Kushangumuka 50

1Yosefa walyalangele ali ishe, walilile nakutsemba cihanga ca ishe. 2Asinoni Yosefa washikile vimbanda vendi ngeci vomise muvila wa ishe, co vimbanda valingile ngacije. 3Kwetile matangwa makumi awana, ikeyo simbu yapwile yakumisa mivila ya vivimbi. Co vaka-Ingito vamulilile matangwa makumi atanu na avali.

4Omo simbu yakulila ishe yahwile, Yosefa wendekele kuli vamyata va mwene ngwendi, “Mwane, nga njinawana ngozi ku mesho eni twaleni lijwi eli kuli mwene ngweni, 5#Kus 47:29-31 ‘Omo tate wakele kuyehi na kutsa, wanjishikile ngwendi njimukulaese ngeci njikamutsinde muje mu mbumbo ije yavwaeselele cimweja mu lifuti lya Kanana. Co mwane, njitave njikatsinde tate, asinoni njikeluka.’ ”

6Mwene wamukumbulwile ngwendi, “Ya ukatsinde isho, ngwe omo muwamukulaesele mukemwo muunapande kulinga.”

7Ngecivene, Yosefa waile nakutsinda ishe. Co vamyata voshe va mwene, na vakulunu va mu mbanja yendi, na vanalume voshe va vantwama va mu Ingito vaile amo na Yosefa. 8Na naanga ya Yosefa, na vandolome vendi, na vaje voshe va ka naanga ya ishe vaile amo nendi, kuvanga vana vavo lika vavandondo na vimanga vavo, na vimembe vavo, na vingombe vavo, vakevo vasalele mu lifuti lya Ngoshene. 9Vaka-makalu na vaka-tuvalu vaile amo na Yosefa, co yapwile mbunga yakama manene.

10Omo vetele ku mwela wa lijungwilo ku Atande mu ngangela ya Yondau, valilile nakukangoka simbu yakama manene, co Yosefa walingile ciwano cakulila ishe matangwa atanu na avali. 11Omo vandambo va ku Kanana vamwene vaje vanu valinakulila ku Atande, vendekele ngwavo, “Eci cikeco ciwano cakulila cakama civalinakulinga vaka-Ingito!” Omu mukemwo mwela uje vaulukile lizina lya Avele Mizelaime.

12Ngecivene, vana va Yakomba valingile ngwe mwavashikile ishavo. 13#Vil 7:16 Vatwalele muvila wendi ku Kanana nakukautsinda muje mu linzenzengoma ku Makepela mu ngangela ku Mamele mu lihya lije Avilahama walilandele kuli Efelone kaHiti kupwa livu lya vimbumbo. 14Omo Yosefa wamanesele kutsinda ishe, welukile lalo ku Ingito na vandolome vendi na voshe vaje vaile navo mukutsinda ishe.

Yosefa asimpisa vandolome vendi

15Munima ya kutsa kwa ishavo, vandolome va Yosefa vendekele ngwavo, “Vatijo nga Yosefa akatuzinda, nakutulinga shambandinga ku vije vitwamulingile?” 16Ngecivene, vatumine lijwi kuli Yosefa ngwavo, “Omo tatetu kanda atse, 17watushikile kulomba kuli yove ngwendi, ‘Mwane, sambesa mulonga wa vandolome vove uje valingile muje vakulingile mwamuvi.’ Ololo mwane tusambese ku kupenga-penga kuje yetu vangamba va Njambi ya isho twalingile.” Yosefa walilile manene omo watambwile lijwi eli.

18Asinoni vandolome vendi vakevo vavenya vezile nakutsikama kuli ikeye ngwavo, “Tunaija ku mesho ove mukupwa vindungo vove.”

19Oloni Yosefa wendekele kuli vakevo ngwendi, “Kesi muzive lyova embwe. Yange njasa kulyaka yange vavenya mu mwela wa Njambi ndi? 20Yeni mwanjiyongwele kunjilinga mwamuvi, oloni vuvi ovu Njambi wavutengulwile kuvupwisa vuvwa, ngeci vanu vavangi vayoye, ava vacili nakuyoya na lelo lino, omwo a cuma eci calingiwile. 21Ngecivene, kesi muzive lyova embwe. Njikaminyunga amo na vana veni vavandondo.” Co ikeye wavasimpisile na majwi akutetela, co akovelele mu vimbunge vyavo.

Kutsa kwa Yosefa

22Yosefa wakele mu Ingito amo na naanga ya ishe, wakele na myaka 110 omo watsile. 23Ikeye wayoyele, co wamwene vana va Efalime na vatekulyendi. Co lalo wayoyele nakumona vana va Makile muna Manase mu naanga. 24Asinoni Yosefa wendekele kuli vandolome vendi ngwendi, “Njili muyehi na kutsa, oloni mwa vushunga Njambi akaminyunga nakumitwamenena nakumitundisa mu lifuti eli nakumitwala ku lifuti lije lyalisingile nakulikulaesa kuli Avilahama, na Isake, na Yakomba.” 25#Kut 13:19; Yos 24:32; VaHe 11:22 Asinoni Yosefa wehwile vandolome vendi ngeci valisinge. Co wendekele ngwendi, “Njikulaeseni ngeci omo Njambi akamitundisa mu lifuti lino, mukambate muvila wange.” 26Ngecivene, Yosefa watsililile mu Ingito omo wakele na myaka 110. Co vakevo vomisile muvila wendi nakuwaka mu cikasa mu Ingito.

Currently Selected:

Kushangumuka 50: MBB

Highlight

Copy