2 Mizimbu 13
13
Nzita ya Aviya na Yelovowame
(1 Vim 15:1-8)
1Mu mwaka wamulikumi na itanu na itatu omo Yelovowame wapwile mwene wa mu Isalele, Aviya wapwile mwene wa mu Yunda, 2co washwanene myaka itatu mu Yelusalema. Vaina vapwile Mikaya muna Ulyele wa ku nganda ya Ngimbeya.
Co kwakele nzita mukati ka Aviya na Yelovowame. 3Aviya wakungulwile mashwalale vakupwa 400,000, oloni Yelovowame wezile na mashwalale vakupwa 800,000.
4Co mbunga ya mashwalale valiwanenene mu lifuti lya malundu lya Efalime. Mwene Aviya wemanene a Munkinda wa Zemalaime, co wendekele kuli Yelovowame na vaIsalele ngwendi, “Njitolilileni! 5Kuma kumwazivukile ngeci Shukulu Kalunga, Njambi ya Isalele walikumiiye cikumiiyo cakukola na Ndaviti, akumwana ikeye na vatekulwila vendi kushwana Isalele ku myaka yoshe? 6Yelovowame muna Nembate ngamba ya Solomoni muna Ndaviti watengulukilile Solomoni mwene yendi nakumulwisa. 7Co munima yevi wakungulwile viyambangani vakujeneka seo, vakevo vafungulwile Lehovowame muna Solomoni, omwo wapwile mwanike wamundondo, wakele na lyova, co kasele kuvalwisa. 8Ololo mwayongola kulwisa vumwene vuje vwaanene Shukulu Kalunga kuli vatekulwila va Ndaviti. Muli na mashwalale vavangi, co lalo muli na vingombe va ngolinde vaje vapangele Yelovowame ngeci vapwe vinjambi veni. 9Mwashekele vaka-kukombelela va Shukulu Kalunga, vatekulwila va Alone, lalo mwashekele vaLevi. Co munemika vaka-kukombelela veka mu myela yavo ngwe muje muvakalingi vaka-miyati yeka. Munu woshe aija na muna ngombe nambe na vimanga vatanu na vavali nakulijelesa, yeni mumupwisa muka-kukombelela ku vinjambi veni vangoco.
10“Oloni yetu anga tucili nakupangela Shukulu Kalunga Njambi yetu, kutwamusezele. Vaka-kukombelela va ku naanga ya Alone vakapanga vipangi vyavo, co vaLevi vakavakwasako. 11A mutondo a mutondo na a cingwezi na cingwezi vakamukombelelela insense na vimuna vakwenyeka voshe vamutunu. Co vakana vin̄ombelo vya makende vakawaaka a mesa yakujela, co ku cingwezi na cingwezi vakashwameka vindeya a vitumbikilo vya vindeya vya ngolinde. Co tukalingi vije vyanatushiki Shukulu Kalunga, oloni yeni munamuseza. 12Co kengeni, Njambi vavenya ikeye wapwa ntwama yetu, na vaka-kukombelela vendi tuli navo vakevo vali na malupembo avo akwimba kashashutwiya nakutuleka ngeci tulwe neni. Yeni vanu va Isalele kesi mulwise Shukulu Kalunga Njambi ya vakukulwila veni! Kumukahyana embwe!”
13A simbu ije vene kuma Yelovowame natumu laja mashwalale vendi kukavandamena kunima ya mashwalale va vaYunda, co vamo valikengele navo kulutwe. 14Omo vaYunda valikenukile, vamwene ngeci vanavazengeleka. Co vatambekele kuli Shukulu Kalunga ngeci avakwase, co vaka-kukombelela vembile malupembo. 15Co vaYunda vakangokele nakutambeka, co Aviya wavatwamenenene kuya nakulwa. Ngecivene, Njambi wahyanene Yelovowame na mbunga ya mashwalale va vaIsalele. 16VaIsalele vatewele vaYunda, co Njambi watavele ngeci vaYunda vafungulule vaIsalele. 17Co Aviya na mbunga ya mashwalale vendi vatsiile manene vaIsalele, litambelo lya mashwalale va vaIsalele vakulwa mwamuvwa vapwile 500,000 vatsiile aje vene. 18Ngecivene, vaYunda vahyanene vaIsalele, omwo vakulaelele kuli Shukulu Kalunga Njambi ya vakukulwila vavo.
19Aviya washekele mashwalale va Yelovowame, co wamutambwile vinganda vyendi vya Mbetele, na Njeshana, na Efelone, na membo aje azengelekele vinganda evi. 20Co Yelovowame kakele lalo na nzili a simbu yashwanene Aviya. Akukotoka Shukulu Kalunga wamupupile, co watsile.
21Ngecivene, nzili ya Aviya yapwile yakama. Wakele na vanakazi likumi na vawana, co wakele na vana va vanalume makumi avali na vavali, co vana va vanakazi vapwile likumi na vatanu na umo. 22Muzimbu woshe wa Aviya, na vije vyendekele na vije vyalingile, vavisoneka mu Livulu lya Mizimbu lya Indo Muka-kwimanena.
Currently Selected:
2 Mizimbu 13: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
