Mateo 6
6
Vilongesa vya a kukwasa vaka-kujeneka
1 #
Mat 23:5
“Nyanyameni kutewa mulingila vushunga vweni ku mesho a vanu ngeci vanu vamone vije vimulinakulinga. Nga mulinga vyuma vije ku mesho a vanu, kumukatambula cikandelela kuli Ishweni uje ali mwilu.
2“Ngecivene, omo mwana cuma kuli muka-kujeneka, kesi mulimwese embwe, ngwe muvakalingi vaka-civembulu mu masinangonge na mu vingila, ngeci vanu vavashangazale. Mwa vushunga njimileka ngwange, vanatambula laja cikandelela cavo. 3Oloni omo mwana cuma kuli muka-kujeneka, cilingeni mu vushweke ngeci nameme musamba weni kesi acizivuke, 4ngecivene, eyi inapu n̄anda ya mu vushweke. Co Ishweni uje ali mwilu muka-kumona vije mukalingi mu vushweke, akamyana cikandelela ceni.
Vilongesa vya a malombelo
(Luka 11:2-4)
5 #
Luk 18:10-14
“Co omo mulombela, kesi mulombele ngwe vaka-civembulu, omwo vakevo vazema kwimana nakulombela mu masinangonge na masambwa-ngila, ngeci vanu voshe vavamone. Mwa vushunga njimileka ngwange, vanatambula laja cikandelela cavo. 6Oloni yove omo ulombela, ya ku mulili wove, nakushoka ku cikolo, co lombela kuli Isho, uje kuwasa kumona. Co Isho uje muka-kumona vije ukalingi mu vushweke, akakwana cikandelela cove.
7“Co mukulomba kweni, kesi mutumise manene majwi amangi akujeneka seo, ngwe muvakalingi vaka-kujeneka kukulaela, omwo vayongola ngwavo vinjambi vavo vakavaziva omwo a majwi avo amangi-mangi. 8Kesi mupwe ngwe vakevo, omwo Ishweni nazivuka laja vije vimunajeneka omo kanda mulombe. 9Omu mukemwo mumunapande kulomba, ngweni,
‘Tatetu uli mwilu,
valemese lizina lyove,
10Vumwene vwove vwije,
cizango cove vacilinge ano asi,
ngwe omwo vakacilingi mwilu.
11Twane kulya kwetu kwa litangwa lyangongo,
12tusambese ku milonga yetu,
ngwe yetu lalo mutukasambesa vaka-kutuvulumwina.
13Kesi ututwamenene ku vyeseko,
oloni twamene ku vuvi!
Omwo vumwene vunapu vwove,
na nzili na vumpau, ku myaka yoshe. Ewa.’
14 #
Mak 11:25-26
“Omwo nga musambesa vakweni ku milonga yavo, Ishweni ali mwilu akamisambesa yeni lalo. 15Oloni nga kumusambesa vakweni ku milonga yavo, co Ishweni lalo kakamisambesa ku milonga yeni.
Vilongesa vya a kulikela kulya
16“Co omo mulikela kulya, kesi mwombwe ngwe muvakalingi vaka-civembulu. Omwo vakevo vakaviisa vihanga vyavo, ngeci vanu vavamone ngwavo vanalikela kulya. Mwa vushunga njimileka ngwange, vanatambula laja cikandelela cavo. 17Oloni omo mulikela-kela kulya, jweleni ku mesho nakusakula vin̄ambu vyeni, 18ngeci vanu kesi vamimone ngwavo munalikela kulya, kuvanga Ishweni lika uje kumwasa kumona ikeye azivuka. Co Ishweni, muka-kumona vije vimulinakulinga mu vushweke, akamyana cikandelela ceni.
Vufuko vwa mwilu
(Luka 12:33-34)
19 #
Yak 5:2-3
“Kesi mulitulikile vufuko vwa ano asi, aje ali tunembulu na n̄alawe vikakuvuviisa, co ali na vezi lalo vatuva nakuvwiva. 20Oloni litulikileni vufuko vwa mwilu, muje tunembulu nameme n̄alawe kuvyasa kuvuviisa, nambe vezi kuvasa kuvutuva nakuvwiva. 21Omwo mbunge yove simbu yoshe yakala kuje kuvwakala vufuko vwove.
Ceke ca muvila
(Luka 11:34-36)
22“Omwo mesho ove akewo anapu ngwe ndeya ya muvila wove. Ngecivene, nga mesho ove anapu amavwa, muvila wove woshe ukala na ceke. 23Oloni nga mesho ove anapu akutsitsivala, muvila wove woshe uli mu lisusulungu. Ngecivene, nga ceke cili muli yove citenguluka kupwa lisusulungu, co lisusulungu muli yove likapwa lyakukomokesa manene.
Njambi na vufuko
(Luka 16:13; 12:22-31)
24“Munu naumo wai asa kupangela vashukulu vavali, kuvanga azindeo umo nakuzemao mukwavo, nambe apwa wa kulongwa ku umo nakushaula mukwavo. Co kuwasa kupangela Njambi nakupangela lalo vimbongo.
25“Ngecivene, njimileka ngwange, kesi mulishoshomwene akuyoya kweni, ngweni tukalya vika, nambe ngweni tukanwa vika, nambe vya mivila yeni ngweni, tukazala vika. Omwo myonyo yeni ili na seo kutuvakana vyakulya. Co mivila yeni lalo ili na seo kutuvakana vyakuzala. 26Kengeni tuzila, kuvesi kukuva nameme kuteja nambe kutulika mu vishete, oloni Ishweni ali mwilu alinakuvalisa. Yeni muli na seo yakama kutuvakana tuzila. 27Co iyajo akati keni nga alishoshomwena ase kuwezelela ku matangwa a ku mwonyo wendi?
28“Co omwo vikoni mukalishoshomwena a vuzalo? Kengeni vishani muje muvikakolo, vikevyo kuvyesi kupanga nambe kulipangela vuzalo vikevyo vavenya. 29#1 Vim 10:4-7; 2 Miz 9:3-6 Oloni njimileka ngwange, nameme Mwene Solomoni mu vufuko vwendi vwoshe kazalele vuzalo vwavuvwa ngwe vwa vishani evi. 30Oloni nga Njambi azika mwila wa mu shwata uje ukalako lelo lika, oloni imene waiko, vaumbila mu liko nakuwenyeka, kuma kasa kumizika ndi? Yeni vaka-kukulaela kwakundondo!
31“Ngecivene, kesi mulishoshomwene ngweni, ‘Tukalya vika?’ Nambe ‘Tukanwa vika?’ Nambe ‘Tukazala vika?’ 32(Omwo vyuma vyoshe evi vikevyo vivakashakezeka vanu vaje vaka-kujeneka kukulaela.) Co Ishweni ali mwilu azivuka ngwendi munajeneka vyuma vyoshe evi. 33Oloni akulivanga shakezekeni Vumwene vwendi, na vushunga vwendi, co vyoshe evi akamiwezelelavyo. 34Ngecivene, kesi mulishoshomwene ku litangwa lya imene, omwo litangwa lya imene likalimwena likelyo vavenya. Kucitava kuwezelelako ku tuyando tuje tulinakwija a litangwa na litangwa.
Currently Selected:
Mateo 6: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
