Kutuuka 36
36
1“Mbezalele, na Oholyave, na vaka-kushonga, vaje Shukulu Kalunga wavanene vutongwe nakuzivisisa, vaje vazivuka kulinga vyuma vyoshe vije vishakiwa vyakutungisa Mbalaka yakujela, vanapande kulinga vyuma vyoshe vije vyanashiki Shukulu Kalunga.”
Vanu vanena vwana vwavungi
2Mosesa wasanene Mbezalele, na Oholyave, na vatongwe voshe vaje Shukulu Kalunga wavanene mana, vaje vakele na cizango cakukwasa, co Mosesa wavalekele kushangumuka kupanga. 3Co vatambwile milambu yoshe ije ivanenele vaIsalele mukutungisa Mbalaka yakujela. Oloni vanu va Isalele vakele nakunena milambu yavo kuli Mosesa a mutondo a mutondo. 4Asinoni vanalume vatongwe vaje vakele nakupanga vipangi vezile 5kuli Mosesa vamulekele ngwavo, “Vanu valinakunena vyavingi kutuvakana vije tushaka vije vyanashiki Shukulu Kalunga ngeci tuvilinge.”
6Co Mosesa watumine lishiko mu cilombo mwoshe, ngwendi naumo wai lalo akanena vwana vwakutungisa Mbalaka yakujela. Co vanu valikelele kunena vwana vukwavo. 7Co vije vivaneneleko vyapwile vyavingi kutuvakana vije vyashakiwile akumanesa vipangi vyoshe.
Kutunga Mbalaka Mwakuliwanena
(Kut 26:1-37)
8Co vatongwe va vanalume voshe vaje vakele akati ka vaje vapangele vipangi, vatungile Mbalaka Mwakuliwanena, vaipangele na vinanga likumi vya linyu vyavivwa, vyakwosha na ulu yakuzivuluka, na yakuvenguluka, na yakuvenga, vavitongele na vutongwe na vifwa vya vakelumbi va mambava. 9Co nanga imo na imo yapwile mumolika, mamita likumi na avali mu vulaja, na mamita avali mu vwihi. 10Co vatongelele amo vinanga vyoshe vitanu kupwa livamba limo, co valingile cuma cimolika na vikwavo vitanu lalo. 11Vatongelele vikongo vya nanga yakuzivuluka ku mukundwilo wa anja ku livamba limo na limo. 12Co vatongele vikongo makumi atanu ku mukundwilo wa livamba lyakulivanga, na vikongo makumi atanu vavitongelele kumukundwilo wa livamba lyamucivali ngeci vikongo vyalitombwele. 13Co vafulile vikwateso makumi atanu vya ngolinde, vyakunungilisa mavamba avali ngeci Mbalaka ipwe imolika.
14Asinoni vatungile vinanga likumi na imo vyakufwika akamwa ya Mbalaka vyakutonga na maka a vimembe. 15Co vinanga vyoshe vivatungile vyapwile mumo, mamita likumi na atatu mu vulaja, na mamita avali mu vwihi. 16Co vatongelele vyoshe vitanu amolika kupwa livamba limo, co vikwavo lalo vitanu na imo vavitongele amolika kupwa livamba lyamucivali. 17Co vaakele vikongo makumi atanu ku mukundwilo wa livamba limo na vikongo makumi atanu ku mukundwilo wa livamba likwavo. 18Vafulile lalo vikwateso vya vunengu makumi atanu, vavishilwisile mu vikongo, co vakumbasanene mavamba oshe avali kupwa livamba limo lyakufwika akamwa ya mbalaka. 19Vatongele lalo vilambu vikwavo vivali vyakufwikao, cimo ca cilambu ca lijamba lya manga cakulomba na mushumbelo wakuvenga, co cikwavo ca cilambu cacivwa ca membe cakufutungula, cakufwika akamwa yavyo.
20Co vashongele vivuliko vya Mbalaka vyakushungama vya mavaya a mungongo. 21Civuliko cimo na cimo capwile mamita awana mu vulaja, na masentimita 66 mu vwihi, 22co vaakeleko vyakushongomoka vivali, vije vyasele kunungila vivuliko amo, co vivuliko vyoshe vyakele nevi vyakushongomoka mu ngila eyi vene. 23Vashongele vivuliko makumi avali vya ku mutambela wa mu mbwela, 24co na masanda a siliva makumi awana akele kwisi yavyo, co masanda avali kwisi ya civuliko cimo na cimo mukukwatesa vije vyakushongomoka vivali. 25Co vashongele vivuliko makumi avali ku mutambela wa ku kunto ya Mbalaka, 26na masanda a siliva makumi awana, avali akele kwisi ya civuliko cimo na cimo. 27Anima ya Mbalaka, mu kangombe ka yambi vashongeleleko vivuliko vitanu na cimo, 28co vivuliko vivali vyakele mu vimbango. 29Evi vivuliko vavilamakanene mu vimbango vivali vivali, kutunda kwisi yavyo nakweta kwilu. Co vivuliko vivali vya mu vimbango vivali vavilingile mu ngila eyi vene. 30Co kuje kwakele vivuliko vitanu na vitatu na masanda avyo a siliva likumi na atanu na limo, co kwisi ya civuliko cimo na cimo kwakele masanda avali.
31Vashongele mavalo likumi na atanu a mavaya a mungongo, atanu aa vivuliko ku mutambela umo wa Mbalaka, 32co mavalo atanu ku mutambela ukwavo wa vivuliko, co atanu ku vivuliko vya kunima ya Mbalaka mu kangombe ka yambi. 33Co livalo lya mukati lyakingivalele kutunda ku shongo imo ya Mbalaka nakweta ku shongo ikwavo. 34Co vasatele vivuliko na ngolinde nakuvikuta na makulo a ngolinde mukukolesa mavalo, co akewo lalo vawasatele na ngolinde.
35Co vatongele livamba lya nanga yaivwa ya linyu, yakwosha yakuzivuluka, na yakuvenguluka, na yakuvenga yakushelasana na cifwa ca vakelumbi va mambava. 36Vashongele vimanda viwana vya mavaya a mungongo mukukwatesa livamba, vimanda vije vavisatele na ngolinde, co vavinungasanene na vikwateso. Asinoni vafulile masanda awana a siliva akukwatesa vimanda. 37Co ku cikolo ca Mbalaka vatongeleleko livamba lya vinanga vyavivwa vya linyu vyakwosha, vyakuzivuluka, na vyakuvenguluka, na vyakuvenga vyakushoveya na vwanda vwakushelasana. 38A livamba eli vashongeleleo vimanda vitanu vyakunungasana na vikwateso vya ngolinde. Co vasatele ngolinde akamwa ya vimanda na mavalo avyo, co vafulile masanda a vunengu atanu a vimanda.
Currently Selected:
Kutuuka 36: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006