2 Mizimbu 15
15
Asa atengulula vyuma
1Munzinzime wa Njambi wezile ali Azaliya muna Ondende, 2co waile nakuliwana na Mwene Asa. Co watambekele ngwendi, “Njitolilile, yove Mwene Asa, neni vanu voshe va Yunda na Mbenjemani njitolilileni! Shukulu Kalunga ali amo neni, omo yeni muli amo nendi, nga mumushakezeka, mukamuwana, oloni nga mutunda kuli ikeye, co akamiseza. 3VaIsalele vakele simbu yakama vajenekele Njambi wa vushunga, vajenekele vaka-kukombelela ngeci vavalongese, lalo vajenekele lishiko. 4Oloni omo vukalu vwezile, co vatengulukilile kuli Shukulu Kalunga, Njambi ya Isalele. Vamushakezekele, co vamuwanene. 5A matangwa aje kukwakele kwoloka ku munu nambe umo wai, omwo kwakele vukalu na tuyando mu lifuti mwoshe. 6Muyati umo wakele nakuyandesa muyati ukwavo, co nganda imo yakele nakuyandesa nganda ikwavo, omwo Njambi wakele nakunena tuyando na lyova ali vakevo. 7Oloni yeni munapande kukolesa kesi muzeye embwe. Omwo vakamyana cikandelela a vipangi vije mulinakupanga.”
8Omo Asa wazivile vuka-kwimanena vuje vwambulwile Azaliya muna Ondende, co wakolesele. Watundisile tumponya mu lifuti lya Yunda na Mbenjemani, na tumponya twoshe tuje twakele mu vinganda vije vyafungulwile mu lifuti lya malundu lya Efalime. Co lalo watungulwile mutula wa Shukulu Kalunga uvashimbikile mu cipango ca ku Njuvo ya Shukulu Kalunga.
9Vanu vavangi va mu vumwene vwendi, vakutunda ku Efalime na Manase na Simyoni vakele nakwija kuli Asa omwo vamwene ngeci Shukulu Kalunga wakele amo nendi. Co Asa wavakungulwile voshe amolika na vanu va ku Yunda na ava va ku Mbenjemani. 10Vakungulukilile mu Yelusalema ku ngonde yamucitatu mu mwaka wamulikumi na itanu omo Mwene Asa washwanene. 11A litangwa lije vene vakombelelele vin̄ombelo kuli Shukulu Kalunga vya vije vyakupukula vezile navyo, vingombe vakupwa 700, na vimanga vakupwa 7,000. 12Co valikumiiye cikumiiyo cakulemesa Shukulu Kalunga, Njambi ya vakukulwila vavo, na mbunge yavo yoshe na mwonyo wavo woshe. 13Munu woshe, mukwenje nambe mukulunu, munalume nambe munakazi, uje akalikela kulemesa Shukulu Kalunga vakamutsiya. 14Co valingile cikumiiyo kuli Shukulu Kalunga nakutambeka na lijwi lyakama oku vaimba malupembo. 15Vanu voshe va mu Yunda vajolelele omwo valikumiiye cikumiiyo eci na vimbunge vyavo vyoshe. Vavwaelelele akulemesa Shukulu Kalunga, co Shukulu Kalunga wavatambwile, co vakele mu kwoloka ku mitambela yoshe.
16Mwene Asa watundisile kuku yendi Maka a litanda lyendi lya vamwene, omwo wapangele kamponya kakavi ka Ashela njambi wa munakazi. Asa washinjile kaje kamponya, wakatetangele, co wenyekelele vimbazuvwila vyako mu Cana ca Kindelone. 17Nameme Asa kasele kunyongesa mitambela ije vakele nakulemesa vaka-kujeneka kukulaela mu lifuti, oloni ikeye wakulaelele Shukulu Kalunga simbu yoshe yakuyoya kwendi. 18Co waakele mu Njuvo ya Shukulu Kalunga vyuma vyoshe vije vyakundikile ishe Aviya kuli Njambi, na vyuma lalo vya ngolinde na siliva vije vyakundikile ikeye vavenya. 19Kukwakele lalo nzita noo mu mwaka wamumakumi atatu na itanu yakushwana kwendi.
Currently Selected:
2 Mizimbu 15: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
