Mateo 3
3
Kwambulula kwa Yowano Muka-kumbwitika
(Mako 1:1-8; Luka 3:1-18; Yowano 1:19-28)
1A matangwa aje kwezile Yowano Muka-kumbwitika, wambulwile mu mambo ya Yundeya ngwendi, 2#Mat 4:17; Mak 1:15 “Tengulukeni ku vivi vyeni, omwo Vumwene vwa mwilu vuli muyehi!” 3#Isa 40:3 Omo ou ikeye Yowano uje yatumbwile Isaya muka-kwimanena ngwendi,
“Lijwi lya umo atambeka mu mambo ngwendi,
‘Vwaeseni tapalo ya Shukulu Kalunga,
sheveni mu ngila yendi ngeci akwitilemo!’ ”
4Yowano wazalele vuzalo vwa maka a kamelo, na mwiva wa cipapa mu mbunda yendi, co vyakulya vyendi vyapwile vimbimba mikumbi na vuki. 5Vanu vakutunda ku Yelusalema na ku Yundeya yoshe na ku lifuti lyoshe lije lya kulyata na Yondau vezile kuli ikeye, 6vakevo valitavelele ku vivi vyavo, co wavambwitikile#3:6 CO WAVAMBWITIKILE: Eli lijwi kumbwitika na majwi eka akulifwa ngwe eli, linatundu ku lijwi mu ciNgiliki ngwavo, Baptizo* (kumbatiza). Kenga lijwi Baptizo mu mukana wa majwi ali kunima ya Livulu. mu Ndonga ya Yondau.
7Oloni omo Yowano wamwene vaFaliseo na vaSanduki vavangi vakele nakwija kuli ikeye ngeci avambwitike, co wendekele kuli vakevo ngwendi, “Eni manyoka! Iyajo naminangula ngeci mutewe vukalu vwa Njambi vuje vulinakwija? 8Lingeni vyuma vije vimwesa ngeci munatenguluka ku vivi vyeni. 9Kesi mulyendekese mu vimbunge vyeni ngweni muli na kukulwila yeni Avilahama. Mwa vushunga njimileka ngwange Njambi asa kutengulula mamanya awa nakuwapwisa vatekulwila va Avilahama! 10#Mat 7:19 Njaviti vanayaka laja ku mizi ya miti, muti woshe kuwimi vushuka vwavuvwa vakaushinja nakuumbila mu tuhya. 11Njimimbwitika mu mema mukumwesa kutenguluka kwa vimbunge vyeni, oloni owo akaija munima yange akamimbwitika na Munzinzime Wakujela na mu tuhya. Ikeye wakama kutuvakana yange, nameme vin̄aku vyendi kunjivyasa kuvyambata. 12Shewa ili mu livoko lyendi, ikeye akapepa nakujelesa mwamuvwa vinona vyoshe ku lijungwilo lyendi, co tiliku akaitulikila mu cishete cendi, oloni lijungu lyoshe akalyenyeka na tuhya kutwesi kuzima.”
Yesu vamumbwitika
(Mako 1:9-11; Luka 3:21-22)
13A simbu ije Yesu watundile ku Ngalileya wezile kuli Yowano ku Yondau ngeci amumbwitike. 14Oloni Yowano washakele kumuvyana ngwendi, “Yange njapandele kwija kuli yove ngeci unjimbwitike, kesi yove wije kuli yange ngeci njikumbwitike!”
15Oloni Yesu wamukumbulwile ngwendi, “Njitave ololo vene omwo catupande kupwisamo vushunga vwoshe.” Co Yowano wamutavele.
16Omwo Yesu vamumbwitikile, vwasi-vwasi omo watumukile mu mema, co mwilu mwashokolokele, co wamwene Munzinzime wa Njambi watongamene ali ikeye ngwe katela. 17#Kus 22:2; Mya 2:7; Isa 42:1; Mat 12:18; 17:5; Mak 1:11; Luk 9:35 Co mwilu mwatundile lijwi ngwalyo, “Ou ikeye Munange injazema, njilinakuvwaelela ali ikeye.”
Currently Selected:
Mateo 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
