Kutuuka 39
39
Kutonga vuzalo vwa vaka-kukombelela
(Kut 28:1-14)
1Co vatongelele vaka-kukombelela vuzalo vwavuvwa vwa ulu yakuzivuluka, na yakuvenguluka, na yakuvenga, vyakuzala omo vapangele mu Mwela Wakujela. Co vatongelele Alone vuzalo vwakujela vwa vuka-kukombelela, ngwe muje Shukulu Kalunga washikile Mosesa.
2Co vatongele kangamuna ka nanga yaivwa ya linyu, na ulu yakuzivuluka, na yakuvenguluka, na yakuvenga, na nsambo ya ngolinde yakupepuka. 3Co vafulile ngolinde nakuyipasha nakuyiteta tupapi-tupapi nakutushela mu nanga yaivwa ya linyu, na ulu yakuzivuluka, na yakuvenguluka, na yakuvenga. 4Co vatongele tumiva tuvali twa a vitsili vya kangamuna, twakutongela noku-noku ngeci twase kutupateka. 5Voshele mwamuvwa mwiva wa kandombe na vinanga vyakulifwa na kangamuna, co vautongelele a kangamuna ngeci vyapwile cuma cimo, ngwe muje Shukulu Kalunga washikile Mosesa. 6Co vavwaesele tumamanya tuvali twa kanelya, vatwakele mu tukwatelo twa ngolinde, vatalekeleo na vutongwe mazina likumi na avali a vana va Yakomba. 7Co vatwakele a tumiva twa a vitsili vya kangamuna, twimanene miyati likumi na ivali ya Isalele, ngwe muje Shukulu Kalunga washikile Mosesa.
Kutonga kananga ka a nulo
(Kut 28:15-30)
8Co vatongele kananga ka a nulo na cifwa cimolika ngwe kangamuna, na ngolinde, na ulu yakuzivuluka, na yakuvenguluka, na yakuvenga, na linyu yaivwa yakwosha mwamuvwa. 9Kapwile mumolika nomu-nomu kakwetekela muvali, masentimita 22 mu vulaja na masentimita 22 mu vwihi. 10Co vaakeleo mindando iwana ya tumamanya twa seo yakama. Mu mundando wamucimo vaakelemo tumamanya twa lumbi, na topaze, na nganete, 11co mu mundando wamucivali vaakelemo emalinde, na safile, na ndaimonde. 12Co mu mundando wamucitatu vaakelemo takwoise, na angeta, na amesita. 13Co mu mundando wamuciwana vaakelemo mbelilu, na kanelya, na njasipa. Co otu tumamanya vatwakele mu tukwatelo twa ngolinde. 14Co tumamanya otu likumi na tuvali kamo na kamo vatalekeleo lizina lya umo na umo wa vana va Yakomba, mukwimanena miyati likumi na ivali ya vaIsalele. 15A kananga ka a nulo vafulilileo malyenge a ngolinde yakujela akwosha ngwe nsambo. 16Vafulile tukwatelo tuvali twa ngolinde na makulo avali a ngolinde, co makulo aje avali vawakwatesele ku vimbango vya kwilu ya kananga ka a nulo. 17Vaakele malyenge aje avali a ngolinde ku makulo avali kumukulo wa kananga ka a nulo, 18co vakwatesele vishongo vikwavo vivali vya malyenge a ngolinde ku tukwatelo tuvali, co mu ngila eyi vawakwatesele na tumiva tuje twakele a vitsili ku mbando ya kangamuna. 19Co vafulile makulo avali a ngolinde, akwatesele kwisi ya vimbango vya kananga ka a nulo ku mukundwilo wa mukati wakwata ku kangamuna. 20Co vafulile lalo makulo avali a ngolinde akwatesele kwisi ya tumiva tuvali twa a vitsili ku mbando ya kangamuna, kuyehi na mutongo, akamwa ya mwiva wa kandombe wakwosha mwamuvwa. 21Ngwe muje Shukulu Kalunga washikile Mosesa, co vakutiiye makulo a kananga ka a nulo ku makulo aa kangamuna na mukole wakuzivuluka, ngeci kaje kananga ka a nulo kakele akamwa ya mwiva wa kandombe wakwosha mwamuvwa ngeci kesi kashengenye.
Kutonga vuzalo vukwavo vwa vaka-kukombelela
(Kut 28:31-43)
22Co vatongele cikoveyo cacilaja cakwita mwisi ya kangamuna na ulu yakuzivuluka, 23vacakele mbengwa mwakutuwisila mutwe, co ku mbengwa eyi vetisileko lupula kutewesa kutavuka. 24Co ku mukundwilo waco vaakeleko mapomingilanete a nanga yaivwa ya linyu, na ulu yakuzivuluka, na yakuvenguluka, na yakuvenga akushoveya. 25Co lalo vafulile vingenjo vya ngolinde yakujela, nakuvishovasana na mapomingilanete vavizengelekele ku mukundwilo wa cikoveyo. 26Vingenjo na mapomingilanete vavishovasanene nakuvizengeleka kumukundwilo wa cikoveyo ngwe muje Shukulu Kalunga washikile Mosesa. 27Co vatongelele visanya Alone na vana vendi, 28na kalupusa, na tukofwi, na tuputula twa linyu, 29na mwiva wa kandombe wa nanga yaivwa ya linyu, na ulu yakuzivuluka, na yakuvenguluka, na yakuvenga, vyakushoveya nakushelasana, ngwe muje Shukulu Kalunga washikile Mosesa. 30Vafulile mande ya ngolinde yakujela yakupasha kupwa cizivukiso cakujela cakukundika, co vatalekeleo “Wakukundika kuli Shukulu Kalunga.” 31Co vaikutiiye kulutwe lwa kalupusa na mukole wakuzivuluka, ngwe muje Shukulu Kalunga washikile Mosesa.
Kumanesa vipangi
(Kut 35:10-19)
32Vipangi vyoshe vya ku Mbalaka Mwakuliwanena vyahwile. VaIsalele valingile vyuma vyoshe ngwe muje Shukulu Kalunga washikile Mosesa. 33Vanenele Mbalaka kuli Mosesa na vivala vyayo vyoshe, na vikwateso vyayo vyakweteka ngwe malovo, na vivuliko vyayo, na mambanze ayo, na vimanda vyayo, na masanda ayo. 34Na vilambu vyakufwikao vya maka a majamba a vimanga vyakulomba na mushumbelo wakuvenga, na vilambu vyakufutungula vyakufwikao, na livamba. 35Na Cikasa ca Cikumiiyo muje mwakele vitale vya mamanya a vukaleo, na mikambo yaco, na cifwiko caco. 36Na mesa na vivala vyayo vyoshe, na makende akulambula kuli Njambi. 37Citumbikilo ca vindeya ca ngolinde yakujela, na vindeya vyaco, na vivala vyaco vyoshe, na mazi a mu vindeya. 38Na mutula wa ngolinde, na mazi akuvwavesa, na insense yakunika lwengo lwaluvwa, na livamba lya ku cikolo ca Mbalaka. 39Mutula wa vunengu na mishele yawo ya vunengu, na mikambo yawo, na vivala vyawo vyoshe, na mbashiya yakujwelela na lisanda lyayo. 40Mavamba a cipango na vimanda vyaco na masanda aco, na livamba lya ku cikolo ca cipango na mikole yaco, na vipampalingo vya Mbalaka, na vivala vyoshe vyakupangesa mu Mbalaka. 41Vuzalo vwavuvwa vwa vaka-kukombelela vwakuzala omo vakovela mu Mwela Wakujela, vuzalo vwakujela vwa Alone muka-kukombelela novu vwa vana vendi. 42Co vaIsalele valingile vipangi vyoshe ngwe muje Shukulu Kalunga washikile Mosesa. 43Co Mosesa welwile vyuma vyoshe, wamwene ngeci vanavilingi vyoshe ngwe muje mwashikile Shukulu Kalunga vene. Co Mosesa wavavezikisile.
Currently Selected:
Kutuuka 39: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006