Kushangumuka 49

Yakomba avezikisa vana vendi va vanalume

1Asinoni Yakomba wasanene vana vendi va vanalume wendekele kuli vakevo ngwendi, “Ijeni njimileke evi vikalingiwa ali yeni kulutwe.

2“Ijeni mutolilile yeni vana va Yakomba,

tolilileni kuli ishweni Isalele.

3“Luvena, yove ntwatwa yange,

yove wapwa nzili yange

munange wakulivanga wa mu vukwenje vwange,

munange wakulyakako na nzili yoshe

kutuvakana vana vange voshe.

4Yove wafwa ngwe mankimba a livazi,

oloni yove kuukapu uwavulemu vwakama,

omwo yove walalele na lishano lyange lya mbanja,

co wazivisile shwamwa vulili vwa isho.

5“Simyoni na Levi vakevo mu vundolome vwavo,

mikwale yavo yapwa vitwa mukuvulumuna.

6Kunjikalipandakana navo muvisimutwiya vyavo

vya mu vushweke,

nambe kunjikakala navo mu vikungulukilo vyavo,

omwo vakevo vatsiile vanu mu vukalu,

co na mu vuuka vwavo vatetangele makana a vin̄unzi.

7Cisingo cikale a vukalu vwavo,

omwo vunapu vwakukomokesa manene,

cisingo cikale a vukalu vwavo,

omwo vunapu vwa muuka.

Njikavaangunwina mu lifuti lyoshe lya Yakomba,

nakuvashandwela akati ka vanu vaIsalele.

8“Yunda, vandolome vove vakakushangazala,

yove ukakwata vitozi vove a singo,

vamunyanyoko vakakutsikamena nakukulemesa.

9 # Kul 24:9; Kuj 5:5 Yunda napu ngwe ndumba,

atsiya evi akwata,

elukila lalo ku mbulu yendi.

Alyolola nakulala

naumo wai asimpa ngeci amukasumune.

10Mulamu wa vumwene kuukatundu kuli Yunda,

nambe mulamu wa muka-kushwana kuukatundu

ku vatekulwila vendi,

noo vavenyawo naija,#49:10 NOO VAVENYAWO NAIJA: Nambe, noo Shilo naija, nambe, noo aija ku Shilo.

miyati ya vanu vakamwononoka.

11Ikeye akakuta muna cimulu cendi

ku mukolovozi wa vushuka vwa vinyu,

ukewo wapwa wauvwa manene ku mikolovozi

ya vushuka vwa vinyu.

Ikeye akakushu vuzalo vwendi

mu vinyu vyakuvenga ngwe maninga.

12Mesho endi akavenga ngengu omwo kunwa vinyu,

na mayo endi akatoka too omwo kunwa mavele.#49:12 MESHO ENDI...MAVELE: Nambe, mesho endi akavenga ngengu kutuvakana vinyu, mayo endi akatoka too kutuvakana mavele.

13“Zembuloni ikeye akakala

ku ngenge ya mema a kalunga.

Cikuma cendi cikapwa cakututikila mato akama.

Lifuti lyendi liketa na ku Sindone.

14“Isakale ikeye napu ngwe cimulu wa nzili

alala nakuvutama mukati ka visileyi,

15wamwene kuje kwakuhwimina kunapu kwakuvwa

na lifuti linapu lyalivwa.

Ngeci akulama nakwambata citele

nakumusindiya kupanga ngwe ndungo.

16“Ndani ikeye akapwa muka-kushwana vanu vendi,

ngwe miyati ikwavo ya Isalele.

17Ndani akapwa ngwe linyoka kumukulo wa tapalo,

limbwambwa wa vushungu vwa vukalu

kumukulo wa ngila,

uje ashuma ku mbemba ya kavalu,

ngeci uje alondao andumukile kunima.

18“Njavandamena kwamena kwove,

yove Shukulu Kalunga.

19“Ngande vakamulwisa ku mbunga ya vaka-kwiva,

oloni ikeye akatenguluka nakuvasheka.

20“Lifuti lya Ashele likatumisa manene

vyakulya vyavivwa,

ikeye akakala na vyakulya vinapande kuli mwene.

21“Nafetali napu ngwe shonge wakulyendela ngoco,

ou asema vinzova vavavwa.

22“Yosefa napu ngwe ngolo wakukundama

ku lisima lya kavwelu-vwelu,

muna ngolo wa ku mutambela wa ku lilundu.#49:22 YOSEFA...MUTAMBELA WA KU LILUNDU: Nambe, Yosefa nalifu na muti wa ku kavwelu-vwelu, muti wakwima vushuka vwavungi uje unashalavela a civumbe.

23Vitozi vendi vakamulwisa na vukalu

nakumusheka na mata avo a lusipa na mikili.

24Oloni vuta vwendi vwa lusipa vukapwa vwakukola ngo,

mavoko endi akapwa a nzili,

omwo a nzili ya Njambi Muka-nzili yoshe,

ikeye Njambi ya Yakomba,

nomwo a nzili ya Kanyungi,

ikeye Cimpaka ca Isalele.

25Ikeye Njambi ya vaishweni, ou alinakumikwasa,

Njambi Muka-nzili yoshe, ou alinakumivezikisa

na vivezikiso vya nyonzi ilinakutunda kwilu

na mema akulova alinakutunda mwisi ya livu,

na vivezikiso vya vimuna vavangi na vanike.

26Vivezikiso vya vimbuto na vishani,

vivezikiso vya minkinda yalaja

vyuma vyakuvwaelelesa,#49:26 VIVEZIKISO...VYAKUVWAELELESA: Kunungulula kumo kwalaja mu ciHevelu ngwavo, na vivezikiso vya tiliku na vishani, na vivezikiso vya malundu alaja.

vyakutunda ku malundu a ku myaka yoshe.

Ngeci vivezikiso evi vikale ali Yosefa,

uje waangukile kuli vandolome vendi.

27“Mbenjemani wapwa ngwe kangunga muka-kutsiya.

Mutondo na cingwezi ikeye alinakutsiya nakulya.”

28Eyi ikeyo miyati ya Isalele likumi na ivali, omu mukemwo mwendekele ishavo omo wavezikisile vana vendi umo na umo civezikiso cije cinamupande.

Yakomba atsila mu Ingito, kumutsinda mu Kanana

29Asinoni Yakomba washikile vana vendi ngwendi, “Ololo njilinakutsa, co mukanjitsinda amo na vatate mu linzenzengoma lije lyakala mu lihya lya Efelone kaHiti, 30#Kus 23:3-20 ku Makepela mu ngangela mu lifuti lya Kanana. Avilahama walandele linzenzengoma lije na lihya kuli Efelone kupwa livu lya vimbumbo. 31#Kus 25:9-10; 35:29 Kuje kukekwo vatsindile Avilahama na munakazi wendi Sala, kukekwo lalo vatsindile Isake na munakazi wendi Lembeka, co kuje kukekwo lalo njatsindile Leya. 32Lihya na linzenzengoma lije lilimo vavilandele kuli vaHiti, ngeci mukanjitsindemo.” 33#Vil 7:15 Omo Yakomba wamanesele kushika vana vendi, welwisile mendi endi a vulili, co watsile.

Currently Selected:

Kushangumuka 49: MBB

Highlight

Copy