayere ti tayoma'quë pani nuñe pa'iquëre papi ja̱je pa'i pani, si'aye i̱ pa'iye nuñerepa ñaquë pa'iquë api. 3Mai cua̱ñeñe caballopi de'oye sehuocaija̱quë cajë yë'opona quë̱na tarapëre jua nëocohua'i a'ë. Ja̱je neni yureta'a si'aëre de'oye po̱'nejë sacohua'i a'ë. 4Ñajë'ë, cui'ne jai yohuë yo'oyere. Ai tutu jëayerepa ju'aquëta'are i̱ti tayoco a'ricona i̱ti tayoquëpi po̱'nequëna, i̱ yë hue̱'ñana saicoa. 5Ja̱je pa'ye mai tse̱meñoje a'rico macata'a jai co'amañare cacoa. Ja̱je pa'iopi a'ri toa macata'a jai airo tsë̱ni ëoyeje̱ pa'yerepa yo'ocoa. 6Ja̱je pa'ina, tse̱meño cato toaje̱ pa'io, co'aye ne tuture ti̱mësicoa. Ja̱je pa'iopi mai ca̱përe pa'io si'a ca̱pë co'aye neñe pa'iji, cui'ne si'a mai pa'i ma'aje co'a de'huacoa, mëna tutupi i̱oni pa'i do'ire. 7Iye yeja pa'icohua'ire nëicohua'ire, pi̱'are, a̱ñaohua'ire, cui'ne jai tsiaya pa'icohua'ireje̱, si'aye pa̱ipi tse̱ani de'oye ye'yacohua'i a'ë. 8Ja̱je pa'iquëta'are tse̱meño cato ye'ya ti̱'añe peocoa, nau nëco ti̱'añe peocoa. Co'acoa. Tsi̱maoje pa'iopi si'aye co'a de'huayere ti̱mësicoa. 9Ja̱je pa'ina, i̱opi Maija'quëre de'oquëre pa'ni cajë sihuajë, cui'ne ja̱re i̱opi pa̱ireje̱ co'acohua'i a'ë cayë, Maija'quëpi i̱je pa'iohua'ire de'huasicohua'ireje̱. 10Ja̱re i̱ti yë'opopi etaji, de'oye cacaiye, cui'ne yecohua'ire co'aye cayeje̱. Ja̱je pa'i ma'ñe a'ë, Maija'quë do'ijë, ja̱je yo'oye ai co'aji. 11Te'e oco cojeja̱'a de'o oco etacona, së̱je ocoje̱ cui'na etama'coa. 12Maija'quë do'ijë, mësaru ñato ¿Higuerapi hui'yape ne ca̱re quë̱iñe pa'iquë, pa̱nita'a cuiya'ipi higuera ca̱re quë̱iñe pa'iquë? Ja̱je pa'ina, ti peoji, te'e oco cojeja̱'a de'o oco cui'ne a̱si oco etaye.

Maija'quë Ta̱'ñe Asaye I̱siye

13Ja̱je pa'ito, mësaru aquëpi ta̱'ñe pa'ipi asa ti̱'asiquë pani iyere i̱ de'oye yo'oquë pa'iyepi cui'ne ja̱ ta̱'ñe asayepi teaye pa'ire nequëna, nesi co'amañare i̱ñoja'quë. 14Ja̱je pa'iquëta'are mësaru joyore yecohua'i payere ëa ñajë pë̱iñepi cui'ne ai jerepa pasi'i cuasajë yo'oyepi pa'ina, ta̱'ñe cuasayë caye cato coa cosoye a'ë, cui'ne ti ta̱'ñe asayere pare coa cayeje̱ pa'ye neñe a'ë. 15Ja̱je pa'ye pa'ima'coa, Maija'quë ta̱'ñe asayerepa. Ja̱ asase'e cato iye yeja pa̱i cuasani huëose'e a'ë cui'ne pa̱i ca̱pë yëyepi huëose'e a'ë, cui'ne huati huëose'e a'ë. 16Ja̱je pa'ina, yecohua'i payere ëa ñajë pë̱iñepi cui'ne ai jerepa pa'i pasi'i cuasayepi pa'ito si'aye ne tiya saose'eje̱ pa'yepi pa'iji, coa si'aye co'ayere yo'oyepi. 17Ja̱je pa'iquëta'are Maija'quë ta̱'ñe asaye i̱siye cato co'ayena co̱'me ma'ñe a'ë. Ja̱je pa'ina, jo'cua pa'iye, dahuëre pa'iye, yecohua'i cuasayere meñe ñañe peoye pa'iye, yecohua'ire teaye ñani co̱caiye, jaiye de'o co'amañare neñe, si'a yë'quë maca si'aohua'ire yo'oye, cui'ne nuñerepa pa'icohua'ire neñe a'ë. 18Ja̱je pa'ina, jo'cua de'oye pa'ija̱jë cajë yo'ocohua'i cato jo'cua de'oye pa'i ja̱'ñere neñë. Ja̱ yo'ojëna, ta̱se'e mëani quë̱iñeje pa'ye quë̱quëna, nuñerepa yo'oyere tëaja̱'cohua'i a'ë.

Currently Selected:

Santiago 3: sey

Highlight

Copy