Myaso 89
89
Mwaso a simbu ya tuyando twa muyati
Mwaso wa Etane kaEzela (1 Vim 4:31)
1Yove Shukulu Kalunga,
simbu yoshe njikaimba vya cizemo cove
cije kucesi kutenguluka,
co njikambulula kulongwa kwove ku myaka yoshe.
2Omwo cizemo cove cije kucesi kutenguluka
cikakalako simbu yoshe.
Kulongwa kwove kwakala myaka yoshe ngwe melu.
3Yove wendekele ngwove,
“Njinalingi cikumiiyo na uje injinaangula,
njinalisingi na ngamba yange Ndaviti,
4 #
2 Sam 7:12-16; 1 Miz 17:11-14; Mya 132:11; Vil 2:30 ‘Umo wa vatekulwila vove akapwa mwene,
co njikakolesa vumwene vwove simbu yoshe.’ ”
5Shukulu Kalunga melu alinakushangazala
vilinga vyove vyakukomokesa,
na kulongwa kwove valinakuviimba
mu vikungulukilo vya vaka-kujela.
6Shukulu Kalunga naumo wai ali mwilu wakulifwa nove,
naumo wai wa vana va vinjambi wakupwa amo nove.
7Yove wapwa wakujujwisa mu munga ya vaka-kujela,
co vukama vwove vwapwa vwakukomokesa
kuli voshe vaje vali mwilu.
8Shukulu Kalunga Njambi Muka-nzili yoshe,
iyajo walifwa nove?
Yove Shukulu Kalunga
mu vyuma vyoshe yove wapwa wa kulongwa.
9Yove ukashiki mema a kalunga a nzili,
omo mankimba ao akatuka yove uwolwesa.
10Yove watsenene cikashama Lahave#89:10 LAHAVE: Lahave ikeye Ingito, (kenga 87:4.) Lahave ikeye cikashama wakama uje nemanena nzili ya kupenga-penga na vuvi. nakumutsiya,
wafungulwile vitozi vove na nzili yove yakama,
11Melu apwa ove, na asi lalo apwa ove,
yove watangele kaye na vyuma vyoshe vilimo.
12Yove watangele kunto na mbwela,
Munkinda wa Tambole,
na Munkinda wa Helemone
ilinakwimba kuli yove nakujolela.
13Yove u muka-nzili yakukomokesa!
Nzili yove yapwa yakama!
14Ukashwana vumwene vwove mukushungama na mu vushunga,
cizemo cije kucesi kutenguluka na kulongwa
visholoka mu vyoshe vije ulinga.
15Yove Shukulu Kalunga,
vanavezika vanu vaje vakulemesa na myaso,
vanu vaje venda mu ceke cove!
16Omwo ali yove tulinakujolela litangwa lyoshe,
co tulinakukushangazala a vuvwa vwove.
17Vumpau vwove vwakama vulinakutwana nzili,
omwo akutetela kwove
nzili yetu ilinakuwezelelako.
18Yove Shukulu Kalunga mwene yetu,
u muka-kutunyunga,
yove Njambi Wakujela wa Isalele,
wapwa u ntelo yetu.
Cikulaeso ca Njambi kuli Ndaviti
19Ku san̄ulu wendekele mu cimona
kuli vangamba vove va kulongwa ngwove,
“Njinakwasa lishwalale wa nzili,
njinamwangula akati ka vanu, nakumutsimanesa.
20 #
1 Sam 13:14; Vil 13:22; 1 Sam 16:12 Njinaangula ngamba yange Ndaviti kupwa mwene,
njinamuvwavesa mazi ange akujela.
21Nzili yange ikakala nendi simbu yoshe,
co ikamutakamesa.
22Vitozi vendi kuvakamufungulula,
na vaka-vuvi kuvakamuyandesa.
23Njikanyongesa vaka-n̄ole yendi,
nakutsiya voshe vaje vamuzinda.
24Cizemo cange cikakala nendi,
co simbu yoshe njikamupwisa muka-nzili.
25Co njikaamesa vumwene vwendi,
kutunda ku Lishali lya Menditelenyani
nakweta ku Ndonga ya Yufuleti.
26Ikeye akendeka kuli yange ngwendi,
‘Yove unapu u tate na Njambi yange,
yove unapu u muka-kunjinyunga
na muyoyesi wange.’
27 #
Kuj 1:5
Njikamupwisa munange wa ntwatwa,
co akapwa wakama ku vimyene voshe va asi.
28Cizemo cange cije kucesi kutenguluka
cikakala nendi ku myaka yoshe,
cikumiiyo cange cikapwa cakukola kuli ikeye.
29Umo wa vatekulwila va Ndaviti,
akapwa mwene simbu yoshe.
Vumwene vwendi vukakalako simbu yoshe
noo lilu likahwa.
30“Oloni nga vatekulwila vendi
kuvononoka mashiko ange,
co nga vavyana vilongesa vyange,
31nga vayengula vizilika vyange,
nakujeneka kunyunga mashiko ange,
32co njikavahisa omo vuvi vwavo,
co njikavayandesa omo kupenga-penga kwavo.
33Oloni cizemo cange cije kucesi kutenguluka
kucikatundu ali Ndaviti,
nambe kwonwa kunyunga cikumiiyo cange kuli ikeye.
34Kunjikapokola cikumiiyo cange kuli ikeye embwe,
nambe kutengulula vije vinjinendeka.
35“Njinalisingi lumo na ku myaka yoshe
a lizina lyange lyakujela,
nalumo lwai njikendeka makuli kuli Ndaviti!
36Vatekulwila vendi vakashwana simbu yoshe,
co vumwene vwendi vukakala
simbu yoshe ngwe litangwa.
37Vumwene vwendi vukakalako
myaka yoshe ngwe ngonde,
vukapwa vukaleo vwavuvwa vwa mwilu.”
Mbimbi omwo vanafungulula mwene
38Oloni yove unaluvala na mwene uje iwangwile,
unamuvyana nakumuseza.
39Unapokola cikumiiyo cove na ngamba yove,
co unanyongesa vumwene vwendi njwa.
40Unavujula vivumbe vya nganda yendi,
nakusiwula vimpaka vyendi vyakukola.
41Voshe vaje vaita mu ngila vapukula vivala vyendi,
na miyati ije ili kwoshe-ikwoshe valinakumushendumuna.
42Unaana kuhyana kuli vitozi vendi,
co voshe valinakuvwaelela.
43Kuwamulwililileko mu nzita,
co unamwecelela ngeci vamufungulule.
44Unatundisa mulamu wendi,
co unombila litanda lyendi asi.
45Unakeesa matangwa a vukwenje vwendi,
co unamuzivisa shwamwa.
Lilombelo lyakwamena
46Ukavanda visimbu vingaijo yove Shukulu Kalunga?
Ukavanda myaka yoshe ndi?
Myaka ingaijo vukalu vwove vukashwama ngwe tuhya?
47Yove Shukulu Kalunga,
anuka ngeci simbu yakuyoya kwange
inapu yaindondo,
omwo vikajo watangelele vanu voshe?
48Munu iyajo asa kuyoya, co akeneke kutsa?
Iyajo asa kwamena mwonyo wendi,
ku nzili ya vukalo vwa vatsi?
49Shukulu Kalunga cilikulijo cizemo cove
cije kucesi kutenguluka?
Cilikulijo cikulaeso cije walisingile na Ndaviti?
50Yove Shukulu Kalunga,
yange ngamba yove valinakunjishaula,
vaka-kujeneka kukulaela valinakunjishaula.
51Yove Shukulu Kalunga,
vitozi vove valinakushaula mwene uje iwunaangula!
Valinakumushaula kwoshe kuje kwaya.
52Shangazaleni Shukulu Kalunga ku myaka yoshe!
Ewa! Ewa!
Currently Selected:
Myaso 89: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
