Roma 7

Vẽnh prũg kãme

1Inh kanhkã', Topẽ tỹ vãsỹ ẽg mỹ vẽjykre nĩm ja ẽn ki kanhró ãjag tóg nỹtĩ, Moisés tỹ rán ja ẽn ti. Ẽg rĩr nỹtĩn kỹ ẽg tóg vẽjykre ẽn han kỹ nỹtĩ. Ẽg ter kỹ tóg ẽg mỹ tũ' he mũ, vẽjykre ẽn ti. 2Ri ke ti nĩ gé, ẽg prũ fi mré. Fi mén rĩr jẽn kỹ fag tóg tỹ jagnẽ tũ nỹtĩ, fi mén mré. Ti ter kỹ fi tóg tỹ ti tũ tũ jẽ sir, ti tũg kỹ. 3Fi tỹ ti rĩr tĩ ra ũ mré nỹ kỹ fi tóg fi mén tũ mré nỹ mũ. Ti ter kỹ fi tóg mén tũ jẽ sir. Kỹ tóg fi tỹ ũ mré tĩg sór kỹ há tĩ sir. Fi mén vẽ sir, fi tỹ ũ mré tĩ mũ ẽn ti. 4Ri ke ti nĩ, Topẽ tỹ vãsỹ ẽg mỹ vẽjykre nĩm ja ẽn ti. Cristo ter kỹ tóg ẽg jykre pãno tỹ tũ' he gé. Hã kỹ ẽg tóg tỹ Cristo tũ nỹtĩ ha. Ũ tỹ ter kar kỹ rĩr mãn ja ẽn tũ vỹ tỹ ẽg nỹtĩ. Kỹ ẽg tóg ũri Topẽ jykre hã han sór mũ ha, ti mỹ sér tĩ jé. 5Vãsỹ ẽg tóg ẽg tỹ nén to én mũ ẽn han ja nĩgtĩ. Kỹ ẽg tóg vẽjykre kavéj han kãn ja nĩgtĩ. Kỹ ẽg nũgme ki vár ke mũ vẽ. Hã ra ẽg tóg Topẽ tỹ ẽg jyvẽn mũ jẽmẽn kỹ ki kanhrãn mũ, ẽg tỹ ti vĩ mranh mũ tag ki. Jérĩn mỹ ẽg tóg mranh mãn', mranh mãn' he mũ sir. 6Hã ra tóg ẽg mỹ tũ tĩ ha, ẽg tỹ Topẽ tỹ vãsỹ ẽg jyvẽn jẽmẽg mũ ra mranh mũ ti, Cristo tỹ ter kỹ ẽg jykre pãno tỹ tũ' hen kỹ. Topẽ vĩ mranh sór tũ ẽg nỹtĩ ha. Ẽg kygva ti huri, kỹ ẽg tóg Topẽ tũ hã han tĩ sir, Topẽ kuprĩg tỹ ẽg krĩn kỹ. Ki króm sór ẽg nỹtĩ ha.

Vẽjykre kórég han kỹ ẽg Topẽ vĩ mranh tĩ

7Kỹ Judeu ag hỹn inh mỹ: “kỹ Topẽ tỹ vãsỹ ẽg jyvẽn mũ ẽn mỹ kórég nĩ?“ he sór mũ. Vó, kórég tũ ti nĩ. Ẽg jyvẽn ja tóg nĩgtĩ, kỹ ẽg tóg ti vĩ mẽ kỹ: “vẽjykre kórég han kỹ inh hỹn tóg ti vĩ mranh tĩ,” he tĩ. Topẽ vỹ ẽg mỹ: “nén ũ to én tũg nĩ,” he ja nĩ. Hã kỹ ẽg tóg ũ tũ to én tag tỹ tỹ Topẽ vĩ mranh nĩ ki kanhró nỹtĩ. 8Topẽ tỹ ẽg jyvẽn mũ ra ẽg tóg ti vĩ mranh sór mũgtĩ, jérĩn mỹ. Ti tỹ ẽg mỹ: “tag han tũg ra,” he mũ ra ẽg tóg han sór tĩ. Hã kỹ ẽg tóg ũ tũ to én sór tĩ. 9Vãsỹ ẽg tóg Topẽ tỹ ẽg jyvẽn mũ ẽn mẽ ja tũ nĩgtĩ. Véké ẽg tóg mũ ja nĩgtĩ, jatun mỹ. Kỹ tóg vãhã ẽg mỹ ti vĩ jẽnẽ ja nĩ, Topẽ ti, ẽg jyvẽn kỹ. Ẽn mẽ kỹ ẽg tóg ẽg tỹ ti vĩ mranh ja ẽn ki kanhrãn ja nĩgtĩ, ẽg tỹ to nũgme ki vár ke mũ mré hã. Kỹ ẽg tóg kanẽ jur nỹtĩ ha. 10Topẽ vỹ tóg ẽg jyvẽn, ẽg tỹ nũgme ki vár tũ nĩ jé. Jérĩn mỹ ẽg tóg ki vár ke mũ, ẽg tỹ ti tỹ ẽg jyvẽn kri fig tũ nĩn kỹ. 11Ẽg tỹ Topẽ vĩ mranh kỹ ẽg tóg ti tỹ ẽg jyvẽn mũ kato tẽ mũ. Kỹ ẽg nũgme ki vár ke mũ sir, ẽg tỹ: “ti hỹn tỹ nén ũ tũ nĩ, sỹ ti vĩ mranh mũ ti,” he mũ ra.

12Hã kỹ Topẽ tỹ vãsỹ ẽg jyvẽn mũ ẽn vỹ há nĩ, ti tỹ tỹ Topẽ tũ nĩn kỹ. Kỹ Topẽ tỹ vãsỹ ẽg mỹ vẽjykre nĩm ja ẽn vỹ kuryj nĩ gé. Há ti nĩ.

13Kỹ Judeu ag hỹn inh mỹ: “ẽg mỹ vẽjykre há tugnĩn nũgme ki vár ke mũ'?“ he sór mũ. Vó, ke tũ vẽ. Topẽ vĩ mranh tugrĩn ẽg nũgme ki vár ke mũ. Ẽg tỹ hã ra Topẽ tỹ ẽg jyvẽn mẽ kỹ ẽg tóg ẽg jykre kórég to: “ti vĩ mranh ja inh nĩgtĩ,” he tĩ. 14Topẽ tỹ ẽg jyvẽn mũ ẽn vỹ tỹ ti tũ nĩ. Ti kuprĩg vỹ to ẽg kanhrãn tĩ. Jérĩn mỹ ẽg tóg ẽg tỹ nén to én mũ ẽn han sór tĩ, ẽg krój nỹtĩn kỹ. Ti vĩ mranh kỹ ẽg tóg tỹ ti vĩ mranh jafã nỹtĩ.

Ẽg tỹ ti kórég han sór tũ ra ẽg tóg han tĩ

15Ẽg jykre tóg inh mỹ e tĩ. Sỹ nén to há ẽn han tũ sóg nĩgtĩ. Sỹ nén to há tũ ẽn hã han sóg tĩ mỹr, kỹ tóg inh mỹ e tĩ. 16Ẽg tỹ ti kórég han sór tũ ra ẽg tóg han tĩ. Ti vĩ mranh mũ vỹ ẽg mỹ kórég nĩ. Ge ra ẽg tóg mranh tĩ. 17Ẽg jykre pãno hã vẽ. Ẽg tỹ ẽg jykre pãno tovãnh kãn ja tũ nĩn kỹ ẽg tóg ti vĩ mranh tĩ, ẽg tỹ mranh sór tũ ra. Ẽg jykre tãg tũ vẽ, tag ti. 18Ẽg pijé vẽjykre há to tar nỹtĩ'. Vẽjykre kórég vỹ ver ẽg kã kã nĩ nĩ. Vẽjykre kuryj tóg ẽg mỹ sér tĩ, ge ra ẽg tóg ti pãno han tĩ, ẽg tỹ ũn há han sór mũ ra. 19Hã kỹ ẽg pijé vẽjykre há han tĩ', ẽg tỹ han sór mũ ra'. Ti kórég hã han ẽg tĩ, ẽg tỹ han sór tũ ra. 20Ẽg tỹ nén han sór tũ ẽn han ẽg tóg tĩ, vẽnh vatánh tá. Ẽg jykre pãno hã tugrĩn ẽg tóg Topẽ vĩ mranh tĩ, ẽg tỹ tovãnh kãn ja tũ nĩn kỹ.

21Ha vé, ẽg jykre ti. Ũn há hã han sór ẽg tóg mũgtĩ. Ge ra ẽg tóg ũn kórég hã han tĩ, ẽg jykre pãno tỹ ẽg kã kã nĩn kỹ. 22Ẽg tỹ to jykrén há han kỹ ẽg tóg: “Topẽ tỹ ẽg jyvẽn mũ vỹ há nĩ,” he ti. Ẽg mỹ tóg sér tĩ. 23Ẽg tỹ hã ra ẽg jykre to jykrén kỹ ẽg tóg vẽjykre kórég hã han mũgtĩ ver, vẽnh vatánh tá. Kỹ ẽg tóg sir vẽjykre há kato tẽ mũ. Ti vĩ mranh jafã vỹ tỹ ẽg nỹtĩ, ẽg tỹ Topẽ vĩ mranh to én kỹ, ẽg tỹ to én sór tũ ra. Ẽg kã kã tóg nĩ nĩ, vẽjykre kórég ti. 24-25Ẽg tỹ to jykrén há han kỹ Topẽ tỹ ẽg jyvẽn tĩ ẽn tóg ẽg mỹ há tĩ, kỹ ẽg tóg han sór mũ. Ge ra ẽg tóg mranh mãn', mranh mãn' he tĩ sir, ẽg tỹ mranh sór tũ ra.

Jagy pẽ ti nĩ. Kórég ẽg nỹtĩ, ẽg tỹ ũn há han ki kagtĩg nỹtĩn kỹ. Nũgme ki vár kãn jé ẽg tóg ke mũ mỹr. Ũ nỹ hỹn ẽg kren han ki kanhró nĩ, vẽjykre kórég tag to? Ẽg Senhor tỹ Jesus Cristo hã vẽ. Ti hã vỹ ẽg kren han mũ. Jãvo ẽg tóg vẽsóg ki ẽg jykre pãno tỹ tũ' he ki kagtĩg nỹtĩ. Jesus hã tugnĩn Topẽ tóg ẽg mỹ vẽnh pãte fón tĩ, kỹ ẽg tóg ti mỹ há nỹtĩ.

Currently Selected:

Roma 7: kgp

Highlight

Copy