Myaso 90
90
LIVULU LYAMUCIWANA
(Mya 90–106)
Lya munu na Njambi
Lilombelo lya Mosesa munu wa Njambi
1Shukulu Kalunga,
yove simbu yoshe wapwa cimpaka cetu.
2Simbu kanda utange malundu,
simbu kanda utange kaye,
yove wapwa u Njambi ku myaka yoshe.
3Yove wilwisila vanu ku livu,
co uvelwisila ku livu kuje kuvatundile.
4 #
2 Pet 3:8
Myaka yakupwa 1,000 kuli yove
inapu ngwe litangwa limo,
inapu lika ngwe litangwa lije lineti laja,
ngwe cilo cimo ca vutsiki.
5Unyongesa myonyo ya vanu vwasi-vwasi,
uvanyongesa oku vanalala.
Vakevo vakahwa ngwe mwila wakuma,
6umena mutondo-tondo,
oloni ku cingwezi ujujwama,
co uma.
7Vukalu vwove vulinakutunyongesa,
co kuluvala kwove kulinakutujujwisa.
8Yove wazivuka vuvi vwetu,
nameme vuvi vuje tukalingi mu vushweke.
9Vukalu vwove vunakeesa myaka yetu yakuyoya,
kuyoya kwetu kunapu kwakundondo manene.
10Matangwa akuyoya kwetu apwa myaka makumi atanu
na avali,
nambe myaka makumi atanu na myaka makumi atatu,
nga tucili na nzili,
oloni itunenela lika tuyando na vusiwa,
mwonyo uhwa vwasi,
co tuvavoshe tuziluka.
11Iyajo azivuka nzili ya vukalu vwove?
Vukalu vwove vwapwa vwakama,
ngwe lyova lije tukakuzivila.
12Tulongese kulava matangwa etu,
ngeci tukale na mbunge ya mana.
13Vukalu vwove vukahwa simbu mukajo yove Shukulu Kalunga?
Tetela vangamba vove!
14A mutondo a mutondo tushulise na cizemo cove
cije kucesi kutenguluka,
ngeci tuvwaelele nakujolela mukuyoya kwetu kwoshe.
15Tuvwaelelese ngwe ku matangwa aje awatuyandesele,
ngwe ku myaka ije itwamwene tuyando.
16Vilinga vyove visholoke kuli vangamba vove,
na vumpau vwove vusholoke ku vatekulwila vetu.
17Shukulu Kalunga Njambi yetu,
vivezikiso vyove vikale amo netu.
Tuvezikise mu vyoshe vije vitulinga.
Currently Selected:
Myaso 90: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
