Roma 8
8
Topẽ kuprĩg tỹ ẽg jagrẽ
1Kỹ Topẽ tóg, ẽg tỹ Jesus Cristo ki rã kỹ ẽg vóg kónãn mãn ke tũ nĩ ha. 2Vẽjykre tãg vỹ ẽg kã kã nĩ ha, Topẽ kuprĩg tugrĩn, ẽg tỹ Jesus Cristo ki ge kỹ nỹtĩn kỹ. Ti tỹ tỹ ẽg jagrẽ nĩn kỹ ẽg rĩnrĩr nỹtĩ. Kỹ ẽg kygvar kỹ nỹtĩ sir. Nũgme ki vár ke tũ ẽg nĩ ha. 3Topẽ tỹ vãsỹ ẽg jyvẽn mũ ra ẽg krenkren ja tũ nĩ ver, ẽg tỹ ki króm kãn ja tũ nĩn kỹ, ẽg krónhkrój nỹtĩn kỹ. Hã kỹ Topẽ tóg ti kósin jẽnẽ ja nĩ. Ũ tỹ Topẽ vĩ mranh jafã ri ke tóg mur, ẽg ri ke, hã ra tóg mranh ja tũ nĩ inhhã. Kỹ tóg ẽg jagfy ter ja nĩ, ẽg hã tỹ ti vĩ mranh ja tugrĩn. 4Vãhã ẽg tóg Topẽ tỹ vãsỹ ẽg jyvẽn mũ ẽn ki króm há nỹtĩ, Topẽ kuprĩg tỹ tỹ ẽg jagrẽ nĩn kỹ. Kỹ ẽg tóg ẽg tỹ nén to én mũ ẽn han mãn ke tũ nĩ sir, ẽg jagrẽ há tỹ ẽg tar han mũ tugnĩn. 5Ẽg tỹ ẽg tỹ nén to én mũ ẽn han kỹ ẽg tóg tỹ Topẽ vĩ mranh jafã nỹtĩ. Ẽg tỹ hã ra Topẽ kuprĩg tỹ jagrẽ nĩn kỹ ẽg tóg ti hã tỹ ẽg mỹ nén tó mũ ẽn han tĩ. 6Ẽg tỹ nén to én mũ ẽn han kỹ ẽg nũgme ki vár ke mũ vẽ. Ẽg tỹ Topẽ kuprĩg tỹ ẽg mỹ nén tó mũ ẽn han kỹ ẽg tóg vẽjykre tãg han kỹ nỹtĩ. Kỹ ẽg jatun mỹ mũgtĩ sir.
7Ũ tỹ ti tỹ nén to én mũ ẽn han kỹ tóg Topẽ kato tẽ mũ sir. Ti pijé Topẽ jykre han tĩ'. Han ki kagtĩg tóg nĩgtĩ. Ẽg jykre pãno hã vẽ. 8Ũ tỹ ti tỹ nén to én mũ ẽn han kỹ tóg to kórég nĩ, Topẽ ti. 9Ag jãvo ãjag tóg Topẽ kuprĩg tỹ ãjag mỹ nén tó mũ ẽn hã han tĩ. Ẽg tỹ nén to én mũ ẽn han vãnh ãjag nỹtĩ, Topẽ kuprĩg tỹ tỹ ãjag jagrẽ nĩn kỹ. Ũ tỹ Cristo kuprĩg tỹ jagrẽ tũ nĩ ẽn pijé tỹ ti tũ nĩ'. 10Cristo tũ vỹ tỹ ẽg nỹtĩ, kỹ tóg ẽg kã kã jẽ nĩ, Jesus Cristo ti, ti kuprĩg tỹ. Kỹ ẽg há vỹ ter ke mũ, ẽg tỹ Topẽ vĩ mranh kỹ. Hã ra ẽg tóg ẽg rĩr krỹg ja tũ venh ke mũ, Topẽ tỹ ẽg mỹ vẽnh pãte fón kỹ. 11Topẽ kuprĩg vỹ tỹ ẽg jagrẽ jẽ ha. Topẽ vỹ Jesus rĩn mãn, ti ter kar kỹ. Ti tỹ Jesus rĩn mãn kỹ tóg ẽg há ter ke tag rĩn mãn ki kanhró nĩ gé, ẽg mỹ ẽg há tãg han kỹ, ti kuprĩg tỹ tỹ ẽg jagrẽ nĩn kỹ.
12Inh kanhkã', Topẽ tũ vỹ tỹ ẽg nỹtĩ ha, ẽg tỹ ti jykre hã han jé. Kỹ han tũg nĩ, ãjag tỹ nén to én mũ ti. 13Ẽg tỹ nén to én mũ ẽn han kỹ ẽg nũgme ki vár ke mũ. Topẽ tỹ ẽg jagrẽ vỹ ẽg tỹ nén to én mũ tag tỹ tũ' he sór mũ. Ẽg tỹ ti mré tỹ tũ' hen kỹ ẽg vẽjykre tãg han kỹ nỹtĩnh mũ. 14Ẽg tỹ Topẽ kuprĩg tỹ ẽg mỹ nén tó tĩ ẽn han kỹ ẽg tóg tỹ Topẽ krẽ nỹtĩ. Jesus jãvy vỹ tỹ ẽg nỹtĩ mỹr, ti ve fag ke gé, ha mẽ. 15Ẽg tỹ tỹ Jesus jãvy nỹtĩn kỹ ti pijé ẽg kanẽ jun ke mũ'. Ti kuprĩg vỹ tỹ ẽg jagrẽ nĩ. Kỹ Topẽ pijé tỹ ẽg patrão kórég ri ke nĩ'. Tỹ tóg ẽg panh nĩ ha. Hã kỹ ẽg tóg ti mỹ: “Aba,” he tĩ, hã vỹ: “ẽg jóg,” he mũ, ẽg vĩ ki. 16Topẽ kuprĩg hã ne ẽg mỹ tó tĩ', ẽg tỹ tỹ Topẽ krẽ nỹtĩ ti, Jesus jãvy, ti ve. Hã kỹ ẽg ki kanhró nỹtĩ. 17Ẽg tỹ tỹ Topẽ krẽ nỹtĩn kỹ tóg ẽg mỹ ti tũ nĩm kãn ke mũ. Jesus Cristo hã mỹ tóg nĩm kãn ke mũ, kỹ tóg ẽg mỹ nĩm kãn ke mũ gé sir. Hã jé ẽg tóg ti mré jagtar ke mũ gé, ti tỹ vẽjykre há to jagtar ja ẽn ri ke. Kỹ ẽg tóg ti mré tỹ ũn mág nỹtĩnh ke mũ gé.
Kanhkã ve jé ẽg tóg ke mũ
18Ha vé, tag ki kanhró sóg nĩ, ha mẽ. Kanhkã tá tóg sér pẽ tĩnh mũ. Tá ẽg tóg tỹ ũn mág nỹtĩnh mũ. Kỹ ẽg tỹ ũri ti tugnĩn jagtar mũ tag vỹ tỹ ẽg mỹ nén ũ tũ pẽ nĩgtĩ, ẽg tỹ tỹ ũn mág nĩnh ke to jykrén kỹ. 19Topẽ vỹ ti krẽ tỹ ũn mág han ke mũ. Kỹ Topẽ tỹ ũn han mũ kar ag tóg tag hã ve sór mũ gé, misu kar, ka kar, ẽkré kar ke gé, nén kar ti. 20Nén kar vỹ jagtar nỹtĩ, ũn ve tỹ Topẽ vĩ mranh tugrĩn. Vẽnh kókén ja tũ ti nĩ. Topẽ vĩ mranh ja tũ ti nĩ. Hã ra tóg ũn ve tugnĩn jagtar nỹtĩ, Topẽ tỹ ẽg mré ti vóg kónãn kỹ, nén kar ti. 21Hã ra Topẽ tóg ti tỹ ũn han mũ kar ag mỹ: “kejẽn ãjag jagtar mãn ke tũ nĩ ha,” he ja nĩ. Kỹ Topẽ tỹ Jesus jãvy ag tỹ ũn mág hynhan ke kurã ẽn kã tóg nén kar tỹ há' henh ke mũ gé, ti tỹ ti ve fag tỹ ũn mág han mũ kurã ẽn kã. Kỹ tóg tũg mãn ke tũ nĩ ha, nén kar ti. 22Ver tóg Topẽ tỹ ũn han mũ kar ag mỹ jagy tĩ, fag mỹ ke gé. Kỹ tóg fag tỹ gĩr ven kỹ fag vẽnhkrẽr ẽn ri ke nĩ. 23Nén ũ kar tag vẽnhkrẽr ri ke han ẽg tóg tĩ gé, ẽg tỹ ti jagy ven kỹ, ẽg tỹ ti kuprĩg tỹ jagrẽ nỹtĩ ra. Ẽg jagrẽ to ẽg tóg ki kanhró nỹtĩ, ẽg tỹ tá tỹ ũn mág nỹtĩnh ke ti. Ge ra tóg ver ẽg mỹ jagy tĩ, tag ti ki. Kỹ ẽg tóg ti mré nỹtĩ sór mũ. Kỹ ẽg tóg venh ke mũ sir, ti tỹ ti krẽ pẽ mỹ nén nĩm ke mũ ti. Hã jãvãnh ẽg tóg mũ.
24Krenkren kỹ ẽg nỹtĩ, hã ra ẽg tóg ver vég tũ nĩgtĩ. Ẽg tỹ venh há tóg tĩ. Hã jãvãnh ẽg tóg tĩ. Ẽg tỹ jãvãnh mũ ra ẽg tóg ver vég tũ nĩ. Ẽg tỹ ve kar kỹ ẽg tóg ti jãvãnh mãn ke tũ nĩ ha. 25Hã ra ẽg tóg ver vég tũ nĩ, hã kỹ ẽg tóg jãvãnh mũ ver. To krónh ke tũ ẽg tóg nĩ.
Topẽ kuprĩg tỹ ẽg jagfy vĩ
26Hã ra Topẽ kuprĩg vỹ ẽg tar han tĩ, ẽg krój nỹtĩn kỹ. Kejẽn ẽg tóg ẽg tỹ nén to vĩnh ke mũ ki kagtĩg nỹtĩ, ẽg tỹ Topẽ mré vẽmén kỹ. Hã kỹ tóg ẽg jagfy vĩ tĩ, Topẽ kuprĩg ti. Ti vĩ ki kagtĩg ẽg nỹtĩ. Hã ra tóg ẽg jagfy vĩ tĩ. 27Kỹ Topẽ vỹ ẽg tỹ nén to jykrén mũ kar vég tĩ. Kỹ tóg ti kuprĩg tỹ nén tó mũ tag ki kanhró nĩ gé. Ti jykre vỹ ti mỹ há nĩ, ti tỹ nén to vĩ mũ ti, ẽg jagfy, Topẽ tũ kar ag jagfy. Topẽ tỹ nén han sór mũ ẽn hã to tóg vĩ tĩ.
28Ha vé, Topẽ to ẽg há nỹtĩ. Hã kỹ ẽg tỹ nén vég mũ kar vỹ ẽg tar han ke mũ, ẽg tỹ ti jagy vég mũ mré hã. Topẽ hã vỹ ẽg ki rĩr mũ, ti tỹ ẽg kuprẽg ja nĩn kỹ. 29Ẽg tỹ ver ti ki ge tũg ki tóg: “inh ki tóg rãnh ke mũ, tag,” he ja nĩ, ki kanhró nĩn kỹ. Kỹ tóg ẽg kuprẽg ja nĩ gé, ẽg tỹ ti kósin tỹ Jesus ri ke pẽ nỹtĩ jé. Ti hã vỹ tỹ Topẽ kósin pẽ nĩ inhhã, ti kósin ve. Kỹ tóg tỹ ẽg kãke nĩ gé sir, kỹ ti jãvy ag, ti ve fag vỹ e tãvĩ nỹtĩnh mũ ha. Ẽg hã vẽ sir. 30Hã jé tóg ẽg kuprẽg. Kỹ tóg ẽg mỹ vẽnh vĩ jẽnẽ. Ti tỹ ẽg mỹ vẽnh vĩ jẽnẽ kỹ tóg ẽg mỹ vẽnh pãte fón gé. Ẽg mỹ vẽnh pãte fón kỹ tóg ẽg tỹ ũn mág hynhan ke mũ gé, ti mré, tá.
Topẽ tỹ ẽg to há
31Tag tóg inh mỹ e tĩ. Sỹ to jykrén tũ tóg tĩ. Topẽ vỹ tỹ ẽg mré ke nĩ mỹr. Hã kỹ ẽg kato tẽ ũ pijé ẽg tỹ hẽ ri kenh mũ ha'. 32Topẽ vỹ ti kósin pir fẽg, ti tỹ ẽg jagfy ter jé. Ti kósin pir nenh ja tũ tóg nĩ. Hã kỹ tóg ẽg mỹ nén ũ há nenh ke tũ pẽ nĩ, ti tỹ ti kósin pir nenh ja tũ nĩn kỹ. 33Topẽ tỹ ẽg kuprẽg kỹ tóg ũ tỹ ẽg kato vĩ sór mũ ra ag mỹ vẽnh mỹ tĩ. Topẽ hã ne ẽg mỹ vẽnh pãte fón ja nĩgtĩ'. 34Kỹ ẽg tóg ũ ag tỹ ẽg to: “kórég ag nỹtĩ,” he mũ ra Topẽ mỹ há nỹtĩ. Jesus Cristo hã tóg ter ja nĩ, ẽg jagfy. Kỹ tóg rĩr mãn ja nĩ gé. Topẽ pẽgja tá tóg nĩ nĩ, ti rã hã. Kỹ tóg ẽg jagfy vĩ tĩ.
35Kỹ ũ pijé Cristo tỹ ẽg to jũ han ki kanhró nĩ'. Ti fe vỹ tỹ ẽg nỹtĩ. Kejẽn ẽg tóg nén ũ jagy venh ke mũ, ti tugrĩn. Kejẽn ẽg kanẽ jur ke mũ. Kejẽn ag tóg ẽg vóg kónãn ke mũ. Kejẽn ẽg tóg kókĩnkĩr ke mũ. Kejẽn ẽg tóg kur venh ke tũ nĩ gé. Kejẽn ẽg tóg kãgter kren ke mũ. Kejẽn ag tóg ẽg kã mĩ ũ tén ke mũ. Jérĩn mỹ ẽg tóg Cristo tovãnh ke tũ nĩ. Kỹ tóg ẽg tovãnh ke tũ nĩ gé, Jesus Cristo ti. 36Kejẽn ẽg tóg ti jagy tag vég tĩ, hã kỹ tóg rán kỹ nĩ, ha mẽ: “ẽg tỹ ã to há nỹtĩ tugnĩn ag tóg ẽg tén sór tĩ, kurã kar ki. Carneiro tãnh ẽg tóg tĩ, ẽg tỹ ko jé. Tag ri ke ẽg nỹtĩ, ag mỹ,” he ja tóg nĩ, Topẽ vĩ rá ki. Hã ra tóg ge nĩ. 37Hã ra tóg tỹ nén ũ tũ nĩ, ẽg mỹ. Ti hã ne ẽg tar han tĩ', ũ tỹ ẽg to há tãvĩ nĩ ẽn tĩ. Hã kỹ tóg ẽg mỹ sér tĩ, ẽg tỹ nén jagy vég mũ ra, ti tugrĩn.
38Ha vé, tag ki kanhró sóg nĩ, ha mẽ. Nén ũ pijé Topẽ tỹ ẽg to há nĩ tag tỹ tũ' henh mũ', ha mẽ. Ẽg ter mũ ra tóg ẽg to há nĩ, ẽg ter tũ ra ke gé. Topẽ tỹ jẽnẽ jafã ag vỹ Topẽ tỹ ẽg kato tẽ han ki kagtĩg nỹtĩ gé. Japo ag vỹ ti tỹ ẽg kato tẽ han ke tũ nĩ gé. Pã'i kar ag vỹ tag han ki kagtĩg nỹtĩ gé. Ẽg tỹ ũri nén ũ jagy vég mũ ra ẽg tóg ti tovãnh ke tũ nĩ, kỹ tóg kar kỹ ẽg to jũnh ke tũ nĩ gé. 39Kanhkã tãn ag vỹ ti tỹ ẽg to jũ han ke tũ nĩ gé, nũgme tãn ag ke gé. Topẽ tỹ nén han ja kar vỹ ti tỹ ẽg to jũ han ke tũ pẽ nĩ. Ẽg to tóg há tãvĩ nĩ, ẽg tỹ ẽg Senhor tỹ Jesus Cristo ki ge kỹ nỹtĩn kỹ.
Currently Selected:
Roma 8: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
