Kushangumuka 48
48
Yakomba avezikisa Efalime na Manase
1Omo kwetile ka simbu, valekele Yosefa ngwavo, “Isho alinakuvinja.” Ngecivene, waile na vana vendi vavali, Manase na Efalime, mukumona Yakomba. 2Omo Yakomba vamulekele ngwavo, “Munove Yosefa naija nakukumona,” co walitakamesele na nzili watumbamene a vulili. 3Yakomba wendekele kuli Yosefa ngwendi, “Njambi Muka-nzili yoshe walisholwele kuli yange ku Luze mu lifuti lya Kanana, nakunjivezikisa. 4#Kus 28:13-14 Ikeye wendekele kuli yange ngwendi, ‘Njikakwana vana vavangi, co vatekulwila vove vakapwa miyati yaingi, njikana lifuti eli kuli vatekulwila vove. Likapwa vufuko vwavo ku myaka yoshe.’ ”
5Yakomba wendekele lalo ngwendi, “Yosefa, vana vove vavali, ava vawakitilile muno mu Ingito omo yange kanda njicete kuno, vanapu vange. Efalime na Manase vunene vanapu vana vange ngwe Luvena na Simyoni. 6Nga yove lalo ukakala na vana vakwavo va vanalume, ovo vakapwa vove, co vushwana vwavo vakavutumbwila muli vandolome vavo Efalime na Manase. 7#Kus 35:16-19 Omo njatundile ku Mesopotamya, Lakele watsililile mu lifuti lya Kanana muyehi na Efaleta, njakele na vusiwa vwakama, co njamutsindile kumukulo wa ngila ya ku Efaleta.” (Ololo Efaleta inapu Mbetelehema.)
8Omo Yakomba wamwene vana va Yosefa wehwile ngwendi, “Ava vanike vana veyajo?”
9Yosefa wamukumbulwile ngwendi, “Ava vanapu vana vange va vanalume, ava Njambi nanjanavo muno mu Ingito.”
Yakomba wendekele ngwendi, “Vanene kuno kuli yange ngeci njivavezikise.” 10Mesho a Yakomba atsitsivalele omwo vukulukazi, kasele kumona mwamuvwa. Ngecivene, Yosefa waanene vanike kuli ishe, co wavavumbatelele nakuvatsemba. 11Yakomba wendekele kuli Yosefa ngwendi, “Kunjayongwele ngwange njikakumona lalo, co ololo Njambi nanjitava ngeci njimone vana vove.” 12Asinoni Yosefa wavatundisile a mendi a Yakomba, co wakulamene ku mesho a ishe.
13Yosefa waakele Efalime ku livoko lya Yakomba lya cimoshwe, co Manase ku livoko lya cilyo. 14Oloni Yakomba walindakanene mavoko endi, livoko lyendi lya cilyo walyakele a mutwe wa Efalime nameme ikeye wapwile mutinikila, co livoko lya cimoshwe walyakele a mutwe wa Manase, uje wapwile mukulunu. 15Asinoni Yakomba wavezikisile Yosefa ngwendi,#48:15 WAVEZIKISILE YOSEFA: Mukuvezikisa Efalime na Manase mukemwo Yakomba mwavezikisilile Yosefa.
“Njambi, ou ivapangelele vatate Avilahama na Isake,
avezikise vakwenje ava!
Njambi, ou wanjitwamenenene kweta ku lelo lino,
avavezikise!
16Kangelo, uje wanjipatwile kukuvulumuka kwoshe,
avavezikise!
Lizina lyange na lizina lya tate Avilahama na Isake
liyoye ali vanike ava!
Vakale na vana vavangi na vatekulwila vavangi!”
17Omo Yosefa wamwene ngeci ishe waakele livoko lyendi lya cilyo a mutwe wa Efalime camuvisile, co wakwatele ku livoko lya ishe ngwendi alitundise a mutwe wa Efalime alyake a mutwe wa Manase. 18Yosefa wendekele kuli ishe ngwendi, “Kesi ngacije tate. Manase ikeye ntwatwa, aka livoko lyove lya cilyo a mutwe wendi.”
19Oloni ishe wavyanene, wendekele ngwendi, “Njizivuka munange, yange njazivuka. Vatekulwila va Manase lalo vakakala na vanu vavangi. Oloni ndolome yendi wa mwanike akapwa wakama kumuhyana, co vatekulwila vendi vakapwa muyati wakama.”
20 #
VaHe 11:21
Yakomba wavavezikisile a litangwa lije, co wendekele ngwendi, “Ali yeni, vaIsalele vakakwisula mazina eni vakendeka ngwavo ‘Njambi amipwise ngwe Efalime na Manase.’ ” Mu ngila eyi Yakomba waakele Efalime kulutwe lwa Manase.
21Asinoni Yakomba wendekele kuli Yosefa ngwendi, “Ngwe muwamono, yange njili muyehi na kutsa, oloni Njambi ali nove amo. Ikeye akakwilwisila lalo ku lifuti lya vakukulwila vove. 22Njilinakukwana Shekeme, mutambela uje wa vwilo, uje unjatambwile kuli vaAmoli na mukwale wange na vuta vwange vwa lusipa. Unapu wove, kesi wa vandolome vove.”
Currently Selected:
Kushangumuka 48: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006