Mateo 5

Yesu alongesa a munkinda

1Yesu wamwene mbunga ya vanu, co walamatele a munkinda aje wakatumbamene asi. Vandongisi vendi vezile kuli ikeye, 2co washangumukile kuvalongesa.

Vivezikiso vya vushunga

(Luka 6:20-23)

3“Vanavezika vaka-kuutwa mu munzinzime,

omwo Vumwene vwa mwilu vunapu vwavo!

4 # Isa 61:2 “Vanavezika vaje valinakulila, omwo Njambi akavazembeleka!

5 # Mya 37:11 “Vanavezika vaje vaka-kukongomeka, omwo vakashwana ano asi!

6 # Isa 55:1-2 “Vanavezika vaje vaka-kuziva njala na lihwila

vya vushunga, omwo Njambi akavakutisa!

7“Vanavezika vaje vaka-kuzivila vakwavo mema ku mbunge,

omwo na vakevo Njambi akavazivila mema ku mbunge!

8 # Mya 24:3-4 “Vanavezika vaje vaka-kujela mu vimbunge,

omwo vakamona Njambi!

9“Vanavezika vaje vaka-kwolwesa n̄ole,

omwo vakavatumbula vana va Njambi!

10 # 1 Pet 3:14 “Vanavezika vaje vayandela vushunga,

omwo Vumwene vwa mwilu vunapu vwavo!

11 # 1 Pet 4:14 “Munavezika omo vamishaula nakumiyandesa nakumivangela vya makuli vyeka na vyeka omwo yange. 12#2 Miz 36:16; Vil 7:52 Vwaeleleni nakujolela manene, omwo vanamitulikila cikandelela ceni cakama mwilu. Omwo omu mukemwo muvayandeselele vaka-kwimanena vaje valivangele kulutwe lweni.

Mwongwa na ceke

(Mako 9:50; Luka 14:34-35)

13“Yeni munapu ngwe mwongwa wa ano asi, oloni nga mwongwa ushamuka, utovala vatijo? Kuutovala embwe, oloni vaumbila kuti, co vanu vakaulyatangela.

14 # Yow 8:12; 9:5 “Yeni munapu ngwe ceke ca vaka-kaye. Nganda yakutungila a munkinda kuyasa kuvanda embwe. 15#Mak 4:21; Luk 8:16; 11:33 Naumo wai ashwameka ndeya, co ayaka mwisi ya lyendeko, oloni ayaka a mesa ngeci itwile ceke voshe vaje vali mu njuvo. 16#1 Pet 2:12 Ngecivene, ceke ceni citwile ku vanu, ngeci vamone vilinga vyeni vyavivwa, co vakashangazala Ishweni ali mwilu.

Vilongesa vya a Mashiko

17“Kesi muyongole ngweni njinaija nakuzimangana Lishiko lya Mosesa nambe vilongesa vya vaka-kwimanena embwe, kunjezile nakuvizimangana, oloni njinaija nakuvishulisa. 18#Luk 16:17 Mwa vushunga njimileka ngwange, kuvanga lilu na asi vineti, oloni ku majwi a Lishiko kukukatundu kalilaka kamo, nambe kakandondo, kuvanga vyoshe vanavishulisa. 19Ngecivene, woshe apokola lishiko limo lya ku majwi a Lishiko, co alongesa vanu ngeci valingemo, akapwa wamundondo mu Vumwene vwa mwilu, oloni woshe akawononoka nakuwalongesa vakwavo, akapwa wakama mu Vumwene vwa mwilu. 20Omwo njimileka ngwange, nga mushaka kukovela mu Vumwene vwa mwilu, kuvanga mupwe va kulongwa manene kutuvakana valongisi va majwi a Lishiko na vaFaliseo, nga ngoconi, co kumukakovela mu Vumwene vwa mwilu.

Vilongesa vya a kuluvala

21 # Kut 20:13; Kwi 5:17 “Mwaziva laja muvalekele vakukulwila vetu ku san̄ulu ngwavo, ‘Kesi mukatsiye, co woshe atsiya mukwavo vakamusompesa.’ 22Oloni yange njimileka ngwange, woshe aluvala na mukwavo vakamusompesa, co woshe uje atumbula mukwavo ngwendi, ‘Yove u cikolokomba,’ vakamutwala ku munga ya vakulunu mukumusompesa, co woshe atumbula lalo mukwavo ngwendi, ‘Yove u cilema,’ ali mu vushonde vwakuya ku mbulu ya tuhya. 23Ngecivene, nga ukombelela n̄ombelo ku mutula, co kuje vene wanuka mulonga uwavulumwine kuli mukweni, 24seza n̄ombelo yove ku mutula, akulivanga ya ukalisambese na mukweni, asinoni wiluka nakukombelela n̄ombelo yove.

25“Lisambese vwasi na muka-n̄ole yove uje mumunalivulumwina omo muya mumo mu ngila kukusompa, kutewa akakutwala kuli lyaako, co lyaako akakwana kuli lishwalale, co lishwalale akakwaka mu kamenga. 26Mwa vushunga njikuleka ngwange, kuukatundumo kuvanga unafwete vimbongo kumanesa mulonga wove.

Vilongesa vya a vupangala

27 # Kut 20:14; Kwi 5:18 “Mwaziva laja muje vendekele ngwavo, ‘Kesi mulinge vupangala.’ 28Oloni yange njimileka ngwange, woshe akenga shwii munakazi na lishungu nalingi laja nendi vupangala mu mbunge yendi. 29#Mat 18:9; Mak 9:47 Nga lisho lyove lya cilyo likutanukisa kulinga vuvi, licakuvulemo ulyumbile kuti! Mwamuvwa kuli yove cilyo cove cimo kunyonga kutuvakana vombile muvila wove woshe mu mbulu ya tuhya. 30#Mat 18:8; Mak 9:43 Co nga livoko lyove lya cilyo likutanukisa kulinga vuvi, livatule, co lyumbile kuti! Omwo mwamuvwa kuli yove cilyo cove cimo cinyonge kutuvakana kumbila muvila wove woshe mu mbulu ya tuhya.

Vilongesa vya a kukondola munakazi

(Mateo 19:9; Mako 10:11-12; Luka 16:18)

31 # Kwi 24:1-4; Mat 19:7; Mak 10:4 “Co lalo vendekele laja ngwavo, ‘Woshe akondola munakazi wendi, napande kumwana mukanda wakutsiya vulo.’ 32#Mat 19:9; Mak 10:11-12; Luk 16:18; 1 Koli 7:10-11 Oloni yange njimileka ngwange, woshe akondola munakazi wendi kuvanga a mulonga wa vupangala, amupwisa muka-vupangala nga akashomboka lalo, co woshe ambata uje munakazi ivanakondola alinga nendi vupangala.

Vilongesa vya a kulisinga

33 # VaLe 19:12; Kul 30:2; Kwi 23:21 “Mwaziva lalo muje valekele vakukulwila vetu ku san̄ulu ngwavo, ‘Kesi upokole cikulaeso cove, oloni linga vije viwalisingile ku mesho a Shukulu Kalunga.’ 34#Yak 5:12; Isa 66:1; Mat 23:22 Oloni yange njimileka ngwange, kesi mukalisinge omo mulinga lizivasano. Kesi mukalisinge na lilu, omwo likelyo lyapwa litanda lya Njambi, 35#Isa 66:1; Mya 48:2 nambe kulisinga na asi, omwo apwa avulyatelo vwendi, nambe na Yelusalema, omwo ikeyo yapwa nganda ya Mwene wakama. 36Co lalo kesi ukalisinge na mutwe wove, omwo kuwasa kutokesa nambe kuzivalesa cin̄ambu cove cimo. 37Kwendeka kweni kupwe ‘Eyo’ nambe ‘Embwe’ omwo vyoshe vyeka muwezelelako vitunda kuli Liyavola.

Vilongesa vya a shambandinga

(Luka 6:29-30)

38 # Kut 21:24; VaLe 24:20; Kwi 19:21 “Mwaziva laja muje vendekele ngwavo, ‘Lisho na lisho, co liyo na liyo.’ 39Oloni yange njimileka ngwange, kesi ulinge shambandinga kuli munu uje akulinga mwamuvi. Oloni nga munu akupupa ku nana yove ya ku cilyo, mutengulwile lalo ku nana ya ku cimoshwe. 40Co nga munu ashaka kukusompesa ngeci akunyeke cikoveyo cove, mwane lalo na kazaku kove. 41Co nga munu akusindiya ngeci umusindikiye vungenzi vwa nunda imo, musindikiye vungenzi vwa vinunda vivali. 42Woshe akulomba mwane kesi umumine, co nga munu ashaka kukumuna cuma kuli yove, mwaneco kesi umumine embwe.

Kuzema vitozi

(Luka 6:27-28,32-36)

43 # VaLe 19:18 “Mwaziva laja muje vendekele ngwavo, ‘Zema mundambo wove, co zinda citozi cove.’ 44Oloni yange njimileka ngwange, zemeni vitozi veni, co lombeleleni vaje valinakumiyandesa, 45ngeci mupwe vana va Ishweni ali mwilu. Omwo ikeye akatuwisila litangwa lyendi a vanu vavavi na ali vanu vavavwa, co akanyokesa nyonzi ali vaka-vushunga na ali vaka-vuvi. 46Omwo nga muzema vaje vamizema, cikandelela mukajo mukatambula kuli Njambi? Kuma nameme vaka-kutambula lisimu kesi mukemwo muvakalingi ndi? 47Co nga mukendwisa lika vasamba veni, kumwalingile cuma cacivwa kutuvakana vakweni voshe. Kuma nameme vaka-kujeneka kukulaela kuvesi kulinga ngoco ndi? 48#VaLe 19:2; Kwi 18:13 Ngecivene, munapande kupwa vakujela ngwe Ishweni ali mwilu wapwa wakujela.

Currently Selected:

Mateo 5: MBB

Highlight

Copy