Popular Bible Verses from Roma 8

Share

Ha vé, Topẽ to ẽg há nỹtĩ. Hã kỹ ẽg tỹ nén vég mũ kar vỹ ẽg tar han ke mũ, ẽg tỹ ti jagy vég mũ mré hã. Topẽ hã vỹ ẽg ki rĩr mũ, ti tỹ ẽg kuprẽg ja nĩn kỹ.

Ha vé, tag ki kanhró sóg nĩ, ha mẽ. Nén ũ pijé Topẽ tỹ ẽg to há nĩ tag tỹ tũ' henh mũ', ha mẽ. Ẽg ter mũ ra tóg ẽg to há nĩ, ẽg ter tũ ra ke gé. Topẽ tỹ jẽnẽ jafã ag vỹ Topẽ tỹ ẽg kato tẽ han ki kagtĩg nỹtĩ gé. Japo ag vỹ ti tỹ ẽg kato tẽ han ke tũ nĩ gé. Pã'i kar ag vỹ tag han ki kagtĩg nỹtĩ gé. Ẽg tỹ ũri nén ũ jagy vég mũ ra ẽg tóg ti tovãnh ke tũ nĩ, kỹ tóg kar kỹ ẽg to jũnh ke tũ nĩ gé. Kanhkã tãn ag vỹ ti tỹ ẽg to jũ han ke tũ nĩ gé, nũgme tãn ag ke gé. Topẽ tỹ nén han ja kar vỹ ti tỹ ẽg to jũ han ke tũ pẽ nĩ. Ẽg to tóg há tãvĩ nĩ, ẽg tỹ ẽg Senhor tỹ Jesus Cristo ki ge kỹ nỹtĩn kỹ.

Hã ra Topẽ kuprĩg vỹ ẽg tar han tĩ, ẽg krój nỹtĩn kỹ. Kejẽn ẽg tóg ẽg tỹ nén to vĩnh ke mũ ki kagtĩg nỹtĩ, ẽg tỹ Topẽ mré vẽmén kỹ. Hã kỹ tóg ẽg jagfy vĩ tĩ, Topẽ kuprĩg ti. Ti vĩ ki kagtĩg ẽg nỹtĩ. Hã ra tóg ẽg jagfy vĩ tĩ.

Tag tóg inh mỹ e tĩ. Sỹ to jykrén tũ tóg tĩ. Topẽ vỹ tỹ ẽg mré ke nĩ mỹr. Hã kỹ ẽg kato tẽ ũ pijé ẽg tỹ hẽ ri kenh mũ ha'.

Kỹ Topẽ tóg, ẽg tỹ Jesus Cristo ki rã kỹ ẽg vóg kónãn mãn ke tũ nĩ ha.

Ẽg tỹ nén to én mũ ẽn han kỹ ẽg nũgme ki vár ke mũ vẽ. Ẽg tỹ Topẽ kuprĩg tỹ ẽg mỹ nén tó mũ ẽn han kỹ ẽg tóg vẽjykre tãg han kỹ nỹtĩ. Kỹ ẽg jatun mỹ mũgtĩ sir.

Hã ra tóg tỹ nén ũ tũ nĩ, ẽg mỹ. Ti hã ne ẽg tar han tĩ', ũ tỹ ẽg to há tãvĩ nĩ ẽn tĩ. Hã kỹ tóg ẽg mỹ sér tĩ, ẽg tỹ nén jagy vég mũ ra, ti tugrĩn.

Ha vé, tag ki kanhró sóg nĩ, ha mẽ. Kanhkã tá tóg sér pẽ tĩnh mũ. Tá ẽg tóg tỹ ũn mág nỹtĩnh mũ. Kỹ ẽg tỹ ũri ti tugnĩn jagtar mũ tag vỹ tỹ ẽg mỹ nén ũ tũ pẽ nĩgtĩ, ẽg tỹ tỹ ũn mág nĩnh ke to jykrén kỹ.

Kỹ ũ pijé Cristo tỹ ẽg to jũ han ki kanhró nĩ'. Ti fe vỹ tỹ ẽg nỹtĩ. Kejẽn ẽg tóg nén ũ jagy venh ke mũ, ti tugrĩn. Kejẽn ẽg kanẽ jur ke mũ. Kejẽn ag tóg ẽg vóg kónãn ke mũ. Kejẽn ẽg tóg kókĩnkĩr ke mũ. Kejẽn ẽg tóg kur venh ke tũ nĩ gé. Kejẽn ẽg tóg kãgter kren ke mũ. Kejẽn ag tóg ẽg kã mĩ ũ tén ke mũ. Jérĩn mỹ ẽg tóg Cristo tovãnh ke tũ nĩ. Kỹ tóg ẽg tovãnh ke tũ nĩ gé, Jesus Cristo ti.

Kỹ Topẽ vỹ ẽg tỹ nén to jykrén mũ kar vég tĩ. Kỹ tóg ti kuprĩg tỹ nén tó mũ tag ki kanhró nĩ gé. Ti jykre vỹ ti mỹ há nĩ, ti tỹ nén to vĩ mũ ti, ẽg jagfy, Topẽ tũ kar ag jagfy. Topẽ tỹ nén han sór mũ ẽn hã to tóg vĩ tĩ.

Ẽg tỹ Topẽ kuprĩg tỹ ẽg mỹ nén tó tĩ ẽn han kỹ ẽg tóg tỹ Topẽ krẽ nỹtĩ. Jesus jãvy vỹ tỹ ẽg nỹtĩ mỹr, ti ve fag ke gé, ha mẽ.

Ẽg tỹ ẽg tỹ nén to én mũ ẽn han kỹ ẽg tóg tỹ Topẽ vĩ mranh jafã nỹtĩ. Ẽg tỹ hã ra Topẽ kuprĩg tỹ jagrẽ nĩn kỹ ẽg tóg ti hã tỹ ẽg mỹ nén tó mũ ẽn han tĩ.

Topẽ vỹ ti kósin pir fẽg, ti tỹ ẽg jagfy ter jé. Ti kósin pir nenh ja tũ tóg nĩ. Hã kỹ tóg ẽg mỹ nén ũ há nenh ke tũ pẽ nĩ, ti tỹ ti kósin pir nenh ja tũ nĩn kỹ.

Topẽ kuprĩg hã ne ẽg mỹ tó tĩ', ẽg tỹ tỹ Topẽ krẽ nỹtĩ ti, Jesus jãvy, ti ve. Hã kỹ ẽg ki kanhró nỹtĩ. Ẽg tỹ tỹ Topẽ krẽ nỹtĩn kỹ tóg ẽg mỹ ti tũ nĩm kãn ke mũ. Jesus Cristo hã mỹ tóg nĩm kãn ke mũ, kỹ tóg ẽg mỹ nĩm kãn ke mũ gé sir. Hã jé ẽg tóg ti mré jagtar ke mũ gé, ti tỹ vẽjykre há to jagtar ja ẽn ri ke. Kỹ ẽg tóg ti mré tỹ ũn mág nỹtĩnh ke mũ gé.

Ũ tỹ ti tỹ nén to én mũ ẽn han kỹ tóg Topẽ kato tẽ mũ sir. Ti pijé Topẽ jykre han tĩ'. Han ki kagtĩg tóg nĩgtĩ. Ẽg jykre pãno hã vẽ.

Topẽ vỹ ti krẽ tỹ ũn mág han ke mũ. Kỹ Topẽ tỹ ũn han mũ kar ag tóg tag hã ve sór mũ gé, misu kar, ka kar, ẽkré kar ke gé, nén kar ti.

Ver tóg Topẽ tỹ ũn han mũ kar ag mỹ jagy tĩ, fag mỹ ke gé. Kỹ tóg fag tỹ gĩr ven kỹ fag vẽnhkrẽr ẽn ri ke nĩ.