Mateo 4
4
Yesu vamweseka
(Mako 1:12-13; Luka 4:1-13)
1 #
VaHe 2:18; 4:15 Asinoni Munzinzime watwalele Yesu mu mambo ngeci Liyavola akamweseke. 2Omo Yesu walikelele kulya matangwa makumi awana mutanya na vutsiki, co wazivile njala. 3Co Liyavola wezile kuli ikeye wendekele ngwendi, “Nga u Muna Njambi, shika mamanya awa ngeci alimuke makende.”
4 #
Kwi 8:3
Oloni Yesu wamukumbulwile ngwendi, “Visoneka vyendeka ngwavyo, ‘Munu kasa kuyoya na makende lika embwe, oloni kuvanga na majwi oshe a Njambi.’ ”
5Co Liyavola watwalele Yesu ku Yelusalema, Nganda Yakujela, wamwimikile a kashongwa ka Njuvo ya Shukulu Kalunga, 6#Mya 91:11-12 co wendekele kuli ikeye ngwendi, “Nga u Muna Njambi, lyumbile asi, omwo visoneka vyendeka ngwavyo,
‘Njambi akashika tungelo twendi ali yove,
co vakakukavwila na mavoko avo,
ngeci myanja yove kesi ikatanuke ku limanya.’ ”
7 #
Kwi 6:16
Yesu wamukumbulwile ngwendi, “Oloni visoneka vyendeka ngwavyo, ‘Kesi weseke Shukulu Kalunga Njambi yove.’ ”
8Co Liyavola watwalele lalo Yesu a munkinda waulaja manene, wamumwesele mafuti oshe a ano a kaye na vumpau vwao vwoshe. 9Co Liyavola wendekele kuli ikeye ngwendi, “Nga utsikama a mavuli nakunjilemesa, co vyoshe evi vikapwa vyove.”
10 #
Kwi 6:13
Yesu wamukumbulwile ngwendi, “Tunda kuli yange, Satana! Omwo visoneka vinendeka ngwavyo, ‘Ukalemesa Shukulu Kalunga Njambi yove nakumupangela ikeye lika.’ ”
11Asinoni Liyavola wasezele Yesu, co tungelo vezile nakumukwasa.
Yesu ashangumuka vipangi vyendi mu Ngalileya
(Mako 1:14-15; Luka 4:14-15)
12 #
Mat 14:3; Mak 6:17; Luk 3:19-20 Omo Yesu wazivile ngwavo Yowano vanamukwata nakumwaka mu kamenga, co ikeye waile ku Ngalileya. 13#Yow 2:12 Katumbamene kuje ku Nazaleta embwe, oloni waile ku Kapenauma, limbo lije lyakele kuyehi na Lishali lya Ngalileya, mu lifuti lya Zembuloni na lifuti lya Nafetali. 14Ngecivene, vije vyendekele Isaya muka-kwimanena vipwe vya vushunga ngwendi,
15 #
Isa 9:1-2
“Lifuti lya Zembuloni, na lifuti lya Nafetali,
mu ngila yakuya ku mema a kalunga,
ku mutambela ukwavo wa Ndonga ya Yondau,
Ngalileya lifuti lya vanu vaje kesi vaYunda.
16Vanu vaje vakele mu lisusulungu vanamono ceke.
Vaje vakele mu lifuti lya lisusulungu lya kutsa,
ceke cinavatwila.”
17 #
Mat 3:2
Kutunda a simbu ije Yesu washangumukile kwambulula ngwendi, “Tengulukeni mu vimbunge vyeni ngeci mutunde ku vuvi, omwo Vumwene vwa mwilu vuli muyehi.”
Yesu asana vaka-kujevela visi vawana
(Mako 1:16-20; Luka 5:1-11)
18Omo Yesu wakele nakushwangesa Lishali lya Ngalileya, wamwene vandolome vavali vaka-kujevela visi, Simoni (uje vatumbula Petulu) na ndolome yendi Anduleo, vakele nakutsiya visi mu lishali a linimbwa. 19Yesu wendekele kuli vakevo ngwendi, “Njikaveni, co njikamipwisa vaka-kujevela vanu.” 20Co vwasi-vwasi vasezele manimbwa avo vakavele Yesu.
21Omo washwenyeseleko wamwene lalo vandolome vavali, Yakomba na Yowano vana va Zembendeo, vakele mu vwato amo na ishavo Zembendeo, vakele nakutungulula manimbwa avo, co Yesu wavasanene, co 22vwasi-vwasi vasezele vwato na ishavo, co vakavele Yesu.
Yesu alongesa nakwambulula nakukangwisa
(Luka 6:17-19)
23 #
Mat 9:35; Mak 1:39 Yesu wendanganene mu Ngalileya mwoshe, nakulongesa mu masinangonge avo, nakwambulula Vin̄anda Vyavivwa vya Vumwene nakukangwisa vanu voshe vaka-mishongo yoshe na vaka-kuvinja vakuliseza-seza. 24Lutsimo lwendi lwetele na ku lifuti lyoshe lya Silya, co vamunenelele vaje voshe vakele nakuvinja, vakele na mishongo yakuliseza-seza yoshe na mishongo yeka, na vaje vayandele manene na minzinzime yakujwala, na vaka-kushinya, na vaka-kayekele, co Yesu wavakangwisile voshe. 25Mbunga yamukavele vaje vatundile ku Ngalileya, na ku Vinganda Likumi, na ku Yelusalema, na ku Yundeya, na ku lifuti lya musambwa ya Ndonga ya Yondau.
Currently Selected:
Mateo 4: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
