Kutuuka 38
38
Kushonga mutula wa milambu ya kwenyeka
(Kut 27:1-8)
1Co washongele mutula wa mavaya a mungongo wa milambu ya kwenyeka. Woshe wapwile mumolika, mamita 2.2 mu vulaja na mamita 2.2 mu vwihi, na mamita 1.3 mu kulova. 2Co washongele lalo vyakushongomoka akamwa ku vimbango viwana, vikevyo vyapwile cuma cimo na mutula, co woshe wamutunu vausatele na vunengu. 3Wafulile lalo vivala vyoshe vya mutula, mapanda, na vifwosholo, na tumalonga, na vikwateso, na mapanda akwambatela tuhya. Vyoshe evi wavipangesele vunengu. 4Co wafulilileo mishele ya vunengu yakushelasana, wayakele mwisi ya livalo lya mutula, ngeci yetele akati ka mutula. 5Wafulile makulo awana, co waakele mu vimbango viwana. 6Washongele lalo mikambo yakwambatela ya mavaya a mungongo, waisatele na vunengu, 7wakovelesele mikambo mu makulo ku mutambela umo na umo wa mutula. Co vashongele mutula wa mavaya, wasezele mako mukati.
Kufula mbashiya ya vunengu
(Kut 30:18)
8Wafulile mbashiya ya vunengu na lisanda lyayo lya vunengu, lyapwile lya tulikengelo twa vanakazi vakele nakupanga ku cikolo ca Mbalaka Mwakuliwanena.
Cipango ca Mbalaka Mwakuliwanena
(Kut 27:9-19)
9Co watungilile Mbalaka Mwakuliwanena cipango ca mavamba a linyu yaivwa yakushelasana mwamuvwa. Co ku mutambela wa mu mbwela, mavamba apwile mamita 44 mu vulaja, 10akukwatesa na vimanda makumi avali vya vunengu na masanda makumi avali a vunengu, na vikwateso na mambanze vyakufula na siliva. 11Walingile cuma cimo na ku mutambela wa ku kunto ya cipango. 12Co ku mutambela wa mu kangombe ka yambi ka cipango kwakele mavamba a mamita 22 mu vulaja, na vimanda likumi, na masanda lalo likumi, na vikwateso, na mambanze wavifulile na siliva. 13Co ku mutambela wa mu ngangela, kuje kwakele cikolo, cipango capwile mamita 22, mumolika na ku mutambela wa mu kangombe ka yambi. 14Co ku mutambela umo wa cikolo kwakele livamba lya mamita 6.6 mu vulaja, na vimanda vitatu, na masanda atatu. 15Co ku mutambela ukwavo kwakele livamba lya mamita 6.6 mu vulaja, na vimanda vitatu, na masanda atatu. 16Co mavamba oshe aje azengulwisile cipango vawatongele na vinanga vyavivwa vya linyu yaivwa yakushelasana mwamuvwa. 17Co masanda a vimanda vawafulile na vunengu, na vikwateso, na mambanze, na vyakufwika ku vishongo ya vimanda vivasatesele na siliva. Co vimanda vyoshe vyazengelekele kuje ku cipango vavinungilile na mambanze a siliva. 18Co livamba lya ku cikolo ca cipango valitongele na vinanga vyavivwa vya linyu vyakushelasana na ulu yakuzivuluka, na yakuvenguluka, na yakuvenga vyakushoveya nakushelasana. Lyapwile mamita 9 mu vulaja, na mamita 2 mu kulova, lyalifwile ngwe mavamba a ku cipango. 19Valikwatesele na vimanda viwana, na masanda awana a vunengu. Co vikwateso vyavyo, na vyakufwika ku vishongo vyavyo, na mambanze avyo vyapwile vyakusata na siliva. 20Vipampalingo vyoshe vya Mbalaka na vya cipango vyapwile vyakufula na vunengu.
Vutale vwakupangesa mu Mbalaka Mwakuliwanena
21Ou ukewo mukana wa vutale vuvapangesele mu Mbalaka Mwakuliwanena, muje vatulikilile vitale vivali vya mamanya vije vivasonekele Mashiko Likumi. Mosesa washikile vaLevi kusoneka mukana ou ku livoko lya Itamale muna Alone muka-kukombelela.
22Mbezalele muna Uli, mutekulu wa Hule wa ku muyati wa Yunda, walingile vyuma vyoshe vije Shukulu Kalunga wavishikile kuli Mosesa. 23Co mukwasi wendi Oholyave muna Ahisamake, wa ku muyati wa Ndani, wapwile muka-kutaleka a mamanya, na muka-kushova nakushoveya, na muka-kushela vinanga vyavivwa vya linyu, vyakuzivuluka, na vyakuvenguluka, na vyakuvenga. 24Co ngolinde yoshe ije ivakundikile kuli Shukulu Kalunga ya Mbalaka yapwile makilo 1,000, ije vesekele ngwe ku vulemu vwa vimbongo vije vishakiwa ku Mbalaka yakujela. 25Siliva yatundile kukulava vungi vwa vanu yapwile makilo 3,430, ije vesekele ngwe ku vulemu vwa vimbongo vije vishakiwa ku Mbalaka yakujela. 26#Kut 30:11-16; Mat 17:24 Seteko eyi yapwile ngwe seteko ya vanu vaje valisonekesele, munu na munu wafwetele ngwe muje vasetekele ku vulemu vwa vimbongo vije vishakiwa ku Mbalaka yakujela. Co vapwile vanalume 603,550 vaje vakele na myaka makumi avali nambe kutuvakana vakevo valisonekesele. 27Vulemu vwa siliva vwa makilo 3,400 vukevwo vapangesele masanda 100 a Mbalaka yakujela na livamba lyakwo, co vulemu vwa makilo 34 vukevwo vapangesele lisanda na lisanda. 28Co siliva yasaleleko yapwile makilo 30, Mbezalele waifulile mambanze, na vikwateso vya vimanda, nakuyisata ku vishongo vya vimanda. 29Co vunengu vuje vuvakundikile kuli Shukulu Kalunga vwapwile makilo 2,425. 30Co wavupangesele masanda a ku cikolo ca Mbalaka Mwakuliwanena, na mutula wa vunengu, na mishele yawo ya vunengu yakushelasana, na vivala vyoshe vya ku mutula, 31na masanda oshe a cipango, na ku cikolo ca cipango, na vipampalingo vyoshe vya Mbalaka nevi vya cipango.
Currently Selected:
Kutuuka 38: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006