Kutuuka 37
37
Kushonga Cikasa ca Cikumiiyo
(Kut 25:10-22)
1Mbezalele washongele Cikasa ca Cikumiiyo ca mavaya a mungongo, capwile masentimita 110 mu vulaja, na masentimita 66 mu vwihi, na masentimita 66 mu kulova. 2Asinoni wacisatele na ngolinde yakujela mukati na akamwa, co wazengulwisileko mukundwilo wa ngolinde. 3Wafulile makulo awana a ngolinde akwambatela aje akwatele ku mendi aco awana, makulo avali ku mutambela na mutambela. 4Co washongele mikambo yakwambatela ya mavaya a mungongo, waisatele na ngolinde, 5waishilwisile mukati ka makulo ku mutambela na mutambela wa cikasa. 6Co wafulile cifwiko ca ngolinde yakujela, capwile masentimita 110 mu vulaja na masentimita 66 mu vwihi. 7Wafulile vakelumbi vavali va mambava vakupameya na ngolinde, co wavafulilile ku shongo imo na imo ya cifwiko ca mema ku mbunge, 8co wakele kelumbi umo ku shongo imo ya cifwiko, na kelumbi mukwavo ku shongo ikwavo ya cifwiko. Wavapameyeyeye amo na cifwiko, ngeci vyapwile cuma cimo. 9Co vaje vakelumbi va mambava valikengele vihanga vyavo umo na umo aje a cifwiko, co aje mambava avo akujangumuka afwikile cifwiko.
Kushonga mesa ya makende akulambula kuli Njambi
(Kut 25:23-30)
10Mbezalele washongele mesa ya mavaya a mungongo, yapwile masentimita 88 mu vulaja, na masentimita 44 mu vwihi, na masentimita 66 mu kulova kwayo. 11Co waisatele na ngolinde yakujela, wazengulwisileko mukundwilo wa ngolinde. 12Co waishongelele livalo lyakupwa masentimita 7.5 lyakuyizengulwisa. Co waakele lalo mukundwilo wa ngolinde wakuzengulwisa livalo. 13Waifulilile makulo a ngolinde awana akuyambatela nakuwaka ku vimbango viwana, ku mendi ayo. 14Makulo akukwatesa mikambo yakwambatela mesa wawakele kuyehi na livalo. 15Co washongele lalo mikambo ya mavaya a mungongo nakuyisata na ngolinde. 16Wafulile vyuma vyoshe vya mesa na ngolinde yakujela, na malonga, na vinganja, na vinjava, amo na tumalonga twatundondo twakupangesa a milambu ya vinyu.
Kufula citumbikilo ca vindeya
(Kut 25:31-40)
17Co lalo wafulile citumbikilo ca vindeya ca ngolinde yakujela. Lisanda lyaco na manda yaco wavifulile na ngolinde yakupameyeya, amo na vishani vyaco vyakucakeya, amo na vintemo na mavundungulu aco, ngeci vipwe cuma cimolika. 18Co minango itanu na umo yatundile ku mutambela umo na umo wa manda, ku mutambela umo na umo kwatundile itatu. 19Co ku minango itanu naumo ku umo na umo kwakele vishani vyakucakeya vitatu, cifwa cavyo ngwe vishani vya alumonde na mavundungulu na vintemo. 20Co manda ya citumbikilo ca vindeya yakele na vishani vyakucakeya viwana vyakufwa ngwe vishani vya alumonde na mavundungulu na vintemo. 21Co a manda ya citumbikilo ca vindeya akele livundungulu limo mwisi ya minango ivali, co livundungulu limo mwisi ya minango ivali, na livundungulu limo mwisi ya minango ivali kuje ku minango itanu na umo ije itunda a citumbikilo ca vindeya. 22Ngecivene, mavundungulu na minango, na citumbikilo ca vindeya vyapwile cuma cimolika cakupameyeya na ngolinde yakujela. 23Co wafulile vindeya vitanu na vivali a citumbikilo cavyo, wafulile vimana vyavyo na malonga akushalamena a ngolinde yakujela. 24Co wapangesele makilo 35 a ngolinde yakujela yakufulisa citumbikilo ca vindeya na vivala vyaco vyoshe.
Kushonga mutula wakwenyekela insense
(Kut 30:1-5)
25Wapangele mutula wa mavaya a mungongo wakwenyekela insense. Co wapwile mumolika nomu-nomu, masentimita 45 mu vulaja na masentimita 45 mu vwihi, na masentimita 90 mu kulova. Co na vyakushongomoka vyawo vya mu vimbango viwana vyapwile cuma cimolika na mutula. 26Wausatesele na ngolinde yakujela akamwa yawo, na mu mitambela yoshe iwana, na ku vyakushongomoka vyawo, wazengulwisileko mukundwilo wa ngolinde. 27Co wafulile makulo avali a ngolinde akwambatela nakuwakwatesa kwisi ya mukundwilo wayo ku mitambela yoshe ivali, mukukwatesa mikambo yakuwambatela. 28Washongele mikambo ya mavaya a mungongo, co wayisatesele na ngolinde.
Mwakulingila mazi akuvwavesa na insense
(Kut 30:22-38)
29Co walingile mazi akuvwavesa akujela na insense yakujela yakunika lwengo lwaluvwa. Co wavitsingasanene vipwe vyakunika lwengo lwaluvwa.
Currently Selected:
Kutuuka 37: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006