2 Mizimbu 14
14
Mwene Asa afungulula vaSundane
1Mwene Aviya watsile, co vamutsindile mu vimbumbo vya vumwene mu Nganda ya Ndaviti. Co munendi Asa wamushwanene kupwa mwene, omo Asa washwanene, mu lifuti mwakele kwoloka kuluu a myaka likumi. 2Co Asa wavwaelelesele Shukulu Kalunga, Njambi yendi, akulinga vyuma vya vushunga na vyuma vyavivwa. 3Watundisile mitula yakulemesela vinjambi veka na mitambela ije vakele nakulemesela vaka-kujeneka kukulaela, co watavozwele vinjambi vakwola a vimanda vyakujela vya mamanya, co wasiwile lalo vifwa vya Ashela njambi wa munakazi. 4Co washikile vanu va Yunda ngeci valinge cizango ca Shukulu Kalunga, Njambi ya vakukulwila vavo, nakwononoka vilongesa vyendi na mashiko endi. 5Omwo watundisile mitambela ije vakele nakulemesela vaka-kujeneka kukulaela, na mitula ya insense mu vinganda vyoshe vya mu Yunda, co kwakele kwoloka a simbu ije yashwanene. 6A simbu ije watungile vimpaka mu vinganda vya mu Yunda, co myaka yaingi yetile kukwakele nzita, omwo Shukulu Kalunga wamwanene kwoloka. 7Co walekele vanu va mu Yunda ngwendi, “Tutungeni vinganda tuvyake mu vimpaka na tuposhi, na vikolo vyakupata na tupateso. Tuli na moko yakushwana lifuti, omwo tunalingi cizango ca Shukulu Kalunga Njambi yetu. Ikeye natunyungu nakutwana kwoloka ku mitambela yoshe.” Ngecivene, vatungile, co vakele mwamuvwa. 8Mwene Asa wakele na mashwalale vakupwa 300,000 va ku Yunda, vaje vambatele vintelo na makunga, na vanalume vakupwa 280,000 va ku Mbenjemani, vaje vambatele vintelo na mata a lusipa. Voshe vapwile vakusimpa, vanalume vaje vavalongesele mwamuvwa kulwa nzita.
9KaSundane umo lizina lyendi Zela walwisile Yunda, wakele na mashwalale vakupwa 1,000,000 na matemba akupwa 300, vetele na ku Malesha. 10Co Asa wamulwisile, vinzita vyoshe vivali vyalikwalalekele mu myela yavyo ku Cana ca Zefata kuyehi na Malesha. 11Ngecivene, Asa walombelele kuli Shukulu Kalunga Njambi yendi ngwendi, “Yove Shukulu Kalunga, kukwesi weka asa kukwasa vaka-kuzeya omo valwa na vaka-nzili kuvanga yove lika. Tukwase ololo, Shukulu Kalunga Njambi yetu, omwo yetu twajendamena ali yove, co mu lizina lyove tunaija nakulwa na mashwalale ava vavangi manene. Shukulu Kalunga, yove unapu u Njambi yetu, naumo wai asa kukuhyana.”
12Ngecivene, Shukulu Kalunga wahyanene mashwalale va vaSundane omo vavalwisile kuli Asa na mashwalale va vaYunda. Co vaSundane vatewele, 13asinoni Asa na mashwalale vendi vavashekele nakuvetesa ku Ngelale. Ngecivene, vatsiile vaSundane vavangi naumo wai wavo wayoyeleo. Shukulu Kalunga wavanyongesele na nzita yendi, co mashwalale vapukwile vufuko vwavungi manene. 14Asinoni vanyongesele vinganda vije vyazengelekele Ngelale, omwo vanu vamwo vakele na lyova lya Shukulu Kalunga. Co mashwalale vapukwile vyuma vyoshe vya muje mu vinganda omwo mwakele vufuko vwavungi manene. 15Co lalo valwisile vilombo vya tunyungi, co vambatele vimanga vavangi na tumelo. Asinoni velukile ku Yelusalema.
Currently Selected:
2 Mizimbu 14: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
