2 Mizimbu 12
12
Mwene Shishake wa Ingito akovelela Yunda
(1 Vim 14:25-28)
1Omo vumwene vwa Lehovowame vwakolele, nendi lalo omo wakele na nzili, co ikeye na vanu va Isalele voshe vasezele Lishiko lya Shukulu Kalunga. 2Mu mwaka wamucitanu wakushwana kwa Lehovowame, Mwene Shishake wa Ingito walwisile Yelusalema omwo vanu vajenekele kwononoka Shukulu Kalunga. 3Co wakele na matemba 1,200, na vaka-kulonda a tuvalu vakupwa 6,000, co mashwalale vapwile vavangi naumo wai wasele kuvalava, amo na vaLimbiya na vaSuki, na mashwalale va vaSundane. 4Wafungulwile vinganda vya vimpaka vya mu Yunda, co waile kulutwe nakweta ku Yelusalema.
5Co Shemaya muka-kwimanena waile kuli Mwene Lehovowame na kuli vantwama va vaYunda vaje vakungulukilile mu Yelusalema kutewa nzita ya Shishake, wendekele kuli vakevo ngwendi, “Shukulu Kalunga nendeka ngwendi, ‘Munanjikengesa nima, mukemwo njinamikundika mu mavoko a Shishake.’ ”
6Co Mwene na vantwama valitavelele ngeci vanalingi vuvi, vendekele ngwavo, “Shukulu Kalunga wapwa wa vushunga.”
7Omwo Shukulu Kalunga wamwene ngeci vanalitavela vuvi vwavo, co wendekele lalo kuli Shemaya ngwendi, “Omwo vanalitavela vuvi vwavo, kunjikavanyongesa embwe. Oloni omo Shishake akavalwisa, vakovoka kamandondo lika. Vukalu vwange kuvukakala a Yelusalema, 8oloni Shishake akavafungulula, ngeci vakalilongese kwangunuka cije cili akati kakunjipangela yange nakupangela vaka-kushwana va mafuti eka.”
9 #
1 Vim 10:16-17; 2 Miz 9:15-16 Mwene Shishake wa Ingito wezile ku Yelusalema, wambatele vufuko vwoshe vwa mu Njuvo ya Shukulu Kalunga na vuje vwa mu lipela. Co wambatele vyuma vyoshe, amo na vintelo vya ngolinde vije vyafulile Mwene Solomoni. 10Co Mwene Lehovowame wafulile vintelo vyeka vya vunengu vyengisilemo, wavyanene kuli vamyata vaka-kunyunga ku vikolo vya lipela. 11Simbu yoshe omo mwene wakovelele mu Njuvo ya Shukulu Kalunga, co vaka-kunyunga vakovelele amo nendi oku vanambata vintelo, co omo mwene watundilemo vaviilwisile lalo mu mulili wakuvitulikila. 12Omwo mwene walikeesele, co Shukulu Kalunga watundisile vukalu vwendi, kamunyongesele, co mu Yunda vyuma vyoshe vyakele mwamuvwa.
Kwituluka mu vushwana vwa Lehovowame
13Lehovowame washwanene mu Yelusalema, co vumwene vwendi vwakolele manene. Wakele na myaka makumi awana na mwaka umo omo wapwile mwene, washwanene myaka likumi na itanu na ivali mu Yelusalema, nganda yaangwile Shukulu Kalunga akati ka mafuti oshe a Isalele kupwa mwela wakumulemesela. Lizina lya vaina ya Lehovowame lyapwile Nama wa ku lifuti lya Amoni. 14Lehovowame walingile mwamuvi, omwo kalingile cizango ca Shukulu Kalunga.
15Vilinga vya Lehovowame kutunda kukushangumuka kweta nakukukotoka, na muzimbu wa naanga yendi vavisoneka mu Livulu lya Mizimbu lya Shemaya Muka-kwimanena na mu Livulu lya Mizimbu lya Indo Muka-kwimanena. Lehovowame na Yelovowame vakele nakulwa nzita simbu yoshe. 16Lehovowame watsile, co vamutsindile mu vimbumbo vya vumwene mu Nganda ya Ndaviti, co munendi Aviya wamushwanene kupwa mwene.
Currently Selected:
2 Mizimbu 12: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
