Myaso 88
88
Lilombelo lyakukwasa
Mwaso wa cikota ca Kola
1Yove Shukulu Kalunga Njambi muyoyesi wange,
njitambeka kuli yove mutanya na vutsiki.
2Ziva kulomba kwange,
tolilila ku mutambi wange!
3Njili mu tuyando twakama manene,
co njili kuyehi na kutsa.
4Njinafu ngwe voshe vaje vatsa laja,
co nzili yange yoshe inahu.
5Njinafu ngwe uje ivanombila kuti akati ka vatsi,
ngwe uje ivanatsii nalala mu mbumbo,
uje iwunevala hivya,
uje kuwasa kumukwasa.
6Unanjumbila mu mbumbo yakulova,
mu lisusulungu lyakuzivala vwii.
7Vukalu vwove vunanjisindakana manene,
ngwe mankimba a mema a kalunga.
8Unanjitundisa ku vasamba vange,
co unanjipwisa nji wa vunyengwe kuli vakevo,
njinapu nji cinzinda,
co kunjasa lalo kuputumuka,
9vusiwa vunazimbisa mesho ange.
A litangwa na litangwa njitambeka kuli yove Shukulu Kalunga,
co njijundula mavoko ange kuli yove.
10Kuma ukamwesa vikomokeso vyove ku vatsi ndi?
Kuma vatsi vakasanguka nakukushangazala ndi?
11Kuma cizemo cove cije kucesi kutenguluka
vakacambulula mu mbumbo ndi?
Nambe kulongwa kwove vakacambulula
mu mutambela uje wa tuyando ndi?
12Kuma vikomokeso vyove vakavizivuka mu lisusulungu ndi?
Nambe vilinga vyove vyavivwa
vakavimona lalo mu lifuti lije ndi?
13Njilomba kuli yove Shukulu Kalunga ngeci unjikwase,
co mutondo-tondo lilombelo lyange lyete ku mesho ove.
14Omwo vikajo unanjumbilila kuti yove Shukulu Kalunga?
Omwo vikajo unanjikengesela nima?
15Tunde ku vwanike vwange,
njinayanda manene nakweta kuyehi na kutsa,
njinazeye na vihiso vyove.
16Vukalu vwove vunanjisindakana,
kujujwisa kwove kunanjinyongesa.
17Litangwa lyoshe vyuma evi vinanjizengeleka ngwe livazi,
co vinanjishetula ku mitambela yoshe.
18Unanjishondolwesa kuli vasamba vange va a mbunge,
co lisusulungu likelyo linapu musamba wange lika.
Currently Selected:
Myaso 88: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
